25 qazan – Respublika künı qarsaŋynda elordada E.Rahmadiev atyndaǧy memlekettık akademiialyq filarmoniia qabyrǧasynda Mädeniet jäne aqparat ministrlıgınıŋ qoldauymen «AMANAT» partiiasy ūiymdastyrǧan dästürlı «Altyn dombyra» respublikalyq aqyndar aitysy öttı. Ūly aqyn Abai Qūnanbaiūlynyŋ 180 jyldyǧyna arnalǧan «Adamzattyŋ bärın süi!» taqyrybyndaǧy dübırlı dodaǧa osy jyly respublikalyq jäne halyqaralyq aitystarda top jarǧan 14 aqyn qatysty.
«AMANAT» partiiasynyŋ Atqaruşy hatşysy Däulet Kärıbek Respublika künı memlekettıgımızdıŋ jaŋa şejıresı jazylǧan, tarihymyzdyŋ jaŋa paraǧy aşylǧan elımız üşın eŋ qasterlı meiram ekenın atap öttı.
«Memleket basşysy Qasym-Jomart Toqaev qazır ruhaniiat pen mädenietke erekşe män berıp otyr. Osy baǧytta qanşama jūmystar jasalyp ta jatyr. Prezidenttıŋ intellektualdy ūlt qūru ideiasy – bolaşaǧymyzdy aiqyndaityn asa maŋyzdy baǧyt. Osy oraida, «AMANAT» partiiasy da ädebiet pen ruhaniiatqa, ūlttyq önerge, sonyŋ ışınde osy aitysqa jan-jaqty qoldau körsetıp kele jatqanyn atap ötkım keledı», – dedı «AMANAT» partiiasynyŋ Atqaruşy hatşysy Däulet Kärıbek.
Osy oraida, Mädeniet jäne aqparat vise-ministrı Aibek Sydyqov vedomstvo basşysy Aida Balaevanyŋ qūttyqtau hatyn oqyp berdı.
«Aitys – halqymyzdyŋ ruhani bolmysynyŋ ainasy, ǧasyrlardan jetken qasiettı öner. Ony qasterleu, jaŋa däuırdıŋ tynysymen qaita tületu jäne jas ūrpaqtyŋ sanasyna sıŋıru – bärımızge ortaq mındet. Mädeniet jäne aqparat ministrlıgı jyl saiyn ūlttyq önerdı därıpteitın, dästür sabaqtastyǧyn jalǧaityn osyndai ırgelı jobalardy jüielı türde jüzege asyryp keledı. Elımızdıŋ igılıkterı men jetıstıkterı, halyqtyŋ jarqyn bolaşaǧy ūlt mereiın asqaqtatatyn ūlyq merekege arnalyp otyrǧan bügıngı aitystyŋ arqauyna ainalyp, aqyndarymyzdyŋ şabyty şalqi bersın. Babalar salǧan sara joldy jalǧap, el ruhyn asqaqtatyp jürgen jüirıkterge şyǧarmaşylyq tabys, barşaŋyzǧa mol igılık pen baq-bereke tıleimın», – delıngen ministrdıŋ qūttyqtau hatynda.
Öz kezegınde, aitys tızgının ūstaǧan Mäjılıs deputaty, «AMANAT» partiiasy fraksiiasynyŋ müşesı Amanjol Ältai jyl basynan berı «AMANAT» partiiasynyŋ qoldauymen türlı deŋgeidegı aitystar ūiymdastyrylyp kele jatqanyn atap öttı.
