ەلىمىزدە ەنەرگيا تاپشىلىعى بايقالادى. ول ءۇشىن اتوم ەنەرگياسىن جۇزەگە اسىرۋ ماڭىزدى، دەپ حابارلايدى "ادىرنا" ۇلتتىق پورتالى.
شۆەيتساريالىق يادرولىق ەنەرگەتيكا ينجەنەرى لۋكا تاگلياپيەترا قازاقستاندىق باق وكىلدەرىمەن ونلاين كەزدەسۋ وتكىزىپ، سۇحبات بەردى.
ماماننىڭ سوزىنشە، ەنەرگيانىڭ جاڭا كوزىنەن قورقۋدىڭ قاجەتى جوق.
"يادرولىق رەاكتورلاردا تۋىنداۋى مۇمكىن كەز كەلگەن ماسەلەنى رەتتەي الادى. قاۋىپسىزدىك شارالارىنىڭ تۇرعىندارعا، قورشاعان ورتاعا ەشقانداي زياندى ىقپالى جوق. ادامداردى رادياتسيا، راديواكتيۆتى زاتتاردىڭ اۋاعا تاراۋى ءتارىزدى قاۋىپتەر الاڭداتادى. الايدا بۇل زاتتار تەك اتوم ەلەكتر ستانتسياسىنىڭ ىشىندە بولادى، سىرتقا شىقپايدى. ودان قاۋىپ جوق. ال كەزدەيسوق تارايتىن جاعداي بولا قالسا، جۇيە وزدىگىنەن اۆتوماتتى تۇردە جابىلادى. مۇنداي قاۋىپتى جاعدايلار وتە سيرەك بولعانىن اتاپ وتكىم كەلەدى", - دەدى مامان.
ودان بولەك، باق وكىلدەرىنىڭ اەس سالۋدىڭ اۋاعا زيانى تۋرالى سۇراعىنا دا جاۋاپ بەرىلدى.
"اتوم ەلەكتر ستانتسيالارى كومىرقىشقىل گازى، ىلەسپە گازدار ءتارىزدى اۋانى لاستايتىن قالدىقتاردى شىعارمايدى. ەكولوگيالىق جاعىنان ءتيىمدى. الەم كومىرقىشقىل گازىنىڭ مولشەرىن ازايتۋعا تىرىسىپ جاتىر. بۇل رەتتە اتوم ەلەكتر ستانتسيالارىنىڭ ماڭىزى زور. ءيا، الەمدە حالىق سانى ءوسىپ جاتىر. بىزگە ەنەرگيا قاجەت. بۇل ورايدا ەلدى جەتكىلىكتى قۋاتپەن قامتاماسىز ەتۋ ءۇشىن قاۋىپسىز دەپ تانىلعان جاڭارتىلاتىن ەنەرگيا كوزدەرىمەن قوسا، اتوم ەنەرگياسىن پايدالانۋ ماڭىزدى. بۇل ءار مەملەكەتتىڭ الدىندا تۇرعان ماقسات", - دەيدى لۋكا تاگلياپيەترا.
