Masqara: Almatynyń áýejaıy
Eliń úshin maqtanatyn kezder de, ókinishke qaraı, uıalatyn kezder de bolady.
Almatynyń áýejaıynan ushqan saıyn uıalamyn, ásirese shetelge shyqsam. Al bıyl men osy áýejaıdan 5 ret shetelge ushyppyn. Jyl sońyna deıin taǵy eki-úsh saparym bar.
Eki mıllıon halqy bar eshqandaı qalada mundaı masqara áýejaı joq shyǵar.
Óziń úshin uıalmaısyń, aýlasyna kólikpen kirseń shyǵa almaıtyn, shyqsań kire almaıtyn, oryn tappaı tyǵylyp, ájethanaǵa kirse murnyn shymshyp shyǵatyn sheteldikter úshin uıalamyn.
Osy ma elderiń, masqara dep ketetindeı. Olaı aıtatyndaı bar ǵoı, ras qoı. Áýejaı — qonaqtar kelgende alǵashqy jáne sońǵy áser alatyn oryn. Bul áser týrıstik turǵydan da, eldi qabyldaý (vosprııatıe) turǵysynan da asa mańyzdy.
Qazaqstanǵa, Almatyǵa pálenbeı mıllıon týrıst keldi/keledi dep keýde soǵyp júrgenderdi osy zalda kúttirip, maıshabaqtaı tyǵylysqan avtobýspen ushaqqa aparyp mingizer me edi.
Úıge qonaq keler bolsa, ásirese qudalar sııaqty mańyzdy qonaqtardy kútetin bolsaq, úıdi aqtap-syrlap, qol súrtetin súlgige deıin jańasyn sandyqtan shyǵaryp, keseniń jıegi syrlysyn usynatyn halyqtyń nıetine bul kórinis esh saı emes.
Almatynyń áýejaıynan ushqan saıyn osy postty jazam dep oqtalam, osy joly sáti tústi.
Nege bulaı boldy degen saýal mazalaıdy.
1. Almaty astana mártebesinen aıyrylǵan soń bul qalaǵa asa kóńil bólinbegendeı (jolaıryqtar men metrony eseptemegende).
2. Kóńil bóletin, sheshim qabyldar sheneýnikter vıppen ushady.
Osy eki sebep, meniń oıyma túskeni. Basqa sebep bolsa, kommentke jaza ketińiz.
Jańa termınal salystyrmaly túrde jýyrda ǵana bastaldy. Túrikter kelip qolǵa almaǵanda bitken ekenbiz. Al mundaı termınal Túrkııanyń áýejaıynda emes, árbir avtovokzalynda bar, maqtanatyndaı emes.
