الماتىدا كسرو تۋىن ۇستاپ، "جەڭىس كۇنىن تويلاتقانداردىڭ" ۆيدەوسى تارادى. ۆيدەو كاسىپكەر ىقىلاس تۇرسىنبەكتىڭ Tik tok پاراقشاسىندا جاريالاندى، دەپ جازادى "ادىرنا" ءتىلشىسى.
ۆيدەو اۆتورىنىڭ ايتۋىنشا، "الماتى" تەاترىنىڭ ماڭىنا تۇسىرىلىمگە كەلگەن ءبىر توپ وپەراتورلار "ۇنامسىز" جايتتى بايقاعان. كسرو تۋىن ۇستاپ جۇرگەن ورىس ازاماتتارىن بايقاپ، ولاردان نە ىستەپ جاتقاندارىن سۇرادى. سىنعا العان جىگىتكە ولار اۆتوكلۋبپەن جەڭىس كۇنىنە وراي فوتوسەسسيا جاساۋعا كەلگەندەرىن ايتتى.
ء"بىزدى تۇسىرۋگە قۇقىعىڭىز جوق. ءبىز مۇندا فوتوسەسسيا جاساۋعا كەلدىك" دەپ جاۋاپ بەردى وعان ايەل.
"بۇل ناعىز تاۋەلسىزدىگىمىزدى مويىنداماۋ" دەپ پىكىر ءبىلدىرىپ، كسرو تۋىمەن قوسا قازاقستان تۋىن قاتار الىپ ءجۇرۋدى تالاپ ەتكەن ازاماتقا ولار:
ء"بىز مىندەتتى ەمەسپىز. نە ىستەيتىنىمىزدى ءوزىمىز بىلەمىز. مىنە سەندەردىڭ تۋلارىڭ، تاۋەلسىزدىك كۇنىندە ۇستاپ تۇسكەنبىز" دەدى.
وقيعا فب جەلىسىندە دە ۇلكەن تالقىعا تۇسۋدە. جەلى قولدانۋشىلارى "سەندەردىڭ تۋلارىڭ" دەگەندەرىنە نارازىلىعىن ءبىلدىرىپ، "مەملەكەتتىك جانە ۇلتتىق يدەولوگيا جوق" دەپ پىكىر بىلدىرۋدە.
"ادىرنا" رەداكتسياسى اتالعان جايتقا قاتىستى زاڭگەردىڭ پىكىرىنە جۇگىندى. مامان قر قىلمىستىق كودەكسىنىڭ 180-بابىنا سايكەس سەپاراتيستىك ارەكەت دەپ مەملەكەتتىڭ بىرتۇتاستىعى مەن تۇتاستىعىن، ونىڭ اۋماعىنا قول سۇعىلماۋىن جانە بولىنبەۋىن بۇزۋدى نە مەملەكەتتى ىدىراتۋدى ناسيحاتتاۋ نەمەسە وعان جاريا تۇردە شاقىرۋ، سول سياقتى وسىنداي مازمۇنداعى ماتەريالداردى تاراتۋ ماقساتىندا دايىنداۋ، ساقتاۋ نەمەسە تاراتۋ ىستەرى تانىلاتىنىن مالىمدەدى. سونىمەن قوسا:
"بۇل انىقتامادان قىلمىستى ارەكەتتىڭ تىكەلەي قاساقانا تۇردە ىسكە اساتىندىعىن كورىپ وتىرمىز. الايدا بەينەجازبادا كسرو تۋىن ۇستاعان سلاۆيان ۇلتىنىڭ وكىلدەرى، وزدەرىنىڭ ارەكەتىن جەڭىس كۇنىنە ارنالعان مادەني شارا رەتىندە ءتۇسىندىرىپ باعۋدا. سەپاراتيستىك پيعىلىن اشىق تۇردە جاريااپ، وعان قاساقانا بارىپ وتىرماعاندىقتان قىلمىستىڭ قۇرامى بار دەپ ايتا المايمىز" دەدى زاڭگەر قازىبەك داۋتاليەۆ.
قازىبەك مىرزانىڭ ايتۋىنشا، زاڭ قىلمىستىڭ سەپاراتيستىك پيعىلدىڭ قاساقا جاسالعان ءتۇرىن عانا جازالايدى. وسى ۋاقىتقا دەيىن اتالعان كودەكس بويىنشا ەلىمىزدە ەكى ادام جازاعا تارتىلعان. ونىڭ ءبىرى ەستەرىڭىزدە بولسا يگور سىچەۆ دەگەن ازامات ءوزى تۇرىپ جاتقان شىعىس قازاقستان وبلىسىنىڭ رەسەيگە قوسىلۋىنا قاتىستى ۆكونتاكتە الەۋمەتتىك جەلىسىندە ساۋالناما جۇرگىزگەن بولاتىن. 2015 جىلى «قازاقستان رەسپۋبليكاسىنىڭ اۋماقتىق تۇتاستىعىن بۇزۋعا ناسيحاتتاعانى» ءۇشىن 5 جىلعا باس بوستاندىعىنان ايىرۋ جازاسىنا كەسىلدى.
"قولدانىستاعى زاڭناما بويىنشا بىرەۋدى فوتو، بەينەكامەراعا تۇسىرۋگە، ەگەر ول جاريا قاتىناستان تۋىنداماسا، رۇقسات ەتىلمەيدى. الايدا، زاڭ بۇزۋشىلىق فاكتىسى ورىن الىپ جاتسا، ونى رۇقسات سۇراماستان اركىمنىڭ تۇسىرۋىنە قۇقىعى بار. ناقتىلى جاعدايدا زاڭ بۇزۋشىلىق ەمەس ەكەندىگى بەلگىلى بولعان ساتتەن باستاپ، تۇسىرگەن بەينەجازباسىن الىپ تاستاسا نەمەسە ول تۋرالى تەرىستەپ اقپارات بەرسە قۇقىق بۇزۋشىلىق بولىپ تابىلمايدى دەپ ويلايمىن" دەپ جاۋاپ بەردى ول.
"ادىرنا" ۇلتتىق پورتالى
