بۇكىل الەم كوز تىككەن تورتجىلدىقتىڭ باستى دوداسى 11 تامىزدان 12 تامىزعا قاراعان ءتۇنى رەسمي تۇردە اياقتالدى. جابىلۋ سالتاناتى «ستاد دە فرانس» ستاديونىندا ءوتتى.
2024 جىلعى پاريج وليمپياداسى ءوزىنىڭ جارقىن جەڭىستەرىمەن، سپورتتىق جەتىستىكتەرىمەن عانا ەمەس، سونىمەن قاتار جۇرتشىلىقتىڭ تاڭداي قاقتىرعان بىرقاتار ماڭىزدى ساتتەرىمەن ەسىندە قالدى.
داۋعا ۇلاسقان اشىلۋ سالتاناتى
پاريجدەگى ءحححىىى جازعى وليمپيادا ويىندارىنىڭ اشىلۋ سالتاناتى 26 شىلدەدە ءوتتى. ءتورت ساعاتقا سوزىلعان سالتاناتتى جيىن العاش رەت اشىق اسپان استىندا سەنا وزەنىنىڭ جانىندا ۇيىمداستىرىلدى. 206 ەلدەن جينالعان سپورتشىلار قۇراماسى بارج شەرۋىنە قاتىسىپ، ايگىلى جۇلدىزدار سەلين ديون مەن لەدي گاگانىڭ ونەرىن تاماشالادى. الايدا اشىلۋ سالتاناتى لەوناردو دا ءۆينچيدىڭ «سوڭعى كەشكى اس» كارتيناسىنا جاسالعان «ءساتسىز» پارودياسىمەن كورەرمەندەردىڭ ەسىندە قالدى.
كارتيناداعى كورىنىستى ۇقساتۋعا تىرىسقان سۋرەتشىلەر ۇستەلدىڭ ورنىنا پوديۋمدى بەينەلەگەن. سونداي-اق، درەگ-سۋرەتشى فيليپپ كەترين كوك گرەك قۇدايى ديونيس كەيپىندە ونەر كورسەتتى. ول ءوز انىندە زورلىق-زومبىلىقسىز، بەيبىت ومىرگە شاقىردى. الايدا اتالمىش قويىلىم كوپشىلىكتىڭ سىنىنا ۇشىراپ، جۇرت ونى حريستياندىق قۇندىلىقتاردى قورلاۋ رەتىندە قابىلدادى.
پاريج وليمپياداسىنىڭ ۇيىمداستىرۋ كوميتەتى سالتاناتتى شاراداعى داۋ تۋدىرعان بۇل قويىلىم ءۇشىن كەشىرىم سۇرادى.
«ەڭبەكتەگەن بالادان، ەڭكەيگەن قارتقا دەيىن»
پاريجدەگى جازعى وليمپيادا ويىندارىنىڭ ەڭ جاس قاتىسۋشىسى 11 جاستاعى قىتايلىق چجەن حاوحاو بولدى. تامىزدا 12 جاسقا تولاتىن جەتكىنشەك سكەيتبورت تۋرنيرىنەن سىنعا ءتۇستى. چجەن جازعى وليمپيادا ىرىكتەۋىندە 51,73 ۇپاي جيناپ، 44 قاتىسۋشى ىشىندە 20-ورىن العان.
ال وليمپياداداعى ەڭ ەگدە سپورتشىنىڭ جاسى – 65-تە. ول - يسپانيالىق شاباندوز حۋان انتونيو حيمەنەس. بۇعان دەيىن ول 2004 جىلى افيناداعى وليمپيادادا كۇمىس العان بولاتىن. بۇل جولى يسپانيا وكىلى نەبارى 13-ورىنعا تابان تىرەدى.
جاڭا ومىرگە قادام
پاريج – ماحاببات قالاسى. بيىل وليمپيادادا سپورتتىق جەڭىستەرمەن قاتار جاڭا ومىرگە قادام باسقان ماحاببات كورىنىستەرىنە دە كۋا بولدىق. فرانتسيالىق جەڭىلاتلەت ارۋ اليس فينو عاشىقتار قالاسىندا ءوزىنىڭ توعىز جىل جۇرگەن سۇيىكتىسىنە ءسوز سالدى. ول "مارە سىزىعىن كەسكەننەن كەيىن كوپ كۇتپەي ءوزىم ۇسىنىس جاسايىن دەپ شەشتىم" دەيدى. ول مارەگە ءتورتىنشى بولىپ كەلدى. ول ءوز سۇحباتىندا "توعىز مينۋتتىڭ ىشىندە جۇگىرىپ شىقسام ءسوز سالامىن دەدىم. توعىز دەگەن ماعان ساتتىلىك اكەلەتىن سان. ءبىز توعىز جىلدان بەرى بىرگەمىز. "پاريجدەگى ماحاببات" دەپ جازىلعان ىلگەكتى سىيلادىم", – دەدى سپورتشى.
توكيو وليمپياداسىنىڭ كۇمىس جۇلدەگەرى، قىتاي سپورتشىسى ليۋ يۋيچەن دە پاريجدەگى وليمپيادانىڭ التىن مەدالىن يەلەنگەن قىتاي بادمينتونشىسى حۋان ياتسيۋنعا تىزەرلەپ تۇرىپ، ۇسىنىس جاسادى.
