Mektep qabyrǧasynda jürıp daiyndyq mektebın aşqan talapty oquşy özınıŋ halyqaralyq synaqtan qalai eŋ joǧary ball jinap, jetıstıkke jetu jolyndaǧy özınıŋ täjıribesımen bölısedı.
17 jastaǧy qazaqstandyq Saia Qydyrälı halyqaralyq deŋgeidegı aǧylşyn tılı emtihanynan eŋ joǧary 9 ball jinap, älemdık rekord ornatty. Ol Qazaqstannan IELTS emtihanynan maksimaldy ūpai jinaǧan jalǧyz adam jäne älemdegı eŋ jas IELTS-sarapşy. Būǧan deiın IELTS synaǧyna qatysyp baq synaǧandardyŋ 0,5 paiyzy ǧana 9.0 ūpai nätijesıne qol jetkızgen.
14 jasynda daiyndyq mektebın aşqan jas käsıpker aldaǧy josparlarymen bölıstı.
- Aǧylşyn tılın üirenudı qaşan, qalai bastadyŋyz? Qyzyǧuşylyq qaidan paida boldy?
- Aǧylşyn tılıne degen qyzyǧuşylyǧym kışkentai kezımnen bastaldy. Däl qai jasta bastaǧanym esımde joq. Bıraq ata-anam kışkentaiymnan kıtap oquǧa, tıl üirenuge köp köŋıl böldı. Al maqsatym – özımdı şekteusız damytu boldy. Aǧylşyn – älemdık tıl, ol arqyly eŋ üzdık bılımge, resurstarǧa qol jetkızuge bolady. IELTS-tı alǧaş tapsyrǧan kezde özıme joǧary maqsat qoidym. Öitkenı būl tek emtihan ǧana emes, özıme, mümkındıkterıme degen senımnıŋ körsetkışı boldy.
- Käsıbıŋız turaly aitsaŋyz? Özıŋız oquşysyz. Komandany jinau, basqaru qiyn bolmady ma?
- Men IELTS-ke daiyndyq mektebın 14 jasymda aştym. Bastapqyda şaǧyn auditoriiamen jūmys ıstedım, keiın sūranys artyp, komanda qūru qajettılıgı tuyndady. Komandany jinau qiyn boldy. Sebebı menıŋ özıme de täjıribe kerek edı. Bıraq basty talabym – sapa. Mūǧalımderdı taŋdaǧanda olardyŋ bılım deŋgeiıne ǧana emes, oquşylarmen bailanys ornata alu qabıletıne, jauapkerşılıgıne erekşe män beremın. Şäkırtterımnıŋ basym bölıgı joǧary nätijege jetuge talpynatyndar. Sondyqtan olarǧa da, özıme de qataŋ talap qoiamyn.
- Qatelespesem, 10 synypta şetelde bılım aluǧa ūsynys tüsken eken. Nege bas tarttyŋyz?
- İä, bırneşe elden ūsynys boldy. Bıraq men öz jobamdy ärı qarai damytudy jön kördım. Qazaqstanda bılım salasyna üles qosudy, öz mektebımdı halyqaralyq deŋgeige şyǧarudy maqsat ettım. Men eŋ bastysy öz elımde talantty jastardyŋ köbırek boluyna yqpal etkım keledı.
- IELTS emtihany boiynşa älemdegı eŋ joǧarǧy körsetkışke ie boldyŋyz. Endıgı josparyŋyz qandai?
- IELTS-tıŋ eŋ joǧarǧy baly – 9.0. Būl – tek bır beles. Qazır SAT-qa daiyndalyp jatyrmyn. Sonymen qatar, özımnıŋ mektebımdı keŋeitu, jaŋa jobalar bastau oiymda bar. Men üşın eŋ maŋyzdysy – özımnıŋ jäne ainalamdaǧy adamdardyŋ ünemı damyp otyruy.
- Basqa balalar oinap jürgende, oqydyŋyz. Bärıne qoldy bır sıltep tastap ketkıŋız kelgen kezder boldy ma? Ondai küiden qalai şyǧasyz?
- Ärine, ondai kezder boldy. Kez kelgen adamda şarşau, motivasiianyŋ tüsuı bolady. Būl – qalypty jaǧdai. Bıraq menıŋ maqsatym maŋyzdy bolǧandyqtan, mūndai oilardan tez arylamyn. Ädette sportpen ainalysu, tabiǧatqa şyǧu, jaqyn adamdarymmen uaqyt ötkızu maǧan kömektesedı. Eŋ bastysy – nelıkten bastaǧanyŋdy eske tüsıru.
- Qalai oilaisyz, jalpy jetıstıkke jetkısı keletın adam qandai bolu kerek?
- Eŋ aldymen tabandy boluy kerek. Kedergılerden qoryqpaityn, ünemı özın damytatyn adam ǧana biıkke jete alady. Sonymen qatar, nätije üşın jüielı jūmys ısteu qajet. Jai ǧana motivasiia jetkılıksız – naqty jospar, äreket boluy şart.
- Bala üşın ata-ananyŋ qoldauy qanşalyqty maŋyzdy dep oilaisyz? Äsırese, 11 synyp oquşylary üşın
- Öte maŋyzdy. Qysym men talap qoiu bır bölek, al şynaiy qoldau – mülde basqa närse. 11 synyp oquşylary ülken stress jaǧdaiynda bolady. Sol sebeptı ata-ananyŋ qoldauy, senım bıldıruı olarǧa küş beredı. Eŋ bastysy – «senıŋ qolyŋnan keledı» degen sözderdı estu.
- Rekord ornattyŋyz. IELTS ortalyǧynan qandai kerı bailanys boldy?
- IELTS ortalyǧynyŋ ökılderı menıŋ nätijemdı erekşe atap öttı. Sebebı būl – Qazaqstanda öte sirek kezdesetın nätije. Menıŋ mektebımdegı özge oquşylar da joǧary nätije körsetkendıkten, ortalyqtar bızben yntymaqtastyq ornatuǧa qyzyǧuşylyq bıldırude. Bıraq men üşın basty nätije – şäkırtterımnıŋ jetıstıgı.
- Sūhbattasqanyŋyzǧa raqmet!
Merei Myrzaǧaliqyzy
«Adyrna» ūlttyq portaly
Ūqsas jaŋalyqtar
