Almaty-Astana baǵytyndaǵy ushaqtaǵy buzaqylyǵy úshin ustalǵan ánshi Qaırat Nurtas oqıǵanyń qalaı bolǵanyn aıtyp berdi. Ánshiniń búgin soty ótip jatyr, dep habarlaıdy “Adyrna” ulttyq portaly Ulysmedia.kz saıtyna silteme jasap.
Qaırat Nurtastyń aıtýynsha, jábirlenýshimen ekeýi dos bolǵan.
«Ol ekeýmiz dos bolǵanbyz. Tórtinshi shildede toıǵa shaqyrdy. Men barýdan bas tartyp, balaǵat sózder aıttym. Al ol barmasań, aıaǵyma jyǵyl dedi. Sosyn meni basymnan alyp, birinshi bolyp urdy. Sosyn men de urdym. Biraq tártipti buzǵan joqpyn. Bul jerde jábirlenýshi – menmin. Ol birinshi bastady. Meni urǵannan keıin ǵana urdym. Jaraqatty bárimiz aldyq, eń bastysy tynysh otyrdyq qoı. Ushaqta kezdesip qalǵan kezde, meni birinshi urdy. Mende qarap turmaı, ony da bir-eki ret urdym. Bul jónindegi kinámdi tolyǵymen moıyndaımyn», — dedi Qaırat Nurtas.
Sotta Qaırat Nurtastyń týǵan inisi men anasy tóbelesti birinshi bastaǵan adamdy da jaýapqa tartý kerek dep oılaıtynyn aıtty. Gúlzıra Aıdarbekova ekeýiniń burynnan dos ekenin, dostar arasynda ondaı-ondaı bolyp turatynyn aıtyp, ekeýi bir-birin keshirýi kerek dedi.
Jábirlenýshi Asylbek Bekqaıyrov Qaırat Nurtasty Oral qalasyna dosynyń toıyna barýǵa ótinish bildirgenin jetkizdi.
«Ótinishimdi jazdym. Túngi ekide meni boqtap jazyp jiberipti. Onymen kezdese almadym, nege boqtaǵanyn túsinbedim. Ushaqta kórip, nege meni boqtaǵanyn suradym. Sózge kelip qaldyq. Bortserik meni alyp ketip bara jatqanda, Qaırat Nurtas meni urdy. Mán-jaı osylaı boldy», — dedi Bekqaıyrov.
Qaırat Nurtas alda konertteri bar ekenin aıtyp, sottan aıyppul taǵaıyndaýdy surady.
«Ekeýi dos. Bóten adam emes. Ekeýi keshirim beredi degen oıdamyn. Bul jerde bas jarylǵan esh nárse joq. Ashýlandy, jaýabyn berdi. Boldy. Shý bolmady, halyqqa zábir kórsetken joq, tynysh otyrdy», —dedi Qaırat Nurtastyń anasy Gúlzıra Aıdarbekova.
Sýdıa oqıǵa 4 shildede saǵat 20:00 shamasynda ushaq bortynda Almaty – Astana reısinde bolǵanyn, Qaırat Nurtas pen Asylbek Bekqaıyrov sózge kelip, janjaldasyp qalǵanyn, sodan keıin sottalýshy oń jaq betinen soqqy jasaǵanyn aıtty. Jábirlenýshiniń densaýlyǵyna jeńil zııan kelgen.
