Aqtaýda oqýshyǵa daýys kóterip, dóreki sóılegen muǵalimge sógis jarııalandy. Bul týraly Mańǵystaý oblystyq bilim basqarmasynyń baspasóz qyzmeti jarııalady, dep habarlaıdy “Adyrna” ulttyq portaly.
Aqtaýdaǵy №1 mektepte ustazdyń oqýshyǵa daýys kóterip sóılep jatqan vıdeosy áleýmettik jelide taraǵannan keıin Mańǵystaý oblystyq Bilim basqarmasy qyzmettik tekserý júrgizdi.
Vıdeodaǵy er adam matematıka pániniń pedagogi retinde 2018 jyldyń 8 qańtarynda jumysqa qabyldanǵan.
Atalǵan oqıǵa boıynsha jınalys ótti. Muǵalim kinásin moıyndap, ata-analardan keshirim surady. Qazaqstan Respýblıkasy Eńbek kodeksiniń 64-baby 2-tarmaǵyna sáıkes muǵalimge «sógis», baqylaýdy álsiretkeni úshin mektep dırektoryna «eskertý» jarııalandy, – dep málim etti Mańǵystaý oblystyq bilim basqarmasynyń baspasóz qyzmetinen.
Mundaı jaǵdaılar qaıtalanbaý úshin óńirdiń bilim berý uıymdaryna qatań eskertý jiberildi.
