Almatyda aýyl balalaryna arnalǵan «AUYL SPORT-2024» respýblıkalyq lıgasy bastaldy, dep habarlaıdy "Adyrna" ulttyq portaly.
Búgin, 21 jeltoqsanda Almaty qalasyndaǵy «Dostyq» sport kesheninde aýyl balalarynyń qatysýymen «AUYL SPORT-2024» respýblıkalyq lıgasynyń ashylý saltanaty ótti. Aýqymdy sharaǵa elimizdiń ár óńirinen 1300-den astam jas sportshy jınaldy.
Jobanyń bas demeýshisi ári uıymdastyrýshysy – «Halyq» qaıyrymdylyq qory. Seriktester qatarynda Qazaq sport jáne týrızm akademııasy, QR Oqý-aǵartý mınıstrligi, Ulttyq ǵylymı-praktıkalyq dene tárbıesi ortalyǵy jáne Almaty qalasy sport basqarmasy bar.
«AUYL SPORT» jobasy 2023 jyldyń qazan aıynda «Halyq» qorynyń bastamasymen qolǵa alynyp, aýyl jastarynyń sportqa qyzyǵýshylyǵyn arttyrýdy, sportty nasıhattaýdy jáne aýyldyq jerlerde buqaralyq sportty damytýdy maqsat etedi. Sonymen qatar, joba aýyldyq jattyqtyrýshylardyń biliktiligin arttyrýǵa baǵyttalǵan.
Respýblıkalyq lıgada boks, erkin kúres, karate, basketbol, voleıbol jáne shahmattan saıystar ótkiziledi. Bul jarystarǵa elimizdiń 17 oblysynda ótken óńirlik lıganyń jeńimpazdary qatysýda. Týrnır qurylymy:
- Erkin kúres pen boks – 2010-2012 jyly týǵan balalar arasynda 6 salmaq dárejesi;
- Basketbol jáne voleıbol – 2009-2011 jyly týǵan qyzdar men uldar komandalary arasynda;
- Shahmat – 10 jasqa deıingi jáne 14 jasqa deıingi uldar men qyzdar arasynda.
Óńirlik lıgalarda 200-den astam aýyldyń 7000-ǵa jýyq balasy men jasóspirimi baq synady.
Ashylý saltanatynda qatysýshylar men qonaqtardy «Halyq bank» AQ basqarma tóraǵasy Úmit Shaıahmetova quttyqtap, jobanyń aýyl jastaryn qoldaýdaǵy mańyzdylyǵyn atap ótti.
«Sport tek densaýlyqtyń kepili emes, sondaı-aq bolashaq chempıondardy tárbıeleıtin orta. Biz aýyldyq jerlerde sportty damyta otyryp, ulttyń bolashaǵyna ınvestıııa salamyz», – dedi Úmit Shaıahmetova.
Sharaǵa Olımpıada chempıondary Ermahan Ibraımov pen Nurbaqyt Teńizbaev qurmetti qonaq retinde qatysty. Olar jas sportshylarmen kezdesip, óz tájirıbelerimen bólisti.
Merekelik atmosferany kóterý maqsatynda patrıottyq ánder shyrqalyp, ulttyq bıler oryndaldy. Sonymen qatar, Qajymuqan Muńaıtpasulynyń ómirine arnalǵan qoıylym jas sportshylarǵa rýh berip, erekshe sezim syılady.
«AUYL SPORT» jobasy – «Halyq» qorynyń balalar men jasóspirimderdi qoldaýǵa jáne aýyldyq sportty damytýǵa baǵyttalǵan mańyzdy bastamalarynyń biri. Qor buǵan deıin osy salaǵa 500 mıllıon teńgege jýyq qarjy bólip, 120-dan astam áleýmettik jobany júzege asyrdy.
