Aqtöbe oblysynyŋ äkımı Eraly Lūqpanūly Toǧjanov Qobda audanynyŋ äleumettık-ekonomikalyq damuymen tanysty, dep habarlaidy “Adyrna” ūlttyq portaly.
Öŋır basşysynyŋ jūmys sapary Qobda auylyndaǧy audandyq ortalyq auruhana men elevatordy qaraudan bastaldy. Ekı nysan da ştattyq tärtıpte jūmys jasaidy. Auruhana halyq sanyna säikes barlyq qajettı jabdyqtarmen jaraqtanǧan. Mūndaǧy ekı mäsele – şalǧai auyldardaǧy medisinalyq punkt pen belgılı bır sala mamandarynyŋ jetıspeuşılıgı, iaǧni kardiolog, okulist, onkolog jäne otolaringolog därıgerlerı joqtyŋ qasy.
Oblys äkımı densaulyq saqtau salasyn damytuǧa jıtı nazar audarylatynyn atap öttı. Medisinalyq mekemeler jelısın keŋeitu men medisina kadrlarynyŋ tapşylyǧyn joiudyŋ jüielık sūraqtary kezeŋ boiynşa şeşıletın bolady.
Audan äkımı Bolat Qūlov ıstıŋ aǧymdaǧy jaǧdaiy jaiynda baiandady. Osy jyldyŋ segız aiynyŋ qorytyndysy boiynşa önerkäsıp öndırısı men bölşek sauda kölemı tömendegen. Äleumettık-ekonomikalyq damudyŋ basqa körsetkışterı boiynşa oŋ dinamika tırkeldı. Osylaişa, negızgı kapitalǧa 4,7 mlrd. teŋgeden asa investisiia tartylyp, 19,4 mlrd. teŋgege auyl şaruaşylyǧy önımı öndırıldı. 1,6 myŋnan asa jaŋa jūmys oryndary aşyldy.
Begaly auyldyq okrugıne qarasty Besqūdyq auylynda biylǧy jazda Qazaqstan dep atalatyn ortalyq köşesındegı ūzyndyǧy 1,5 şaqyrymdyq joldyŋ jöndeu jūmystary aiaqtalyp, sol jerge jaryq qondyryldy jäne jaiau jürgınşıler joly töselude.
Öŋır basşysy jūmysty uaqytynda tapsyryp, sapanyŋ standarttarǧa sai keluın qamtamasyz etıp qana qoimai, jobaǧa özınıŋ de qarjysyn salǧan «Sūŋqar Aqtöbe 2005» JŞS merdıger mekemesınıŋ jūmysyna joǧary baǧa berdı.
Qobda audany da oblystyŋ özge audandary sekıldı 2023 jyly auyl tūrǧyndarynyŋ tabysyn köteretın «Auyl amanaty» pilottyq jobasyn jüzege asyruǧa daiyndalyp jatyr. Skriningtıŋ aldyn ala nätijelerıne säikes, oǧan audannyŋ 858 tūrǧyny atsalysady. Besqūdyq auyly jobamen qamtylatyn eldı mekender qataryna endı. Auylda barlyǧy 962 adam tūrsa, onyŋ ışınde 521 adam ekonomikalyq jaǧynan belsendı tūrǧyndar qataryna jatady. Olardyŋ 257-sı jūmysqa ornalasqan, al 264-ı öz-özın jūmyspen qamtyp otyr. Bügınde auyldyŋ 106 tūrǧyny mal şaruaşylyǧyn damytu, jylyjai salu, aşyq dalada kökönıster men baqşa daqyldaryn ösıru maqsatynda jeŋıldetılgen nesie alu üşın «Auyl amanaty» jobasyna qatysuǧa niet bıldırgen.
Jobanyŋ auyldy damytyp, auyl tūrǧyndarynyŋ äl-auqatyn köterudegı maŋyzdylyǧyn atap ötken öŋır basşysy audan men auyldyq okrugterdıŋ äkımderıne joba qatysuşylaryna barynşa qoldau körsetudı tapsyrdy.
«Bır kooperativte az degende myŋ adam bolu kerek, būl olarǧa qolaily şarttarmen tehnika satyp aluǧa mümkındık beredı. Önımderdı öŋdeudı jolǧa qoiu kerek. Mäselen, şūjyq sehyn aşuǧa bolady, şūjyq sehy bolǧan jerde mındettı türde mal soiatyn seh ta bolady. Osylaişa kooperativ jūmysyna köp adam tartylyp, ekonomikalyq jaǧynan tiımdı bolady. Süt öŋdeudıŋ de keleşegı bar. Äkımderdıŋ mındetı – osy mäselenıŋ bärın baqylauda ūstap, su kerek bolsa ūŋǧymany būrǧylaudy ūiymdastyruǧa, artyq önımdı satuǧa kömektesulerı tiıs. Jaqsy jūmys ısteitınderdı yntalandyru kerek. Mysaly, kemınde bır gektar qosymşa jer berse»,-deidı E.Toǧjanov.Besqūdyq auylynyŋ tūrǧyndary oblys äkımımen tıldesu mümkındıgın jıbergen joq. Olardyŋ ışınde, jas futbolister vorkaut alaŋyn ornatudy sūrady. Qūzyrly organ ökılderıne balalardyŋ armanyn oryndau tapsyryldy. Jyl basynan berı Qobda audanynda ırı qara men ūsaq mal basy 25 paiyzǧa artqan. Memlekettık qoldau şaralarynyŋ arqasynda keler jyly qūny 2,2 milliard teŋgege 1600 bas ırı qara malǧa arnalǧan et baǧytyndaǧy reproduktor men süt-tauarly fermasynyŋ qūrylysy bastalady. Öŋır basşysy audan basşylyǧyna jobaǧa qoldau körsetudı tapsyrdy. Sondai-aq, oblys äkımı "BS Agro" şarua qojalyǧynyŋ küzgı dala jūmystarynyŋ barysymen tanysyp, audandaǧy mal ösıruşılermen jäne ırı şarua qojalyqtarynyŋ basşylarymen kezdestı. Şarualar qosymşa jer berudı sūrady. E.Toǧjanov oblysta paidalanylmaǧan jäne maqsatsyz paidalanylǧan auyl şaruaşylyǧy jerlerın qaitaru boiynşa auqymdy jūmystar atqarylyp jatqanyn aitty. Öŋır basşysy: «Būl jerler adal eŋbek etetın şaruaşylyqtarǧa berıledı»,-dep atap öttı. Ol sondai-aq, şarualardy auyldardy damytuǧa ülesterın qosyp, audan tūrǧyndaryna qoldau körsetuge şaqyrdy.
«Auylda tūratyn azamattarǧa kömektesuımız kerek, jaǧdai jasau kerek», - dedı E. Toǧjanov.
Ūqsas jaŋalyqtar
