20 qazan kúni Adyrna ulttyq portalynda «Mańǵystaýlyqtar 5 bılbordqa 1 mln teńgeden astam qarjy jumsamaq» degen maqala jarııalanǵan edi. Sol maqalaǵa qatysty Mańǵystaý oblystyq ishki saıasat basqarmasy jaýap berdi, - dep habarlaıdy Adyrna ulttyq portaly.
Atalǵan materıalda Mańǵystaý oblysynyń Ishki saıasat basqarmasy QR Ulttyq valıýtasynyń 30-jyldyǵyn bir aı ǵana ilinip turatyn bes bılbordpen atap ótkeli otyrǵany, ol bes bılbord Aqtaý men Jańaózen qalalarynda ǵana qoıylatyny, búkil oblys tyń halqy Ulttyq valıýtanyń tarıhyn eki qalaǵa ornatylǵan bes bılbordtan uǵa qoımasy jazylǵan edi. Bizdiń joldaǵan suraqtarymyzǵa tómendegideı jaýap keldi.
Mańǵystaý oblystyq ishki saıasat basqarmasy, Sizdiń ótinishińizdi qarap, kelesini habarlaıdy.
Ózińizge belgili, Qazaqstan Respýblıkasynyń Ulttyq valıýtasynyń 30 jyldyǵy týraly jan-jaqty aqparattandyrý maqsatynda Aqtaý (4 birlik) jáne Jańaózen (1 birlik) qalalarynda bılbord/banner ornalastyrý josparlanǵan.
Bul jumystar memlekettik satyp alý proesiniń sheńberinde júrgizilýde.
Konkýrstyq rásimderdiń tehnıkalyq talaptarynda bannerdiń eskızin jasaý, basyp shyǵarý, bılbord ornalastyratyn qondyrǵyny jalǵa alý, bılbordty ornalastyrý jáne sheship alý jumystary kórsetilgen.
Osy jumystarǵa bólingen bıýdjet Aqtaý qalasy boıynsha jarnamalyq materıaldardy daıyndaý men ornalastyrýdyń ortasha somasy negizinde eseptelgen:
Bılbord qurylymyn 1 aıǵa jalǵa alý (1 birlik) - 150 myń teńge;
Bannerdegi keń formatty basyp shyǵarý (1 birlik) - 71 myń teńge;
Jarnamalyq materıaldy montajdaý/ sheship alý 3h6 m (1 birlik) – 20 myń teńge;
Eskız dızaınyn ázirleý (1 birlik) - 15 myń teńge;
Ruqsat qujattaryn resimdeý (1 birlik) – 7 myń teńge.
Bılbordtardyń sany men olardy ornalastyrý oryndaryn «QR Ulttyq Banki» respýblıkalyq memlekettik mekemesiniń Mańǵystaý fılıaly tarapynan belgilegenin atap ótken jón» delingen.
Túıindep aıtqanda, Ishki saıasat basqarmasy aqsha bólgeni bolmasa, bılbordtar máselesin sheshpeıdi eken. «QR Ulttyq Banki» respýblıkalyq memlekettik mekemesiniń Mańǵystaý fılıaly belgilegen bes bılbordty oblystyń basqa aýdandaryn alalap, eki qalaǵa bir aı merzimge ornata qoıyp, tól teńgemizdiń 30 jyldyǵyn ótkize salý durys pa?
Siz ne deısiz?
Qanat Birlikuly
Adyrna ulttyq portaly
