Respýblıka kúniniń memlekettik deńgeıde, elimizde turatyn barsha ult pen ulysqa ortaq ulttyq mereke retinde toılanýy Qazaqstannyń álem aldyndaǵy bedelin arttyra túsedi. Respýblıka kúni qoǵamnyń patrıottyq sezimin nyǵaıtýǵa birden-bir negiz bolatyn mereke.
1990 jyly 25 qazanda Qazaq KSR Joǵarǵy Keńesiniń qaýlysymen Memlekettik egemendik týraly Deklaraııa qabyldandy. Qazaq KSR egemendigin jarııalap, Qazaqstannyń táýelsiz memleket retinde saıası-quqyqtyq negizderin qabyldady. Onda tuńǵysh ret aýmaqtyń tutastyǵy, bólinbeıtindigi jáne tatýlyǵy, Qazaqstan halqy men olardyń tilderin, mádenıetin damytý, ulttyq biregeılikti nyǵaıtý sııaqty memlekettiliktiń qaǵıdalary bekitildi. Bul tarıhı jáne óte mańyzdy sheshim bolatyn. Elimizdiń táýelsizdigi dál osy kúnnen bastalady dep senimmen aıtýǵa bolady. Sondyqtan bul kúndi ulttyq mereke retinde qaıta bekitý memlekettilik turǵysynan mańyzdy qadam bolyp otyr.
Biz rýhanı qundylyǵymyzdy, baı tarıhymyzdy jáne uly dalanyń murageri retinde qazaqty álemge tanytý arqyly osy tarıhı datanyń mán-mańyzyn barynsha asha bilýimiz qajet. Sol sebepti bul kúnniń qazirgi qoǵamǵa qajettiligi memleketimiz úshin úlken mánge ıe dep sanaımyn.
Táýelsizdik jyldarynda Qazaqstan armııasy memlekettiń egemendigi men aýmaqtyq tutastyǵyn qamtamasyz etip qana qoımaı, zamanaýı, joǵary jaraqtandyrylǵan jáne utqyr áskerge aınaldy. Bul jerde Qarýly kúshter ardagerleriniń janqııarlyq eńbegin erekshe atap ótkim keledi. Alǵashqy kúnnen-aq memleketshil, ultjandy kóptegen ofıerler men generaldar armııanyń jaýyngerlik qabiletin qalyptastyrý men nyǵaıtý úshin aldyńǵy shepten tabyldy.
Búginde Jańa Qazaqstandy qurýdyń mańyzdy qadamdary jasalýda. Elimizdiń qurylymdyq júıesinde, saıası-ekonomıkalyq baǵytynda aıtarlyqtaı jańǵyrtýlar qolǵa alyndy. Halqymyz da jańa qoǵamdy qalyptastyrýǵa degen bul bastamalarǵa árdaıym qoldaý bildirip keledi. Demokratııalyq úrdisterdi ornyqtyrýǵa, turǵyndardyń ómir súrý sapasyn jaqsartýǵa baǵyttalǵan bul ózgeristerdiń Qarýly kúshterdiń ardagerleri úshin de mańyzy zor bolmaq.
Memleket basshysynyń «Biz úshin Qazaqstannyń Táýelsizdigi bárinen qymbat. Osy turaqsyz, qubylmaly álemde Qazaqstanymyz bizden basqa eshkimge kerek emes. Sondyqtan, maǵan elimniń amandyǵy men jerimniń tutastyǵynan asqan eshbir qundylyq joq», – degen sózi bizdiń árqaısymyzdyń jadymyzda jattalyp turýy kerek. Bul rette Otan qorǵaýshylarǵa artylar jaýapkershiliktiń eselene túsetini anyq. Ózderine artylǵan bul senimdi el qorǵandary abyroımen oryndaıtynyna kúmánim joq.
Respýblıka kúni merekesinde ár shańyraqqa baq daryp, yrys uıalasyn! Elimizge tynyshtyq, halqymyzǵa bereke-birlik, eńbekterine tabys, baqytty ǵumyr tileımin!
Marat NAǴUMANOV,
QR Qarýly Kúshteri Ardagerler keńesi
tóraǵasynyń orynbasary otstavkadaǵy general-maıory