«Aitys – halqymyzdyŋ mädeni mäiegı, ruhani jädıgerı. Sondyqtan jyl ötken saiyn töl önerımızdıŋ maŋyzy artyp, aiasy keŋeiıp keledı. Mäselen, mamyrda IýNESKO-nyŋ Parijdegı Bas ştab-päterınde qazaq jäne qyrǧyz aqyndary topqa tüsken aitys ötkızıldı. «Habar» telearnasynda qazaqtyŋ ötkenı men bügının ūştastyrǧan «Jekpe-jek aitys» körermen közaiymyna ainaldy. Qazaqstannyŋ barlyq aimaǧyn qamtyǧan komandalyq aitys şıldede Aqtau qalasynda tüiındeldı. Al bügıngı «Altyn dombyra» aitysy Respublika künı qarsaŋynda täu eter Täuelsızdıgımızdıŋ tūǧyryn bekemdep, memleketımızdıŋ mereiın üstem etedı degen senımdemın», – dedı ol.
Qazylar alqasynyŋ töraǧasy – aqyn, Qazaqstan aitys aqyndary men jyrşy termeşılerdıŋ halyqaralyq Odaǧynyŋ Töraǧasy Jürsın Erman. Sondai-aq aqyndardyŋ söz barymtasyn Senat deputaty Nūrtöre Jüsıp, Mäjılıs deputaty, «AMANAT» partiiasy fraksiiasynyŋ müşesı Janarbek Äşımjanov, Qazaqstannyŋ halyq aqyny, aitys ardagerı Äsiia Berkenova, aqyn, Memlekettık syilyqtyŋ iegerı Ǧalym Jailybai, aqyn, Qazaqstannyŋ Eŋbek sıŋırgen qairatkerı Mels Qosymbaev, aitys ardagerı, Mädeniet salasynyŋ üzdıgı Qūdaiberlı Myrzabekov baǧalady.
Nätijesınde, qazylar alqasynyŋ şeşımımen bas jüldenı – Aibek Qaliev (Qostanai oblysy) ielendı. Oǧan «Altyn dombyra» jäne päter tabystaldy. Jüldelı 1-oryn jäne avtokölık – Beksūltan Orynbasarǧa (Qyzylorda oblysy) būiyrdy. Al 2-oryndy – Serık Quanǧan (Şyǧys Qazaqstan oblysy) jäne Nūrbol Jauynbaev (Aqtöbe oblysy) qanjyǧalady. Olardyŋ ärqaisysyna 1,5 mln teŋge syiaqy berıldı. Būl rette, 3-oryndy – Meiırbek Sūltanhan (Qyzylorda oblysy) jäne Didar Qami (Qaraǧandy oblysy) özara bölısıp, 1 mln teŋgeden ielendı.
Būǧan qosa, Serık Quanǧan «Aitys aqtaŋgerı» atanyp, Şyǧys Qazaqstan oblysy äkımdıgı avtokölık mıngızdı. Sondai-aq avtokölıktı Nūrbol Jauynbaev (Aqtöbe oblysy) taqymdady. Al Qonysbai Äbılov atyndaǧy arnaiy jülde men 750 myŋ teŋge – Nūrlan Esenqūlovqa (Şymkent qalasy), Äselhan Qalybekova atyndaǧy arnaiy jülde men 750 myŋ teŋge – Äsem Erejeqyzyna, Erık Asqarov atyndaǧy jülde men 750 myŋ teŋge – Däuren Aqsaqalovqa (Türkıstan oblysy), Köken Şäkeev atyndaǧy arnaiy jülde men 750 myŋ teŋge, päter jäne avtokölık – Sara Toqtamysqa (Astana qalasy), ūsynyldy.
Yntalandyru syilyǧy Aspanbek Şūǧataiǧa (Pavlodar oblysy), Jarqyn Jūparhanǧa (Soltüstık Qazaqstan oblysy), Rüstem Qaiyrtaiǧa (Abai oblysy) jäne Abai Jolmaǧanbetke (Maŋǧystau oblysy) tabystaldy. Är aqynǧa 500 myŋ teŋge berıldı.
Aita keteiık, ekı künge sozylǧan alaman aitysqa «QAZAQSTAN» Ūlttyq telearnasy aqparattyq qoldau körsettı.
