شەتەلدە كاسىبىن دوڭگەلەنتىپ وتىرعان قازاق جاسى ءوزىنىڭ بۇل سالاعا قالاي العاش قادام باسقانىن، باسىندا قانداي قيىندىقتاردى وتكەرىپ، جوسپارى جايىنداعى ويىمەن بولىسەدى.
لوندون قالاسىندا سۇلۋلىق سالونىن اشىپ، ءوز ءىسىنءىڭ يگىلىگىن كورگەن قازاق قىزى بۇگىنگى تاڭدا وتانداستارىن دا جۇمىسپەن قامتىپ وتىر. «ادىرنا» ءتىلشىسى كاسىپكەرمەن تىلدەسىپ، شەتەلدەگى تىنىس-تىرشىلىگى تۋرالى سۇراپ ءبىلدى.
«ماماندىعىم — زاڭگەر»
انەل اقمولداەۆا — لوندون قالاسىندا سۇلۋلىق سالونىن اشىپ، ءوز ءىسىن دوڭگەلەتىپ جۇرگەن قازاق قىزى.
- جامبىل وبلىسىنىڭ قۇلان اۋدانىندا دۇنيەگە كەلدىم. 2سىنىپ وقىپ جۇرگەنىمدە وتباسىمىزبەن الماتىعا كوشىپ كەلدىك. وسى قالادا جوعارى ءبىلىم الىپ شىقتىم. نەگىزگى ماماندىعىم — زاڭگەر. وقۋ بىتىرگەننەن كەيىن 10 جىل بويى ىشكى ىستەر باسقارماسىندا جۇمىس ىستەدىم. كەيىن بانككە ورنالاسىپ، زاڭ بولىمىندە قىزمەت اتقاردىم. سول كەزدە ديليارا ەسىمدى قۇربىم كىرپىك جاساۋدى ۇيرەتەيىن، قوسىمشا تابىس تاباسىڭ دەپ ۇسىنىس تاستادى. ونىڭ الماتىدا جەكە سۇلۋلىق سالونى بار بولاتىن. شىنى كەرەك، باستاپقىدا بىردەن باس تارتتىم. سەبەبى بىرنەشە جىل بويى مۇلدەم باسقا سالادا ەڭبەك ەتكەندىكتەن، بۇنداي جۇمىس قولىمنان كەلمەيدى دەپ ويلادىم. الايدا قۇربىم رايىمنان قايتارىپ، مەنى بيۋتي-يندۋسترياعا الىپ كەلدى. ءبىر تاڭعارلىعى، بارلىعىن تەز ۇيرەنىپ الدىم. وسىلايشا العان ءبىلىمىمدى پراكتيكادا قولدانىپ، قولىم بوس كەزدە بانكتەگى ارىپتەس قىزدارعا 2 مىڭ تەڭگەگە كىرپىك جابىستىرىپ بەرىپ ءجۇردىم. بۇل جۇمىس مەن ءۇشىن قوسىمشا تابىس كوزى بولدى ءارى سۇيىكتى حوببيىمە اينالدى، - دەيدى ول.
لوندونداعى العاشقى قادام
ۋاقىت وتە كەلە انەل باسقا ەلدەرگە ساياحاتتاپ، الەم حالىقتارىنىڭ تۇرمىسىمەن تانىسۋدى ۇيعارعان.
- باياعىدان لوندونعا بارۋدى ارمانداۋشى ەدىم. 2019 جىلى تۋريستىك ۆيزا الىپ، قالاۋىمدى جۇزەگە اسىرۋعا بەل بايلادىم. ۇلىبريتانيا استاناسىندا ءبىراز قىدىرعاننان كەيىن بۇل جەردە قانداي جۇمىس ىستەۋگە بولادى دەپ ىزدەنە باستادىم. تانىستارىم سۇلۋلىق سالاسىندا بىلىكتى مامانداردىڭ تاپشى ەكەنىن ايتتى. ءوزىم دە بوس ۆاكانسيالاردى ءجيى كورەتىنمىن. سولاي لوندون ورتالىعىندا ورنالاسقان سالونعا كەلدىم. بۇعان دەيىن جاساعان جۇمىستارىمدى كورگەن سالون يەسى بىردەن قىزمەتكەرلەرىنىڭ قاتارىنا قابىلدايتىنىن، قۇجاتتارمەن كومەكتەسەتىنىن جەتكىزدى. ءسۇيتىپ ءبىراز ۋاقىت سول جەردە جۇمىس ىستەدىم، -دەيءدى كاسىپكەر.
