Almatyda KSRO týyn ustap, "jeńis kúnin toılatqandardyń" vıdeosy tarady. Vıdeo kásipker Yqylas Tursynbektiń Tik tok paraqshasynda jarııalandy, dep jazady "Adyrna" tilshisi.
Vıdeo avtorynyń aıtýynsha, "Almaty" teatrynyń mańyna túsirilimge kelgen bir top operatorlar "unamsyz" jaıtty baıqaǵan. KSRO týyn ustap júrgen orys azamattaryn baıqap, olardan ne istep jatqandaryn surady. Synǵa alǵan jigitke olar avtoklýbpen Jeńis kúnine oraı fotosessııa jasaýǵa kelgenderin aıtty.
"Bizdi túsirýge quqyǵyńyz joq. Biz munda fotosessııa jasaýǵa keldik" dep jaýap berdi oǵan áıel.
"Bul naǵyz táýelsizdigimizdi moıyndamaý" dep pikir bildirip, KSRO týymen qosa Qazaqstan týyn qatar alyp júrýdi talap etken azamatqa olar:
"Biz mindetti emespiz. Ne isteıtinimizdi ózimiz bilemiz. Mine senderdiń týlaryń, Táýelsizdik kúninde ustap túskenbiz" dedi.
Oqıǵa FB jelisinde de úlken talqyǵa túsýde. Jeli qoldanýshylary "senderdiń týlaryń" degenderine narazylyǵyn bildirip, "memlekettik jáne ulttyq ıdeologııa joq" dep pikir bildirýde.
"Adyrna" redakııasy atalǵan jaıtqa qatysty zańgerdiń pikirine júgindi. Maman QR Qylmystyq Kodeksiniń 180-babyna sáıkes separatıstik áreket dep memlekettiń birtutastyǵy men tutastyǵyn, onyń aýmaǵyna qol suǵylmaýyn jáne bólinbeýin buzýdy ne memleketti ydyratýdy nasıhattaý nemese oǵan jarııa túrde shaqyrý, sol sııaqty osyndaı mazmundaǵy materıaldardy taratý maqsatynda daıyndaý, saqtaý nemese taratý isteri tanylatynyn málimdedi. Sonymen qosa:
"Bul anyqtamadan qylmysty árekettiń tikeleı qasaqana túrde iske asatyndyǵyn kórip otyrmyz. Alaıda beınejazbada KSRO týyn ustaǵan slavıan ultynyń ókilderi, ózderiniń áreketin Jeńis kúnine arnalǵan mádenı shara retinde túsindirip baǵýda. Separatıstik pıǵylyn ashyq túrde jarııaap, oǵan qasaqana baryp otyrmaǵandyqtan qylmystyń quramy bar dep aıta almaımyz" dedi zańger Qazybek Daýtalıev.
Qazybek myrzanyń aıtýynsha, zań qylmystyń separatıstik pıǵyldyń qasaqa jasalǵan turin ǵana jazalaıdy. Osy ýaqytqa deıin atalǵan kodeks boıynsha elimizde eki adam jazaǵa tartylǵan. Onyń biri esterińizde bolsa Igor Sychev degen azamat ózi turyp jatqan Shyǵys Qazaqstan oblysynyń Reseıge qosylýyna qatysty VKontakte áleýmettik jelisinde saýalnama júrgizgen bolatyn. 2015 jyly «Qazaqstan Respýblıkasynyń aýmaqtyq tutastyǵyn buzýǵa nasıhattaǵany» úshin 5 jylǵa bas bostandyǵynan aıyrý jazasyna kesildi.
"Qoldanystaǵy zańnama boıynsha bireýdi foto, beınekameraǵa túsirýge, eger ol jarııa qatynastan týyndamasa, ruqsat etilmeıdi. Alaıda, zań buzýshylyq faktisi oryn alyp jatsa, ony ruqsat suramastan árkimniń túsirýine quqyǵy bar. Naqtyly jaǵdaıda zań buzýshylyq emes ekendigi belgili bolǵan sátten bastap, túsirgen beınejazbasyn alyp tastasa nemese ol týraly teristep aqparat berse quqyq buzýshylyq bolyp tabylmaıdy dep oılaımyn" dep jaýap berdi ol.
"Adyrna" ulttyq portaly
