Áleýmettik jelide Memleket basshysy Qasym-Jomart Toqaevtyń Máskeýge sapary qyzý talqylaǵan bolatyn. Azamattardyń bir bóligi «Prezıdenttiń sapary májbúrli qadam» dep aqtasa, ekinshi top «Basqynshy eldiń prezıdenti Pýtınniń qoldaý qatelik boldy» dep aıyptaǵan.
Búgin jýrnalıster Májilis tóraǵasy Erlan Qoshanovtyń osy máselege qatysty pikirin bildi.
«PREZIDENT – QAZAQ JAÝYNGERINIŃ JOQTAÝShYSY»
- Men bul sapardy óte durys sapar dep esepteımin. Sebebi Uly otan soǵysy – bizdiń ortaq tarıhymyz. Uly jeńis ol da bizdiń ortaq tarıhymyz. Sondyqtan sol baýyrlas memleketterdiń basshylarynyń barlyǵy derlik keshegi paradta boldy. Bul bizdiń soǵysta sheıt bolǵan ata-babalarymyzǵa arnalǵan qurmet dep oılaımyn. Bul jerde bul máseleni saıasılandyrýdyń qajeti joq. Bul bir. Ekinshiden, bizdiń Qazaqstannyń ózinen 1 mln 200 myńǵa jýyq adam soǵysqa ketti. Sol soǵystan bizdiń áke, atalarymyzdyń jartysy oralmady. Olardyń kóbisi Reseı jerinde jatyr. Jaýyngerlerdiń izdeýshisi, joqtaýshysy bolýy kerek pe, bolmaýy kerek pe? Izdeýshisi, joqtaýshysy kim bolýy kerek? Meniń oıymsha, qazaq halqy men prezıdentimiz bolýy kerek. Prezıdenttiń saparyn zerdelep saralaıtyn bolsańyz, birinshi kezekte prezıdent Astanadaǵy «Otan qorǵaýshylar» memorıalyna gúl shoǵyn qoıyp, elimizdegi Otan qorǵaýshylarǵa taǵzym etti, - deıdi Májilis tóraǵasy.
Onyń aıtýynsha, el basshysy jergilikti ardagerlerge «Halyq qaharmany» ataǵyn bergennen keıin Rjev qalasyna bardy. Rjev qalasyndaǵy 22 myń qazaqstandyqtyń deni qazaq jaýyngerleri boldy. Olar Máskeýdi qorǵaǵan kezde qaza tabady. Solardyń ár biriniń aty-jóni tasqa qashalyp jazylǵan.
- Prezıdent zııarat jasap, ózimizdiń dástúr boıynsha Quran oqydy. Prezıdent solardyń joqtaýshysy bolyp bardy dep oılaımyn. Sol jerde prezıdentimizdiń ákesiniń týǵan aǵasy Qasym Boltaev jatyr. Men bul saparda prezıdent óziniń azamattyq, perzenttik jáne prezıdenttik boryshyn atqaryp keldi dep esepteımin, - dedi Erlan Qoshanov.
Áý basta prezıdenttiń baspasóz qyzmeti Qasym-Jomart Toqaevtyń 9 mamyr kúni Astanada bolatynyn habarlaǵan bolatyn. Osyny eske alǵan jýrnalıster «Prezıdent aıaq astynan Máskeýge nege saparlady?» dep surady. Spıker Qasym-Jomart Toqaevtyń jumys kestesin ózi emes, prezıdent ákimshiligi jasaıtynyn aıtyp, qutyldy.
ÁZIRGE QYZYL TÝǴA QARSY QUZYR JOQ...
9 mamyr kúni elimizdiń birneshe qalasynda Sovet úkimetiniń qyzyl týyn ustap, júzdegen adam áskerı atrıbýttarmen marsh ótkizgen bolatyn. Ishki ister mınıstri Marat Ahmetjanovtan «Quzyrly organ ókilderi qyzyl tý ustaǵandarǵa nege jaza qoldanbady?» dep suradyq.
- Búgingi tańda olarǵa eskertý, túsindirý jumystary júrgizildi. Quqyqtyq memlekette turǵandyqtan, zańda shekteý bolmaǵan soń oǵan (KSRO týyn alyp shyǵýǵa – S.J.) ruqsat. Alaıda biz ashyq qoǵamda turamyz. Eger olardyń áreketi qoǵamnyń narazylyǵyn týdyrǵandyqtan, ishki ister organdarynyń saqshylary nasıhattaý, úgitteý, eskertý jumystaryn júrgizdi, - deıdi Ishki ister mınıstri Marat Ahmetjanov.
Mınıstrdiń ózi ulttyq maqtanyshty qorlaý sezimin týdyratyn osy máseleni zańmen retteý kerek dep esepteıdi.
- Eger zańda shekteý bolmasa onda ruqsat berilgen. Mundaı másele bolatyn bolsa, depýtatttar usynys jasap, qabyldaıdy. Eger zańmen shekteý bolyp, ol zańsyz bolatyn bolsa biz tıisti is áreketterdi zań sheńberinde qoldanamyz, - dep jaýap mınıstr Ahmetjanov.
Osy aıtylǵan másele boıynsha Májilis tóraǵasy Erlan Qoshanovtyń ózine suraq qoıdyq.
- Qajettilik bolatyn bolsa, biz ondaı zań qabyldaımyz. Búginde zańda ondaı shekteý joq, - dep qysqa-nusqa jaýap berdi...
Al álemde Baltyq jaǵalaýy elderi sekildi sovettik sımvolıkaǵa tyıym salǵandar bar.
Serik Joldasbaı
