30 qarasha kúni Adyrna ulttyq portalynda «Astrahandaǵy Astrahanka Aıaz ata men Aqshaqarǵa 1 mln 666 myń teńge bóldi» degen materıal jarııalanǵan edi. Atalǵan maqalaǵa qatysty Aqmola oblysy boıynsha ishki memlekettik aýdıt departamenti jaýap berdi, - dep habarlaıdy Adyrna ulttyq portalynyń tilshisi.
Astrahan aýyly Aqmola oblysyndaǵy Astrahan aýdanynyń ortalyǵy sanalady. Halqynyń sany 6 myń adamnan sál asady. Aýylda 2 jalpy bilim beretin jáne mýzyka mektebi, 5 balabaqsha, kásiptik-tehnıkalyq ýchılıe, mádenı-sport kesheni, mádenıet úıi, kınoteatr, 7 kitaphana, 3 emdeý-saýyqtyrý mekemesi, tarıhı-ólketaný murajaıy, qonaq úıi, t.b. bar. Iaǵnı, portalymyz bar bolǵany 6 myń turǵyny bar aýyldyń jańa jyldyq músinderge 1 mln 666 myń teńge bólgenin synaǵan edi. Sonymen qatar, tilshimiz Aqmola oblysynyń memlekettik satyp alý jáne kommýnaldyq menshik basqarmasyna:
«1. Aýdan ortalyǵy sanalatyn aýyldyq ákimdik qardan jasalatyn bar bolǵany 8 músinge 1 666 964 teńge qarjy bólýi qanshalyqty aqylǵa sıymdy? Bul bıýdjet qarjysyn ońdy-soldy shashý emes pe?
2. Astrahandyq sheneýnikterdiń alda kele jatqan táýelsizdik merekesin attap ótip, jańa jylǵa daıyndala bastaýynyń astarynda ne jatyr?» degen saýal joldaǵan bolatyn.
Bizdiń Aqmola oblysynyń memlekettik satyp alý jáne kommýnaldyq menshik basqarmasyna joldaǵan saýalymyzǵa "Qazaqstan Respýblıkasy Qarjy mınıstrligi Ishki memlekettik aýdıt komıtetiniń Aqmola oblysy boıynsha ishki memlekettik aýdıt departamenti" RMM (budan ári - Departament) jaýap beripti:
«Aqmola oblysy Astrahan aýdany Astrahan aýylynyń ortalyq alańynda Jańa jyldyq qalashyqty jaılastyrý" Memlekettik satyp alý boıynsha QR Memlekettik veb-portalyn zerdeleýmen Departament joǵaryda kórsetilgen satyp alý tásilin: «baǵa usynystaryn suratý» júzege asyrǵanyn anyqtady.
«Astrahan aýyldyq okrýgi ákiminiń apparaty» memlekettik mekemesi (budan ári – uıymdastyrýshy, Tapsyrys berýshi) jáne «Jaqsy aýdanynyń Jaqsy aýyly ákiminiń apparaty» memlekettik mekemesi (budan ári – uıymdastyrýshy, Tapsyrys berýshi) uıymdastyrýshy jáne Tapsyrys berýshi bolyp tabylady.
№11083997-1, №11136062-1 Memlekettik satyp alýlar boıynsha Departament, Qazaqstan Respýblıkasynyń Memlekettik satyp alý týraly zańnamasyn buzǵany anyqtalǵan joq.
Sizdiń suraýyńyzda kórsetilgen basqa máselelerge qatysty joǵaryda atalǵan satyp alýdy uıymdastyrýshyǵa/Tapsyrys berýshige júginý qajet ekenin habarlaımyz. Óıtkeni, suraýyńyzda baıandalǵan máseleler Departamenttiń quzyretine kirmeıdi».
Syrǵyma jaýapta biz kótergen másele departamenttiń quziretine kirmeıtinin aıtypty. Bizdiń Aqmola oblysynyń memlekettik satyp alý jáne kommýnaldyq menshik basqarmasyna jibergen hatymyz Aqmola oblysy boıynsha ishki memlekettik aýdıt departamentine qalaı barǵany túsiniksiz. Sonda da aqyry jaýap bergen eken, bıýdjet qarjysyn bólip otyrǵan organ men tapsyrys berýshige suraý salyp, hatty solarǵa baǵyttaýǵa bolmas pa edi?
Qanat Birlikuly
Adyrna ulttyq portaly
