Elımızde energiia tapşylyǧy baiqalady. Ol üşın atom energiiasyn jüzege asyru maŋyzdy, dep habarlaidy "Adyrna" ūlttyq portaly.
Şveisariialyq iadrolyq energetika injenerı Luka Tagliapietra qazaqstandyq BAQ ökılderımen onlain kezdesu ötkızıp, sūhbat berdı.
Mamannyŋ sözınşe, energiianyŋ jaŋa közınen qorqudyŋ qajetı joq.
"Iаdrolyq reaktorlarda tuyndauy mümkın kez kelgen mäselenı rettei alady. Qauıpsızdık şaralarynyŋ tūrǧyndarǧa, qorşaǧan ortaǧa eşqandai ziiandy yqpaly joq. Adamdardy radiasiia, radioaktivtı zattardyŋ auaǧa tarauy tärızdı qauıpter alaŋdatady. Alaida būl zattar tek atom elektr stansiiasynyŋ ışınde bolady, syrtqa şyqpaidy. Odan qauıp joq. Al kezdeisoq taraityn jaǧdai bola qalsa, jüie özdıgınen avtomatty türde jabylady. Mūndai qauıptı jaǧdailar öte sirek bolǧanyn atap ötkım keledı", - dedı maman.
Odan bölek, BAQ ökılderınıŋ AES saludyŋ auaǧa ziiany turaly sūraǧyna da jauap berıldı.
"Atom elektr stansiialary kömırqyşqyl gazy, ılespe gazdar tärızdı auany lastaityn qaldyqtardy şyǧarmaidy. Ekologiialyq jaǧynan tiımdı. Älem kömırqyşqyl gazynyŋ mölşerın azaituǧa tyrysyp jatyr. Būl rette atom elektr stansiialarynyŋ maŋyzy zor. İä, älemde halyq sany ösıp jatyr. Bızge energiia qajet. Būl oraida eldı jetkılıktı quatpen qamtamasyz etu üşın qauıpsız dep tanylǧan jaŋartylatyn energiia közderımen qosa, atom energiiasyn paidalanu maŋyzdy. Būl är memlekettıŋ aldynda tūrǧan maqsat", - deidı Luka Tagliapietra.
Ūqsas jaŋalyqtar
