1964 jyly Mäskeude soǧys ardagerlerınıŋ bükılodaqtyq konferensiiasy boldy. Konferensiiaǧa Qazaqstannan general Nūrmaǧanbetov Saǧat bastaǧan bır top adam bardyq. Konferensiia soŋynda Sovet Odaǧynyŋ Batyry, marşal Timoşenko barlyǧymyzǧa "Sovet Odaǧy soǧys ardagerlerı komitetınıŋ qūrmettı belgısı" degen medal tapsyrdy da, soldat taǧamyn tatuǧa şaqyrdy. Ülken zalda är jerge jeke-jeke stoldar qoiylypty. Men esık jaqtaǧy bır stol basyna jaiǧastym. Jalǧyz otyryp, stolda tūrǧan ışımdıkke emın-erkın ielık jasap, bıraz jerge de barǧan edım. Sol kezde Sovet ardagerler komitetınıŋ hatşysy Maresev üş adam ertıp kelıp, menıŋ qasyma otyrularyn ūsynyp tūryp:
— Myna kısımen tanysyp qoiyŋyzdar. Būrynǧy partizan otriadynyŋ komandirı Qaisenov, — dep tanystyrdy da, ketıp qaldy. Üşeuı otyrdy. Keudelerı tolǧan ordender men medaldar.
Bır kezde älgı üşeuınıŋ eŋ ordenı köbı:
— Senderde, Qazaqstanda Bauyrjan Momyşūlyn nege sonşa aspanǧa köteresızder? Ol turaly kıtaptar jazasyŋdar. Kino şyǧarasyŋdar. Ol soǧūrly Otan üşın elden erekşe ne ısteptı? — dep qadaldy maǧan.
— Ol Momyşūlyn sender bılesıŋder me? — dep özderı "sen" dep dörekılık jasap otyrǧan soŋ, men de "sender" dep sūradym.
— Bılemız, bılgende qandai, bır diviziiada, bır polkta bırge boldyq, — desıp jarysa jauap qatty.
— Momyşūlynan, bırge bolǧanda, lauazymdaryŋ, äskeri şenderıŋ joǧary ma edı?
— Joq. Menıŋ şenım joǧary bolǧanmen, lauazymym bırdei edı de, myna ekeuınıŋ şenı de, lauazymy da tömen edı, — dedı ordenı köbı.
— Eger senderdıŋ Momyşūlynan lauazymdaryŋ joǧary bolmasa, ekeuıŋnıŋ odan äskeri şenderıŋ tömen bolsa, bırge jürıp, bır polkta soǧyssaŋdar, nege senderdıŋ ärqaisyŋda segızden onǧa deiın orden bar da, al Momyşūlynda bır-aq orden bar? — dep qadaldym. Olar jauap bere almai, bır-bırıne qarady da:
— Sonda da qazaqtar ony orynsyz därıptep, kıtaptan kıtap jazyp jatyr, — dedı tütıgıp.
— Momyşūly turaly kıtapty aldymen qazaqtar emes, Aleksandr Bek, Aleksandr Kriviskiiler — osy özderıŋnıŋ moskvalyq jazuşylaryŋ, tıptı soǧys uaqytynda jazdy ǧoi. Sender andaǧy keudelerıŋdegı köp ordenderıŋe sai batyr bolsaŋdar, olar senderdı nege jazbaǧan? — dep qadaldym. Olar oryndarynan tūryp-tūryp ketıp qaldy.
Qasym Qaisenovtyŋ estelıgınen
