Halyqaralyq Túrki akademııasy jáne Qazaqstan halqy Assambleıasynyń uıymdastyrýymen «Bekem baýyrlastyq baılanystar: Manastan Abaıǵa deıin» atty alqaly jıyn ótti.
Akademııa taratqan aqparatta: "Basqosýǵa Halyqaralyq Túrki akademııasynyń prezıdenti Darhan Qydyráli, Qazaqstan halqy Assambleıasy Tóraǵasynyń orynbasary ‒ QR Prezıdenti ákimshiliginiń QHA hatshylyǵynyń meńgerýshisi Janseıit Túımebaev, Qyrǵyz Respýblıkasynyń Qazaqstandaǵy Elshisi Jeenbek Kýlýbaev, QHA depýtattyq tobynyń jetekshisi, Qazaqstan Respýblıkasy Parlamenti Májilisiniń depýtaty Saýytbek Abdrahmanov, sonymen qatar, memleket jáne qoǵam qaıratkerleri, ǵalymdar, zııaly qaýym men etnomádenı birlestik ókilderi qatysty", delingen.
Shara barysynda Halyqaralyq Túrki akademııasy daıyndaǵan «Manas» eposynyń qazaq tilindegi nusqasy jáne Abaı Qunanbaıuly shyǵarmalarynyń qyrǵyz tilindegi akademııalyq basylymynyń tusaýkeseri ótti. Sonymen qatar, belgili manasshy, aqyn Baıanǵalı Álimjanovqa túrki dúnıesiniń ádebı muralaryn jınaqtap, zertteýge qosqan úlesi úshin Halyqaralyq Túrki akademııasynyń Alǵys haty tabys etildi.
Aıta ketý kerek, bıyl Baký qalasynda ótken Túrki akademııasynyń Ǵylymı keńesinde 2020 jylǵy Túrki áleminiń ataýly datalary qatarynda Manas dastanynyń 1125 jyldyǵy men Abaı Qunanbaıulynyń 175 jyldyǵyn atap ótý bekitilgen edi. Manas eposyna arnalǵan is-sharalar jyl aıaǵyna deıin jalǵasa beretin bolady.
"Adyrna" ulttyq portaly
