Májilis depýtaty jergilikti halyqtyń topan sýǵa óz betinshe daıyndalǵanyn aıtyp, jazba jarııalady, dep habarlaıdy "Adyrna" tilshisi.
Rınat Zaıytov bul týraly óziniń jelidegi resmı paraqshasynda málim etti.
«Elimizde bolǵan tótenshe jaǵdaı bizge biraz sabaq berdi. Apattarǵa kez-kelgen ýaqytta daıyn bolý sonyń biri. Abaı oblysy Aqsýat, Kókpekti aýdandarynda úlken zaýaldardyń aldyn alǵany kórinip tur. Iıa, shyǵyn joq emes, bar. Biraq, salystyrmaly túrde kóp keselden aman. Sapar barysynda túsingenim eń birinshi jergilikti basshylyq halyqty uıymdastyra bilý kerek. Ortalyqtyń kómegi kózdi ashyp-jumǵansha kele salmaıdy. Abaı obylysyndaǵy jurt sýdyń tasýyna daıyndalǵany kórinip tur. Sonyń arqasynda birneshe aýyl irgesine kelgen topan sýdy óz kúshimen burǵan. Árıne, basy-qasynda jergilikti atqaminerler júr. Shirkin, Qazaqstannyń ár aýdanynda osyndaı uıymshyldyq bolǵanda ǵoı…", - dedi depýtat.
Rınat Zaıytov kóp jaǵdaıda jergilikti ákimshiliktiń qolyn joqtyq baılaıtynyn da jasyrmady.
"Sonda da kóregen halyq birlik tanytyp, jumyla áreket jasaǵan.
Endigi kezekte topan sýdan zardap tartqan eldiń shyǵynyn ýaqytyly ótep, kelesi bolýy múmkin apattarǵa barynsha daıyndalý kerek. AMANAT partııasy elimizdiń túpkir-túpkirine óz ókilderin jiberip, sol nátıjemen tıisti jumystardy júrgizýde. Bastysy, qandaı synaq kelse de birliktiń almaıtyn belesi joq. Osyny umytpaıyq. El aman, jurt tynysh bolǵaı», — dep jazdy ol.
