El erteńi – bilimdi jastardyń qolynda. Qazaq halqynyń: «Bilekti birdi jeńedi, bilimdi myńdy jeńedi» degen naqyl sózi bar. Rasynda da, bilim bárinen bıik ári artyq.
HHI ǵasyrda bilimin damyta almaǵan el naǵyz tyǵyryqqa tirelip, kemeldenýden qur qalady. Sol sebepti de elimizdegi bilim berý salasyn qolǵa alyp, ony odan ári damytý strategııasynyń basty baǵyty da iske asýda.
Degenmen, jasyratyny joq, keıbir jastar úshin «dinı rásimniń» oryndalýy bilimnen de asa mańyzdy bolyp barady. Mektepte bilim alýshylardyń keıbiri ár juma saıyn mektepke barýdan bas tartyp, meshitke asyǵatyny jıi baıqalady. Ata-analar men bilim ordalarynyń basshylary tarapynan túsindirý jumystary júrgizilgenimen másele áli de sap tıylmaǵan.
Búgingi jastar – eldiń erteńi bolǵandyqtan urpaq tárbıeleýde qatelikke urynýǵa bolmaıdy. Keleshegi kemel eldiń búgingi urpaǵy sanaly da, bilimdi bolýy shart.
Osy tusta ýnıversıtet qabyrǵasynda sabaq berip, jas mamandy tárbıelep, ǵylym men bilimdi janyna serik etken ustaz Shermat Eralyuly da eldiń erteńine alańdaýly.
- Jastardyń bilim men ǵylymǵa qyzyǵýshylyǵy qandaı?
- Ókinishke oraı, búgingi tańda Qazaqstanda ǵylymdy tańdaıtyndar óte sırek. Eger biz ǵylym men bilimge kóbirek kóńil aýdarsaq órkenıet te damıtyn edi.
- Jastar arasynda ǵylym men bilimge bet burǵandarǵa qaraǵanda dindi serik etkender kóp pe?
- Iá, solaı. Ǵylym men bilimge qaraǵanda dinge erekshe den qoıǵandar jáne sol arqyly bilim alýdan aalshaqtaıtyndar kóp.
- Qazir jastar arasynda din jolyn ustaný, dindi bilimnen de artyq qoıý áreketteri baıqalady. Bul jaǵdaıdy qalaı ózgertýge múmkindik bar? Pedagog retinde ne aıtasyz?
- Jalpy bizde ǵylym men bilim júıesin budan ári jetildirý kerek. Mamandar kóp saladan bilimi bolýy kerek dep esepteımin. Sebebi stýdenttiń sabaqqa qyzyǵýshylyǵy bolýy ne bolmaýy tikeleı pedagogıkalyq sheberlikke baılanysty. Eger durys jol siltep, onyń bilimge degen qyzyǵýshylyǵyn arttyra alsaq bizdiń damýymyz da eselener edi.
Qazaqstannyń básekege qabiletti elder qataryna qosylýynda jastardyń oı-sanasy, qabileti asa mańyzdy. Ony tárbıeleıtin – ustaz. Búginde ár bergen bilimi arqyly eldiń erteńi dál bilimdi azamattardyń qolynda ekenin uǵyndyrýǵa tyrysatyn mamandardyń arqasynda bolashaq jarqyn bolmaq.
Elimizdiń zaıyrly memleket ekendigin eskere otyryp, qabyldaǵan Ata zańǵa baǵynýǵa tıispiz. Oǵan sáıkes, árbir bilim alýshy oqý ornynyń zańyna baǵynyp, birinshi kezekte memlekettik baǵdarlama boıynsha sapaly bilim alýy mindetti. Sebebi bilimdi, saýaty artqan qoǵamnyń jastary tili men dinin, ulttyq bolmysyn saqtaı alady. Eldiń bolashaǵyn damytatyn ǵylym men bilim ekenin árdaıym este ustap, umytpaǵan abzal.
Symbat Naýhan
«Adyrna» ulttyq portaly
