Qazır ludomaniiaǧa äielder de şaldyǧuda. Būl turaly Atyrau qalasyndaǧy ludomaniia dertıne şaldyqqandarǧa kömektesetın “Jaŋa ömır” qoldau ortalyǧyn qalauşy Nūrtas Nūrǧaliūly aityp berdı.
Nūrtas Nūrǧaliūlynyŋ oiyn qūmarlyqtan arylǧanyna 2 jyl bolǧan. 12 jyl boiy ludomaniianyŋ arbauynda qalyp, jaqyndary terıs ainalǧanyn aitady.
- Qūmar oiyndarǧa täueldılık nemese patologiialyq qūmar oiyndar - auyr psihikalyq būzylys. Būl būzylys jeke jäne käsıbi ömırde eleulı problemalarǧa, qarjylyq qiyndyqtarǧa jäne psihikalyq jäne fizikalyq densaulyqtyŋ naşarlauyna äkeledı, - deidı ol.
«ÖZ - ÖZIME EKI RET QOL JŪMSADYM...»
Öz täjıribesımen bölısken Nūrtas «Oiynnan aiyqqanyma 2 jyldan asty. Oŋaltu ortalyqtarynda boldym, bırşama mamandarmen jūmys ıstedım. Endı mıne, özım de ludomaniiaǧa şaldyqqandarǧa kömektesudemın» deidı.
- Men 12 jyl oiyn oinadym. 9 synypta bastadym. Özım futbol jaqsy körgen soŋ, futbolǧa bäs tıgıp kördım. Ökınışke qarai, alǧaşqy bäs tıguım ūtyspen bolyp, sol ūtystyŋ dämın sezgen soŋ, oiyndy jalǧastyrdym. Söistıp sol oiynym 12 jylǧa sozyldy. 12 jyl ışınde öz-özıme ekı ret qol jūmsadym, jūbaiymmen ajyrastym, dostarymmen aiyryldym, tuys aldynda abyroiym kettı. Abyroiymmen qosa, erkektık mınezım ketıp, sözımnıŋ salmaǧy qalmady. Qazaqta “tırı ölık” deidı ǧoi, däl sondai kiıpte ömır sürdım, - dep eske alady Nūrtas Nūrǧaliūly.
Nūrtas Nūrǧaliūlynyŋ aituynşa, «Jaŋa ömır» ortalyǧynyŋ aşylǧanyna 9 ai bolǧan.
- Qazırge deiın şamamen 100 adam keldı. Aiǧa bölsek, aiyna 10-ǧa juyq adamnan kelıp otyrady. Ökınışke qarai, qazır er azamattar ǧana emes, äiel adamdar da kelude. Būl qoǧamnyŋ dertıne ainalyp otyr, - deidı maman.
Onyŋ sözınen ūqqanymyz kemşılıgın özı moiyndap keletın adamdardyŋ keluı de bır quanyş.
- Bızge kelgen adamdy emdeitın siqyrly därı joq. Eŋ bırınşı oǧan ūǧym beremız. Iаǧni, oiynǧa nege kırıp kettı, nemen ainalysyp jür, odan qalai şyǧu kerek joldaryn körsetemız, - deidı Nūrtas Nūrǧaliūly.
«OINAITYN ADAM AMALYN TABADY»
Nūrtas Nūrǧaliūly taiauda qabyldanǧan «oiyn biznesı, lotereia qyzmetı, densaulyq saqtau, memlekettık eŋbek inspeksiiasy, memlekettık baqylau jäne artyq zaŋnamalyq reglamentteudı bolǧyzbau mäselelerı boiynşa özgerıster men tolyqtyrular engızu turaly» zaŋ da adamdardyŋ igılıgıne qyzmet etse eken deidı.
- Osy zaŋda jūbaiyŋsyz nesie aluǧa bolmaityny jäne özın-özı şekteu 10 jylǧa ūzartylǧany ūnady. Zaŋ bar, degenmen, ol qadaǧalau degen de boluy kerek, - deidı ol.
- Menıŋ kezımde 25 jasqa deiıngılerge oinauǧa bolmaityn edı. Ökınışke qarai, men 13 jasymda bastap oinadym, - dep salystyrady ol.
Aituynşa, oinaityn adam amalyn tabady.
- Äkesınıŋ şotymen oinaidy, bolmasa basqa memleketterdıŋ bukmekerıne kırıp oinaidy. Sondyqtan qabyldanǧan jaŋa zaŋdy qataŋ ūstanyp, qadaǧalau qajet, - deidı «Jaŋa ömır» ortalyǧynyŋ basşysy Nūrtas Nūrǧaliūly.
Atalǧan zaŋ boiynşa qūmar oiyndarǧa/bäs tıguge qatysuyna tyiym salynatyn adamdar sanatynyŋ tızımı keŋeitıldı. Endı olardyŋ qataryna Boryşkerlerdıŋ bıryŋǧai tızılımınde tūrǧan tūlǧalar qosyldy. Sonymen qatar sybailas jemqorlyqqa qarsy şekteu engızu arqyly jauapty memlekettık lauazymdy atqaratyn, memlekettık funksiialardy oryndauǧa uäkılettık berılgen adamdardyŋ, olarǧa teŋestırılgen adamdardyŋ qūmar oiyndarǧa/bäs tıguge qatysuyna şekteu qoiylady.
Dana Nūrmūhanbet
“Adyrna” ūlttyq portaly
