باتىس قازاقستان وبلىسىنىڭ بوكەي ورداسى، جانىبەك اۋداندارىندا، جاڭاقالا مەن كازتالوۆتىڭ جەكەلەگەن اۋىلدارىندا جەرگىلىكتى اۋقىمداعى توتەنشە جاعداي جاريالاندى. بۇل تۋرالى بقو اۋىل شارۋاشىلىعى باسقارماسىنىڭ باسشىسى جاسۇلان ءحاليۋلليننىڭ Kazinform تىلشىسىنە مالىمدەدى، دەپ حابارلايدى “ادىرنا” ۇلتتىق پورتالى.
جاسۇلان ءحاليۋلليننىڭ مالىمەتىنشە، بيىلعى جىلى كوكتەمگى كۇننىڭ سالقىندىعى جانە كيىك سانىنىڭ شامادان تىس ارتۋى سالدارىنان بوكەي ورداسى مەن جانىبەك اۋداندارىندا قاجەتتى كولەمدە مال ازىعىن دايىنداۋدا قيىندىق تۋىندادى.
سونىمەن قاتار، بۇل اۋدانداردا ءشوپتىڭ ونىمدىلىگى ادەتتەگىدەن تومەن بولىپ، ورتاشا ونىمدىلىك گەكتارىنا 1,9-1,8 تسەنتنەردەن اسپاي وتىر.
«مۇنداي جاعداي بوكەي ورداسى، جانىبەكپەن شەكارالاس جاتقان جاڭاقالا اۋدانىنىڭ جاڭاجول، جاڭاقازان، كوپجاسار، ماستەكساي، كازتالوۆتىڭ تەرەڭكول، كازتالوۆ، بوستاندىق جانە كوكتەرەك اۋىلدىق وكرۋگتەرىندە قالىپتاستى. وسىعان وراي وڭتۇستىك اۋدان اكىمدىكتەرىمەن تابيعي سيپاتتاعى توتەنشە جاعداي جاريالاندى. اتالعان اۋداندار اۋماعىندا گيدرومەتەولوگيالىق قىزمەت راستاعان قالىپتان تىس اۋا رايى جاعدايلارىنىڭ ورىن الۋى قولدانىستاعى مال شارۋاشىلىعىن سۋبسيديالاۋ قاعيدالارىنا سايكەس اگروقۇرىلىمدارعا مال ازىعىنا جۇمسالعان شىعىندار قۇنىن ارزانداتۋدى سۋبسيديالاۋ مۇمكىندىگى بار»، دەيدى ج.حاليۋللين.
ەسەپتەمەلەر بويىنشا 4 اۋداننىڭ 110 مىڭ باس سيىرىن، 125,9 مىڭ باس قوي جانە 44,2 مىڭ باس جىلقى انالىعىن قامتۋ جوسپارلانۋدا.
قاجەتتى قاراجات كولەمى — 3 263,1 ملن تەڭگە. ءتيىستى قاراجات وبلىستىق بيۋدجەتتىك كوميسسيادا ماقۇلداندى.
اگروقۇرىلىمداردى سۋبسيديالاۋدى تامىز ايىنان قالدىرماي باستاۋ كوزدەلۋدە.
«بۇدان بولەك جەكە قوسالقى شارۋاشىلىقتاردى مال ازىعىمەن قامتۋ اسا ماڭىزدى. بۇل ماقساتتا جەكە قوسالقى شارۋاشىلىقتاردىڭ مال ازىعىنا قاجەتتىلىگىن تاسىمالداۋ شىعىندارىن وتەۋ ارقىلى ۇيىمداستىرۋ جوسپارلانۋدا. اتالعان اۋداندارعا جەكە قوسالقى شارۋاشىلىقتارىن قامتۋ ءۇشىن بارلىعى 66 مىڭ توننا مال ازىعىن تاسىمالداۋ قاجەت. مال ازىعىمەن تولىق قامتۋ ءۇشىن 1 048,4 ملن تەڭگە قاراجات ەسەپتەلدى»،- دەيدى ج.حاليۋللين.
ونىڭ مالىمدەۋىنشە، بوكەي ورداسى مەن جانىبەك پىشەندى وزگە جەرلەردەن، ال كازتالوۆ پەن جاڭاقالا اۋداننىڭ ءوز ىشىنەن تاسىمالداماقشى.