قازاقستاندىق ارۋ تۇتىنۋشىلارمەن كوممۋنيكاتسيا بارىسىندا قيىندىقتارعا ۇشىراعانىن اتاپ ءوتتى.
- العاشىندا اعىلشىن تىلىندە ەركىن سويلەي الماۋىم قيىنشىلىق تۋعىزدى. ارىپتەستەرىمنىڭ اراسىندا باسقا ۇلت وكىلدەرى بولدى. ءارتۇرلى مەنتاليتەت، ءارتۇرلى كوزقاراس. بارىمەن ءبىردەن ءتىل تابىسىپ كەتۋ وڭاي ەمەس، -دەپ ءتۇسىندىردى ول.
«20 ەسە كوپ تولەيدى»
سۇلۋلىق سالونىنان مول تاجىريبە جيناعان وتانداسىمىز 5 جىلدان كەيىن جەكە بيزنەسىن جۇرگىزەمىن دەپ شەشكەن.
- قازاقستاندا مەنىڭ قىزمەتىمە 5 000 تەڭگە تولەسە، بۇل جاقتا بۇدان 20 ەسە كوپ اقشا بەرەتىن. ۋاقىت وتە كەلە نەگە لوندوندا سۇلۋلىق سالونىن اشپاسقا دەگەن يدەيا كەلدى. جايلاپ-جايلاپ جەكە ساباقتار جۇرگىزە باستادىم. كەيىن پاتەرىمنىڭ ءبىر بولمەسىن كليەنت قابىلدايتىن ورىنعا اينالدىردىم. ءۇش كۇن سالوندا، ءۇش كۇن ۇيدە جۇمىس ىستەدىم. تۇتىنۋشىلارىم كوبەيە باستاعان سوڭ ءوز سالونىمدى اشۋعا بەل بۋدىم. كىرپىك جابىستىرۋدان بولەك، سۇرانىس بويىنشا تىرناق بوياۋ قىزمەتىن دە قوستىم. ارنايى مامانداردى تاۋىپ، جۇمىسىمىزدى باستاپ كەتتىك. قازىرگى تاڭدا لازەرلىك ەپيلياتسيا دا جاسايمىز. الدا ۇلكەن ماقساتتارىمىز بار. ودان ءارى كەڭەيۋدى جوسپارلاپ وتىرمىز، - دەدى ارۋ.
بۇگىندە «LadyLashes» سالونىندا قازاقستاننان كەلگەن قىزدار دا جۇمىس ىستەپ جاتىر.
- قازىر كوماندامدا 3 قازاق قىزى بار. جاقىندا ءتورتىنشىسى قوسىلادى. وتانداستارىمدى ارنايى ىزدەپ ءجۇرىپ تاپتىم. سەبەبى ولارمەن ءتىل تابىسۋ الدەقايدا جەڭىل. ودان بولەك ءبىزدىڭ قىزدارىمىز شەتىنەن تالانتتى، بارلىق ىسكە يكەمى بار، - دەپ قوستى انەل.
37 جاستاعى ارۋ بولاشاقتا ەلگە ورالماق نيەتتە.
- وزگە جەردە جۇرگەنىڭ ءبارىبىر سەزىلەدى عوي. ارينە، لوندوندا تابىس الدەقايدا جوعارى. دەسە دە، قۇداي قالاسا، جاعدايىمدى رەتتەپ العاننان سوڭ وتانىما قايتىپ، ۋاقىتىمدى تۋعان-تۋىستارىممەن وتكىزگىم كەلەدى، - دەپ تۇيىندەدى ول.
ديانا اسان
«ادىرنا» ۇلتتىق پورتالى
