QR Oqý-aǵartý eks-mınıstri Ashat Aımaǵambetov Nartaı Aralbaıulyna bergen suhbatynda Astanadaǵy ýnıversıtettiń birine qarapaıym oqytýshy bolyp jumysqa ornalasyp jatqanyn habarlady, dep jazady "Adyrna" ulttyq portaly.
"Qazir men úıdemin. Qolym bos. Negizinen sol balalardy tańerten mektepke, balabaqshaǵa aparyp, sodan keıin balabaqshadan, mektepten alyp ketip júrmin. 4 qańtarda jumystan ketkennen keıin dál sol kúni keshke jaqyn balabaqshaǵa bardym. Kishi uldy alyp ketý kerek boldy. Sonda balabaqshadaǵy apaıy baryp "Úıge alyp ketýge ákeń keldi" dep aıtyp jatyr. Sonda ar jaqtan estip jatyrmyn... "Joq, áke emes. Anam shyǵar" dep senbedi. Qalaı keldi dep ol da tańǵalyp jatyr ǵoı... Endi úıde jınalyp qalǵan turmystyq ár túrli sharýalar bar. Kitap oqýǵa ýaqyt paıda boldy. Ózime unaıdy. Sondaı ýaqyt qazir...", - dedi Aımaǵambetov.
Eks mınıstr Astanadaǵy ýnıversıtettiń birine qarapaıym oqytýshy bolyp jumysqa ornalasyp jatqanyn habarlady.
"Osy jýyrda maǵan Astana qalasyndaǵy óte iri, sapaly ýnıversıtetterdiń biri "Biraz tájirıbeńiz bar. Osy tájirıbemen stýdenttermen bólisseńiz" dep usynys berdi. Endi men ózim oqytýshy, pedagog bolǵannan keıin maǵan ustaz bolý óte jaqyn. Sondyqtan kádimgideı qarapaıym oqytýshy bolyp, stýdenttermen jumys isteý degen usynysty qabyldadym. Endi qazirgi ýaqytta tıisti qujattardy, kýrs baǵdarlamasyn, sılabýs degen sııaqty basqa jumystarmen qazir aınalysyp jatyrmyn. Basqa da ár túrli usynystar bar. Men jasyrmaımyn. Bul usynystar boıynsha sheshim qabyldap, ol týraly aqparatty jaqynda qoǵamǵa jetkizemin. Aǵartýshylyq jumyspen aınalysý, balalarǵa bilim berý, jınaǵan tájirıbemen bólisýdi qaıda júrseń de, ony birge alyp júrýge bolady. Qandaı qyzmetke barsań da, nemen aınalyssań da, birge alyp júretin jumys. Sondyqtan qazirgi ýaqytta qarapaıym oqytýshy retinde ózim osyndaı óskeleń urpaqpen tájirıbemdi bólisýdi jón kórip otyrmyn", - dep málimdedi Ashat Aımaǵambetov.
"Adyrna" ulttyq portaly