وڭتۇستىك اۋدانداردى مال ازىعىمەن قامتاماسىز ەتۋ ءۇشىن ءاربىر اۋدانعا 10 مىڭ رۋلوننان ءشوپ قورىن دايىنداۋ تاپسىرماسى بەرىلدى.
سونداي-اق وبلىستاعى ورمان شارۋاشىلىعى مەكەمەلەرىنە اتالعان اۋدانداردىڭ جەكە قوسالقى شارۋاشىلىقتارىن مال ازىعىمەن قامتاماسىز ەتۋ ءۇشىن 1 مىڭ رۋلوننان پىشەن دايارلاۋ تاپسىرىلدى.
«وڭتۇستىك اۋدانداردا قىستاق كەزىندە شىعىننىڭ الدىن الۋدىڭ تاعى ءبىر جولى — مال باسىن ازايتۋ كەرەك. ول ۇشىن ءىرى ەت وڭدەۋ كەشەنى „كۋبلەي“ جشس باسشىلىعىمەن كاسىپورىننىڭ ادەتتەگى مال قابىلداۋدى ۋاقىتىنان ەكى اي بۇرىن باستاپ، ءبىرىنشى كەزەكتە وڭتۇستىك اۋداندار تۇرعىندارىنان مال قابىلداۋ بويىنشا كەلىسسوز جۇرگىزىلدى. بۇل جۇمىس 24 ماۋسىمنان باستالىپ، كۇنى بۇگىنگە دەيىن 1 567 ءىرى قارا، 4 435 قوي-ەشكى جانە 105 باس جىلقى سويىلدى»، دەدى باسقارما باسشىسى.
وبلىس اكىمىنىڭ ورىنباسارى قاليار ايتمۇحامبەتوۆتىڭ توراعالىعىمەن وڭتۇستىك ءتورت اۋداندى مال ازىعىمەن قامتاماسىز ەتۋ بويىنشا كەڭەس وتكىزىلىپ، قۇزىرلى باسقارمالارعا، اۋدان اكىمدىكتەرىنە تاپسىرمالار بەرىلدى.
تاپسىرمالار مال ازىعىن دايىنداۋدى ۇيىمداستىرۋ بويىنشا وبلىستىق شتاب وتىرىستارىندا اپتا سايىن قارالىپ، ۇنەمى باقىلاۋدا بولادى.
بوكەي ورداسى اۋدانى حان ورداسى اۋىلىنىڭ تۇرعىنى، «بەرەكە» شارۋا قوجالىعىنىڭ باسشىسى ەركىن جاباسوۆ جاعدايدىڭ بيىل وتە قيىن ەكەندىگىن جەتكىزدى.
«جايىلىس ءوز الدىنا، شابىندىقتارداعى ءشوپتىڭ شىعىمى وتە ناشار بولىپ تۇر. بۇرىن ءبىر ايدا اسىقپاي شاپقاننىڭ وزىندە 2 مىڭ رۋلون دايىندايتىن بولساق، قازىر ۋاقىتپەن ساناسپاي ءشوپ بار-اۋ دەگەن جەرلەردى تىرنالاعاندا، 1 مىڭ رۋلونعا جەتكىزە الماي وتىرمىز. اۋدان بويىنشا مال ازىعىن دايىنداۋ مەن مال باسىن ەسەپتەۋدە قاتەلىكتەر بار. حان ورداسىندا تۇراتىن، 15-20 باس مالدان ۇستاپ وتىرعان اۋىل تۇرعىندارىنىڭ اۋلاسىنا ءشوپ مۇلدەم تۇسكەن جوق. بىرنەشە اي بويى جاڭبىر تامبادى. بوكەي ورداسىندا تەك 23 شىلدەدەن 24-ىنە قاراعان ءتۇنى جاڭبىر جاۋىپ، ءشوپ قايتا كوكتەي باستادى. كيىكتىڭ زاردابى دا وراسان بولىپ تۇر. وسىنداي سەبەپتەردەن مالدىڭ كۇيى ناشارلاپ كەتتى. ال „كۋبلەي“ كاسىپورنىنا تاپسىرايىق دەسەك، ونىڭ قوياتىن باعاسى تومەن. وتكەن قىستا اۋداندا مال كوپتەپ قىرىلدى. سول جاعداي قايتالانباس ءۇشىن شۇعىل شارالار الۋ قاجەت-اق»، دەدى ە.جاباسوۆ.
