Şetelde käsıbın döŋgelentıp otyrǧan qazaq jasy özınıŋ būl salaǧa qalai alǧaş qadam basqanyn, basynda qandai qiyndyqtardy ötkerıp, jospary jaiyndaǧy oiymen bölısedı.
London qalasynda sūlulyq salonyn aşyp, öz ısınıŋ igılıgın körgen qazaq qyzy bügıngı taŋda otandastaryn da jūmyspen qamtyp otyr. «Adyrna» tılşısı käsıpkermen tıldesıp, şeteldegı tynys-tırşılıgı turaly sūrap bıldı.
«MAMANDYǦYM — ZAŊGER»
Änel Aqmoldaeva — London qalasynda sūlulyq salonyn aşyp, öz ısın döŋgeletıp jürgen qazaq qyzy.
- Jambyl oblysynyŋ Qūlan audanynda düniege keldım. 2synyp oqyp jürgenımde otbasymyzben Almatyǧa köşıp keldık. Osy qalada joǧary bılım alyp şyqtym. Negızgı mamandyǧym — zaŋger. Oqu bıtırgennen keiın 10 jyl boiy Işkı ıster basqarmasynda jūmys ıstedım. Keiın bankke ornalasyp, zaŋ bölımınde qyzmet atqardym. Sol kezde Diliara esımdı qūrbym kırpık jasaudy üireteiın, qosymşa tabys tabasyŋ dep ūsynys tastady. Onyŋ Almatyda jeke sūlulyq salony bar bolatyn. Şyny kerek, bastapqyda bırden bas tarttym. Sebebı bırneşe jyl boiy müldem basqa salada eŋbek etkendıkten, būndai jūmys qolymnan kelmeidı dep oiladym. Alaida qūrbym raiymnan qaitaryp, menı biuti-industriiaǧa alyp keldı. Bır taŋǧarlyǧy, barlyǧyn tez üirenıp aldym. Osylaişa alǧan bılımımdı praktikada qoldanyp, qolym bos kezde banktegı ärıptes qyzdarǧa 2 myŋ teŋgege kırpık jabystyryp berıp jürdım. Būl jūmys men üşın qosymşa tabys közı boldy ärı süiıktı hobbiıme ainaldy, - deidı ol.
LONDONDAǦY ALǦAŞQY QADAM
Uaqyt öte kele Änel basqa elderge saiahattap, älem halyqtarynyŋ tūrmysymen tanysudy ūiǧarǧan.
- Baiaǧydan Londonǧa barudy armandauşy edım. 2019 jyly turistık viza alyp, qalauymdy jüzege asyruǧa bel bailadym. Ūlybritaniia astanasynda bıraz qydyrǧannan keiın būl jerde qandai jūmys ısteuge bolady dep ızdene bastadym. Tanystarym sūlulyq salasynda bılıktı mamandardyŋ tapşy ekenın aitty. Özım de bos vakansiialardy jiı köretınmın. Solai London ortalyǧynda ornalasqan salonǧa keldım. Būǧan deiın jasaǧan jūmystarymdy körgen salon iesı bırden qyzmetkerlerınıŋ qataryna qabyldaitynyn, qūjattarmen kömektesetının jetkızdı. Süitıp bıraz uaqyt sol jerde jūmys ıstedım, -deidı käsıpker.
Qazaqstandyq aru tūtynuşylarmen kommunikasiia barysynda qiyndyqtarǧa ūşyraǧanyn atap öttı.
- Alǧaşynda aǧylşyn tılınde erkın söilei almauym qiynşylyq tuǧyzdy. Ärıptesterımnıŋ arasynda basqa ūlt ökılderı boldy. Ärtürlı mentalitet, ärtürlı közqaras. Bärımen bırden tıl tabysyp ketu oŋai emes, -dep tüsındırdı ol.
«20 ESE KÖP TÖLEIDI»
Sūlulyq salonynan mol täjıribe jinaǧan otandasymyz 5 jyldan keiın jeke biznesın jürgızemın dep şeşken.
- Qazaqstanda menıŋ qyzmetıme 5 000 teŋge tölese, būl jaqta būdan 20 ese köp aqşa beretın. Uaqyt öte kele nege Londonda sūlulyq salonyn aşpasqa degen ideia keldı. Jailap-jailap jeke sabaqtar jürgıze bastadym. Keiın päterımnıŋ bır bölmesın klient qabyldaityn orynǧa ainaldyrdym. Üş kün salonda, üş kün üide jūmys ıstedım. Tūtynuşylarym köbeie bastaǧan soŋ öz salonymdy aşuǧa bel budym. Kırpık jabystyrudan bölek, sūranys boiynşa tyrnaq boiau qyzmetın de qostym. Arnaiy mamandardy tauyp, jūmysymyzdy bastap kettık. Qazırgı taŋda lazerlık epiliasiia da jasaimyz. Alda ülken maqsattarymyz bar. Odan ärı keŋeiudı josparlap otyrmyz, - dedı aru.
Bügınde «LadyLashes» salonynda Qazaqstannan kelgen qyzdar da jūmys ıstep jatyr.
- Qazır komandamda 3 qazaq qyzy bar. Jaqynda törtınşısı qosylady. Otandastarymdy arnaiy ızdep jürıp taptym. Sebebı olarmen tıl tabysu äldeqaida jeŋıl. Odan bölek bızdıŋ qyzdarymyz şetınen talantty, barlyq ıske ikemı bar, - dep qosty Änel.
37 jastaǧy aru bolaşaqta elge oralmaq niette.
- Özge jerde jürgenıŋ bärıbır sezıledı ǧoi. Ärine, Londonda tabys äldeqaida joǧary. Dese de, Qūdai qalasa, jaǧdaiymdy rettep alǧannan soŋ Otanyma qaityp, uaqytymdy tuǧan-tuystarymmen ötkızgım keledı, - dep tüiındedı ol.
Diana Asan
«Adyrna» ūlttyq portaly
