Aqmola oblysynda balyq aulauǧa şekteuler engızıldı

Köktemnıŋ keluımen Aqmola jäne Soltüstık Qazaqstan oblystarynyŋ su aidyndary erekşe rejimge köşedı – balyqtardyŋ uyldyryq şaşu kezeŋı bastalady. Būl uaqytta balyqtar uyldyryq şaşyp, kez kelgen adam aralasuy ekojüiege eleulı ziian keltıruı mümkın. Osyǧan bailanysty öŋırde balyq aulauǧa mausymdyq tyiymdar küşıne endı. Būl turaly brifingte Esıl öŋıraralyq basseindık balyq şaruaşylyǧy inspeksiiasynyŋ Aqmola oblysy boiynşa balyq inspeksiiasy bölımınıŋ basşysy Nūrlan Tölegen mälım ettı, dep habarlaidy Öŋırlık kommunikasiialar qyzmetınen. İnspeksiia ökılı atap ötkendei, şekteuler QR Auyl şaruaşylyǧy ministrlıgınıŋ Orman şaruaşylyǧy jäne januarlar düniesı komitetınıŋ būiryǧyna säikes qoldanylady. Qūjat aldaǧy ailarda balyq aulauǧa tolyq tyiym salynatyn kezeŋder men oryndardy retteidı. Būl käsıptık jäne äuesqoi balyq aulauǧa qatysty. «Säuırdıŋ ortasynan bastap, şortan, iaz, kökserke jäne basqa da balyq türlerı, sondai-aq özen şaiandary, gammarus jäne artemiia sistalary erekşe qorǧauǧa alynady. Esıl, Nūra, Sıletı özenderınde, sondai-aq olardyŋ barlyq salalarynda jäne su qoimalarynda balyq aulauǧa jeke tyiym salynady. Būl şaralar su januarlarynyŋ türıne bailanysty ärtürlı merzımde äreket etedı, bıraq olardyŋ basty maqsaty – köbeiu men populiasiiany qalpyna keltıruge qauıpsız jaǧdai jasau», – dep habarlady balyq inspeksiiasy bölımınıŋ basşysy. Nūrlan Oljabaiūly «Nerest» aksiiasy jyl saiyn ötkızılıp, tek su aidyndarynda baqylaudy qamtamasyz etudı ǧana emes, sonymen qatar azamattardyŋ tabiǧatty saqtau mäselelerıne nazaryn audarudy maqsat etedı. Onyŋ aituynşa, balyq resurstaryn qorǧau – tek inspektorlardyŋ mındetı emes, ärbır tūrǧynnyŋ jauapkerşılıgı. Spiker kez kelgen zaŋ būzuşylyqtar, zaŋsyz balyq aulau nemese tırşılık etu ortasyn joiu äkımşılık, al keibır jaǧdailarda qylmystyq jauapkerşılıkke äkeletının atap öttı. İnspeksiia tūrǧyndarǧa mūqiiat boluǧa, belgılengen erejelerdı saqtauǧa jäne brakonerlıkke jol bermeuge şaqyrady. Tyiym salynǧan merzımder men oryndar turaly tolyǧyraq aqparatty adilet.zan.kz saitynan aluǧa bolady. Eger sız zaŋsyz balyq aulaudyŋ kuäsı bolsaŋyz, bei-jai qalmaŋyz. Zaŋ būzuşylyqtar turaly kelesı jedel jelı nömırlerı arqyly habarlauǧa bolady: Aqmola oblysy – 8 (7162) 31-00-04, Soltüstık Qazaqstan oblysy – 8 (7152) 36-10-45 jäne 8 (705) 653-35-25.