Aqtóbe oblysynyń mádenıet, arhıvter jáne qujattama basqarmasy Uly Otan soǵysyna qatysty degen sharany mamyr aıynda emes, jeltoqsanda atap ótýi múmkin, dep habarlaıdy Adyrna ulttyq portaly goszakup saıtyna silteme jasap. Bul qaı «Otan soǵysy»? Bálkim, bıyl el boıynsha elenbeı qalǵan «Aqtaban shubyryndy» tragedııasynyń 300 jyldyǵyna qatysty shara bolar. Ol da kóktemde, mamyrda bastalǵan oqıǵa edi ǵoı.
6 qarasha kúni Aqtóbe oblysynyń mádenıet, arhıvter jáne qujattama basqarmasy «Aqtóbe oblysynyń izdestirý jasaǵynyń patrıottyq tárbıeni qalyptastyrýǵa baǵyttalǵan Uly Otan soǵysy tarıhy boıynsha is-sharalar ótkizý» degen taqyryppen tender jarııalaǵan. Ataýynyń ózi túsiniksiz hám kúńgirt sharany ótkizýge oblys bıýdjetinen 1 mln 339 myń 285 teńge qarjy bólingen. Tender jeńimpazy 26 qarasha kúni anyqtalady.
ULY OTAN SOǴYSY HÁM «AQTABAN ShUBYRYNDY»
Tehnıkalyq sıpattamaǵa qarap, tender jeńimpazynyń qandaı shara jasaıtynyn túsine almadyq. Qarańyz, mátindi ózgertýsiz berip otyrmyz.
«Jastarǵa áskerı patrıottyq tárbıe berý jáne tarıhı-mádenı murany saqtaý.
1 ólshemsharty: Áleýetti jetkizýshi usynǵan jobanyń tapsyrys berýshiniń tehnıkalyq sıpattamasynyń talaptaryna kelesi bólimderdi qosa alǵanda sáıkestigi:
- Máseleniń sıpattamasy (zertteý, statıstıkalyq jáne analıtıkalyq aqparatty taldaý jáne t.b. anyqtalǵan obektıvti derektermen negizdelgen);
- Jobanyń maqsattary men mindetteri;
- Jobany iske asyrý ádisteri;
- Tapsyrys berýshi qoıǵan maqsattarǵa jetý úshin issharalardyń egjeı-tegjeıli jospary;
(is-sharalardyń ataýy men formasy, orny men kúnderi kórsetilgen)»
Jańyltpash tirkesterdiń jıyntyǵy sııaqty dál osyndaı bir betke jýyq jazba. Onyń qazaqsha, ne oryssha nusqasynan eshteńe uǵý múmkin emes.
Jastarǵa áskerı patrıottyq tárbıe berý men Uly Otan soǵysynyń arasyn ne baılanystyrady?
Aqtóbe oblysy Jeltoqsan oqıǵasy qurbandaryn eske alatyn jáne Táýelsizdik kúni toılanatyn aıda Jeńis meıramyn atap ótpek pe? Máseleniń osy jaǵy kómeski qalǵan.
Álde «Uly Otan soǵysy» dep Jońǵar shapqynshylyǵy, «Aqtaban shubyryndynyń» 300 jyldyǵyn meńzep otyr ma? Óıtkeni 1723 jyly bastalǵan «Aqtaban shubyryndy» tragedııasyna bıyl 300 jyl tolǵan kezde, qalyń qazaq ony ataýsyz qaldyrdy.
Aqtóbe, Muǵaljar óńiri – sol oqıǵada ózindik ról atqarǵan aıryqsha aımaq.
ÁLDE JEŃIS MEREKESI JYLJYP KETKEN BE?
Búgingi tańda «Uly Otan soǵysy» dep atalyp júrgen Ekinshi dúnıejúzilik soǵystyń Jeńis meıramy 9 mamyr kúni toılanyp kele jatyr.Qazaqstan boıynsha Ekinshi dúnıejúzilik soǵysqa qatysty sharalar sáýir aıynyń sońǵy on kúni jáne mamyr aıynyń alǵashqy on kúndiginde ǵana atalyp ótetini barshaǵa aıan.
Tipti, osydan úsh jyl burynǵy Jeńistiń 75 jyldyq merekesiniń ózi osy saltty buzbaǵan bolatyn. Sonyń bári aıqyn bola turyp, Aqtóbe oblysynyń Mádenıet basqarmasy 9 mamyrdyń sharasyn 9 jeltoqsanǵa (árıne, basqa kún bolýy da múmkin) ótkizbekshi bolyp otyrýynyń syry ne?
Aıtpaqtaıyn, «Aqtaban shubyryndy, alqakól sulama» tragedııasy da shamamen mamyr aıynda, kóktemde bastalǵany aıtylatyn edi. «Uly Otan soǵysy» degen soń, táýelsizdik jolyndaǵy osy oqıǵa birinshi oıǵa túsetin zamanda jasap otyrmyz...
Joq, álde Aqtóbe oblysynyń Mádenıet basqarmasy Uly Otan soǵysy ataýyn betperde etip, durys baǵytta jumsalmaı qalǵan qarjyny jyl aıaǵyna deıin ıgerip úlgermek pe?
Bul suraqtardy basqarma basshysyna joldadyq. Jaýap berip jatsa, ony da jarııalaıtyn bolamyz.
Qanat Birlikuly
«Adyrna» ulttyq portaly
