Batys Qazaqstan oblysynyń Bókeı ordasy, Jánibek aýdandarynda, Jańaqala men Kaztalovtyń jekelegen aýyldarynda jergilikti aýqymdaǵy tótenshe jaǵdaı jarııalandy. Bul týraly BQO aýyl sharýashylyǵy basqarmasynyń basshysy Jasulan Halıýllınniń Kazinform tilshisine málimdedi, dep habarlaıdy “Adyrna” ulttyq portaly.
Jasulan Halıýllınniń málimetinshe, bıylǵy jyly kóktemgi kúnniń salqyndyǵy jáne kıik sanynyń shamadan tys artýy saldarynan Bókeı ordasy men Jánibek aýdandarynda qajetti kólemde mal azyǵyn daıyndaýda qıyndyq týyndady.
Sonymen qatar, bul aýdandarda shóptiń ónimdiligi ádettegiden tómen bolyp, ortasha ónimdilik gektaryna 1,9-1,8 entnerden aspaı otyr.
«Mundaı jaǵdaı Bókeı ordasy, Jánibekpen shekaralas jatqan Jańaqala aýdanynyń Jańajol, Jańaqazan, Kópjasar, Másteksaı, Kaztalovtyń Tereńkól, Kaztalov, Bostandyq jáne Kókterek aýyldyq okrýgterinde qalyptasty. Osyǵan oraı ońtústik aýdan ákimdikterimen tabıǵı sıpattaǵy tótenshe jaǵdaı jarııalandy. Atalǵan aýdandar aýmaǵynda gıdrometeologııalyq qyzmet rastaǵan qalyptan tys aýa raıy jaǵdaılarynyń oryn alýy qoldanystaǵy mal sharýashylyǵyn sýbsıdııalaý qaǵıdalaryna sáıkes agroqurylymdarǵa mal azyǵyna jumsalǵan shyǵyndar qunyn arzandatýdy sýbsıdııalaý múmkindigi bar», deıdi J.Halıýllın.
Eseptemeler boıynsha 4 aýdannyń 110 myń bas sıyryn, 125,9 myń bas qoı jáne 44,2 myń bas jylqy analyǵyn qamtý josparlanýda.
Qajetti qarajat kólemi — 3 263,1 mln teńge. Tıisti qarajat oblystyq bıýdjettik komıssııada maquldandy.
Agroqurylymdardy sýbsıdııalaýdy tamyz aıynan qaldyrmaı bastaý kózdelýde.
«Budan bólek jeke qosalqy sharýashylyqtardy mal azyǵymen qamtý asa mańyzdy. Bul maqsatta jeke qosalqy sharýashylyqtardyń mal azyǵyna qajettiligin tasymaldaý shyǵyndaryn óteý arqyly uıymdastyrý josparlanýda. Atalǵan aýdandarǵa jeke qosalqy sharýashylyqtaryn qamtý úshin barlyǵy 66 myń tonna mal azyǵyn tasymaldaý qajet. Mal azyǵymen tolyq qamtý úshin 1 048,4 mln teńge qarajat esepteldi»,- deıdi J.Halıýllın.
Onyń málimdeýinshe, Bókeı ordasy men Jánibek pishendi ózge jerlerden, al Kaztalov pen Jańaqala aýdannyń óz ishinen tasymaldamaqshy.
Ońtústik aýdandardy mal azyǵymen qamtamasyz etý úshin árbir aýdanǵa 10 myń rýlonnan shóp qoryn daıyndaý tapsyrmasy berildi.
Sondaı-aq oblystaǵy orman sharýashylyǵy mekemelerine atalǵan aýdandardyń jeke qosalqy sharýashylyqtaryn mal azyǵymen qamtamasyz etý úshin 1 myń rýlonnan pishen daıarlaý tapsyryldy.
«Ońtústik aýdandarda qystaq kezinde shyǵynnyń aldyn alýdyń taǵy bir joly — mal basyn azaıtý kerek. Ol úshin iri et óńdeý kesheni „Kýbleı“ JShS basshylyǵymen kásiporynnyń ádettegi mal qabyldaýdy ýaqytynan eki aı buryn bastap, birinshi kezekte ońtústik aýdandar turǵyndarynan mal qabyldaý boıynsha kelissóz júrgizildi. Bul jumys 24 maýsymnan bastalyp, kúni búginge deıin 1 567 iri qara, 4 435 qoı-eshki jáne 105 bas jylqy soıyldy», dedi basqarma basshysy.
Oblys ákiminiń orynbasary Qalııar Aıtmuhambetovtiń tóraǵalyǵymen ońtústik tórt aýdandy mal azyǵymen qamtamasyz etý boıynsha keńes ótkizilip, quzyrly basqarmalarǵa, aýdan ákimdikterine tapsyrmalar berildi.
Tapsyrmalar mal azyǵyn daıyndaýdy uıymdastyrý boıynsha oblystyq shtab otyrystarynda apta saıyn qaralyp, únemi baqylaýda bolady.
Bókeı ordasy aýdany Han ordasy aýylynyń turǵyny, «Bereke» sharýa qojalyǵynyń basshysy Erkin Jabasov jaǵdaıdyń bıyl óte qıyn ekendigin jetkizdi.
«Jaıylys óz aldyna, shabyndyqtardaǵy shóptiń shyǵymy óte nashar bolyp tur. Buryn bir aıda asyqpaı shapqannyń ózinde 2 myń rýlon daıyndaıtyn bolsaq, qazir ýaqytpen sanaspaı shóp bar-aý degen jerlerdi tyrnalaǵanda, 1 myń rýlonǵa jetkize almaı otyrmyz. Aýdan boıynsha mal azyǵyn daıyndaý men mal basyn esepteýde qatelikter bar. Han ordasynda turatyn, 15-20 bas maldan ustap otyrǵan aýyl turǵyndarynyń aýlasyna shóp múldem túsken joq. Birneshe aı boıy jańbyr tambady. Bókeı ordasynda tek 23 shildeden 24-ine qaraǵan túni jańbyr jaýyp, shóp qaıta kókteı bastady. Kıiktiń zardaby da orasan bolyp tur. Osyndaı sebepterden maldyń kúıi nasharlap ketti. Al „Kýbleı“ kásipornyna tapsyraıyq desek, onyń qoıatyn baǵasy tómen. Ótken qysta aýdanda mal kóptep qyryldy. Sol jaǵdaı qaıtalanbas úshin shuǵyl sharalar alý qajet-aq», dedi E.Jabasov.