«تۇرىك كيللەرى» مەن «دورامالىق ارۋ»
تۇرىك مەرگەنى يۋسۋف ديكەچتىڭ وليمپيادا ويىندارىنداعى ەرەكشە ونەر كورسەتۋى الەۋمەتتىك جەلىدە ۇلكەن تانىمالدىلىققا يە بولدى. ەشقانداي دا ارنايى قۇرىلعىلار پايدالانباي نىسانا كوزدەۋدە باق سىناپ، كۇمىس مەدال يەلەنگەن ديكەچتى كوپشىلىك «تۇرىك كيللەرى» دەپ اتاپ كەتتى.
كارىس مەرگەنى كيم ە دجي پنەۆماتيكالىق تاپانشادان 10 مەتردەن نىسانا كوزدەپ، كۇمىس جۇلدەگە قول جەتكىزىپ، كورەرمەندى ءسۇيسىندىردى. كوپشىلىكتى قىزدىڭ «قىلىقتىلىعى» تاڭ قالدىردى. كيم ە ءدجيدى جەلى قولدانۋشىلار «دورامالىق ارۋ» دەپ اتاپ، وعان «كۇلىمسىرەگەن ءولتىرۋشى» دەگەن لاقاپ ات قويدى. ال يلون ماسك ءتىپتى كيمنىڭ مىندەتتى تۇردە ەكشن فيلمىندە ويناۋى كەرەك ەكەنىن ايتتى.
ايەلدەر بوكسىنداعى «ەرلەر»
الجيرلىك بوكسشى يمان حەليف يتاليالىق سپورتشى اندجەلا كارينيمەن بولعان جەكپە-جەگىنەن سوڭ جۇرت سىنىنا ۇشىرادى. سىرتقى كەلبەتىنە قاراپ جۇرت حەليفتى ترانسگەندەر دەپ اتاپ، ايەلدەر بوكسىنداعى ادىلەتسىزدىك تۋرالى جار سالدى.
داۋعا اينالعان قاۋەسەتتەن كەيىن ونىڭ وتباسى قىزدارىنىڭ كىشكەنتاي كەزىندەگى فوتولارىن جۇكتەپ، كوپشىلىكتى جالعان اقپاراتقا سەنبەۋگە شاقىردى. ال يمان حەليف 66 كەلىگە دەيىنگى سالماقتا وليمپيادالىق ءتۋرنيردىڭ فينالدىق كەزدەسۋىندە قىتاي حالىق رەسپۋبليكاسىنىڭ وكىلى يان ءليۋدى جەڭىپ، التىن مەدالدى جەڭىپ الدى.
بوكستان 57 كەلىگە دەيىنگى سالماقتا التىن مەدال العان nايۆاندىق سپورتشى لين يۋتين دە گەندەرلىك جانجالدىڭ قۇربانى بولدى.
بۇعان دەيىن يمان حەليف پەن لين يۋتين ەكى رەت گەندەرلىك تەستىلەۋدەن وتپەگەندىكتەن ىستامبۇل مەن نيۋ-دەليدە وتكەن الەم چەمپيوناتتارىنا قاتىسۋدان شەتتەتىلگەن بولاتىن، ونىڭ ەگجەي-تەگجەيلەرى ءالى اشىلماعان.
جۇكتى سپورتشىلار
ەگيپەتتىك سەمسەرلەسۋشى نادا حافەز قۇرساعىنداعى جەتى ايلىق بالاسىمەن وليمپياداعا قاتىسىپ، 1/8 فينالعا دەيىن جەتتى. ءۇش مارتە وليمپيادا ويىندارىنا قاتىسقان جاس انا وسى جولعىنىڭ ءجونى بولەك دەيدى. ول ءوز سۇحباتىندا «ەكى ادام سەمسەرلەسكەنىمەن، ءۇش ادام سايىسقا ءتۇستى» -دەيدى.
سونىمەن قاتار، ساداق اتۋدان سىنعا تۇسكەن ازەربايجاندىق مەرگەن يايلاگيۋل رامازانوۆانىڭ دا قۇرساعىندا جەتى ايلىق بالاسى بولعان. ول ءوزىن قولداپ جاتقان جانكۇيەرلەرگە العىسىن ءبىلدىردى. ول اياعى اۋىر بولىپ ءجۇرىپ وليمپياداعا دايىندالۋ وڭاي بولماعانىن جانە ءوزىنىڭ جارىستاعى ناتيجەسىنە كوڭىلى تولماعانىن ايتتى.
تاريحي جەڭىستەر
كۋبالىق بالۋان ميجاين لوپەس نۋنەس پاريج ويىندارىنىڭ فينالىندا ياسماني اكوستانى وڭاي جەڭىپ (6:0) بەس دۇركىن وليمپيادا چەمپيونى اتانىپ، تاريحي مانسابىن ءتامامدادى. بيىلعا وليمپياداداعى جەڭىسىنەن سوڭ نۋنەس بوز كىلەمگە اياق كيىمىن شەشىپ، جۇرتشىلىقتىڭ قۇرمەتىنە بولەندى.
سەربيالىق اتاقتى تەننيسشى، «ۇلكەن شلەم» ءتۋرنيرىنىڭ 24 دۇركىن جەڭىمپازى 37 جاستاعى نوۆاك دجوكوۆيچ بيىلعى وليمپيادادا التىن مەدال يەلەنىپ، تاريحتا ءوز ەسىمىن التىن ارىپپەن قالدىردى. دجوكوۆيچ وليمپيادا ويىندارىنا بەس مارتە قاتىسىپ، اقىرى پاريجدە دەگەنىنە جەتىپ، چەمپيون اتاندى.
دينا ليتپين
«ادىرنا» ۇلتتىق پورتالى
