Qazaqstan Ükımetı köktemgı su tasqyny saldaryn joiuǧa jäne zaqymdalǧan infraqūrylymdyq nysandardy qalpyna keltıruge tötenşe rezervten qosymşa 22,7 milliard teŋge böldı. Tiıstı qaulyǧa premer-ministr Oljas Bektenov qol qoidy, dep habarlaidy “Adyrna” ūlttyq portaly.
"Qarajat Aqmola, Aqtöbe, Qostanai jäne Soltüstık Qazaqstan oblystaryndmaǧy joldardy, sondai-aq köpırler men su ötkızgış qūrylymdardy qalpyna keltıruge, rekonstruksiialauǧa jäne qūrylys jūmystary üşın äkımdıkterge bölınedı", - delıngen habarlamada.
Atap aitqanda, Aqtöbe oblysynda 31 joba jüzege asyrylyp jatyr. Olardyŋ ışınde Yrǧyz – Nūra, Yrǧyz – Qūttyköl, Qūmtoǧai avtojoldaryndaǧy su ötkızgış qūbyrlardy, Oiyl auylyna aparatyn avtojoldy jöndeu, Oiyl özenındegı köpırdı qaita jaŋǧyrtu, sondai-aq Äiteke bi audany Äike auylyndaǧy köpır ötkelı qūrylysy bar.
Aqmola oblysynda Atbasar qalasyna aparatyn jol bölıgın, Atbasar – Sochinskoe avtojolyn qaita jaŋartu, Jaltyr – Makinsk avtojolyn, Qalqūtan auylyna, Jambyl jäne basqa da eldı mekenderge kıreberıs joldaryn jöndeu jūmystary jürgızıledı. Barlyǧy – 14 baǧyt.
Qostanai oblysynda qarajat 22 baǧyt boiynşa joldardy, köpırlerdı jäne 10-ǧa juyq su ötkızgış qūbyrdy jöndeuge jäne rekonstruksiialauǧa jūmsalady.
Soltüstık Qazaqstan oblysynda 10 joldy, onyŋ ışınde Kökşetau – Omby baǧytyndaǧy joldy jöndeu, sondai-aq 22 şaqyrym su ötkızgış qūbyrlarǧa ortaşa jöndeu jūmystaryn jürgızu josparlanǧan.
"Bölıngen qarajat jergılıktı atqaruşy organdarǧa tūrǧyndardyŋ qauıpsız qozǧalysyn qamtamasyz etu üşın su tasqynynan keiın bülıngen jol bölıkterın uaqytyly qalpyna keltıruge mümkındık beredı".
Aita keteiık, 2024 jylǧy 17 şıldede QR premer-ministrı Oljas Bektenov su tasqynynan keiın tūrǧyn üilerdı jäne infraqūrylymdy qalpyna keltıru mäselelerı boiynşa keŋes ötkızdı. Onyŋ barysynda Ükımet basşysy qalpyna keltıru jūmystarynyŋ qarqynyn arttyryp, tuyndaǧan mäselelerdı jedel şeşu üşın adamdar men tehnikany jūmyldyrudy tapsyrǧan bolatyn.
Ūqsas jaŋalyqtar
