Iri urylardyń kókesi men atasy joǵary jaqta emes, Túrkistan oblysynda ekenin el jaqsy biledi. Qudaıdyń qutty kúni «Túrkistanda eden jýýshy bolyp jumysqa kirý 800 myń teńgeden bastalady» ám «aıaǵy aýyr kelinshekten aman-esen bosaný úshin qyrýar qarajat talap etipti» degendi estip-estip mesheý kúıge túskenimiz ras. Endi mine, taǵy da Túrkistan qalasy ákimdiginiń «Turǵyn úı qatynastary jáne turǵyn úı bólimi» memlekettik mekemesi «Nurly jer» baǵdarlamasy aıasynda ótkizip jatqan konkýrstarynan da ilik shyqty.
Bul keshe, búgin ǵana jarq etip shyǵa qalǵan sybaılastyq sındromy emes, jyldary boıy qatqan qasirettiń bir ushy. Bul — memlekettiń 7.20.25 baǵdarlamasyn oń jambasyna ıkemdegen ákimdikterdiń qoıyrtpaǵy.
Shart boıynsha olar úıdiń sharshy metrin elde joq baǵa 180-ge baǵalap, saǵat tili túńgi on ekini urǵanda konkýrsty bastap ketedi. Bir qyzyǵy, konkýrstyń talaptary asa qıyn emes. Basty shart: qolyńdaǵy qujattardy birinshi bolyp tirkeý. Iaǵnı tólqujat, jumys ornynan sońǵy 6 aılyq kórsetkish, jyljymaıtyn múliktiń joqtyǵyn rastaıtyn anyqtama jáne kredıttik tarıhty mejege birinshi bolyp usyna salsań jetip jatyr. Aıtpaqshy, Túrkistan turǵyndarynyń aıtýynsha, eger talapqa saı bolmasań, eshteńe etpeıdi, bastysy kópteý para ber de, shekesinen shertip júrip, qalaǵan úıińdi ala ber. Konkýrs ýaqyty 3 táýlikke sozylǵan. Dese de túngi 00:00 bolmaı jatyp, saıt miz baqpaı qatyp qalady. Qansha jerden jyldamdyǵy joǵary kompıýteriń men ǵalamtoryń bolsa da, qatyp qalǵan saıtty istete almaısyń. Qysqasyn aıtqanda, server bir mezette isten shyǵady. Qarapaıym buqara esikten eńtelep kire almaı turǵan sátte, serverdi buǵattaǵandar óz adamdarynyń qujattaryn tirkep alady. Al sosyn ýaqyt 1-2-ge jaqyndaǵanda saıt qaıta jandanyp sala beredi. Maksımaldy jyldamdyqpen kompıýterden kóz almaı otyrsań da bes júzinshi bolyp tirkelesiń. Qysqasy, konkýrsqa túsken ary ketse toqsan úıdi tek túsińde kórýge týra keledi. Bul týraly Túrkistan turǵyny Asqat Keńesuly búı deıdi.
«Konkýrsqa osymen úsh ret qatystym. Birinshisinde tirkele almadym. Ekinshisinde áıelim 1125 bolyp tirkeldi. 1.30 saǵat otyrdyq, Úshinshisinde 1435 bop tirkeldim. Konkýrstyń sharttary týraly ashyq ereje ne proess týraly aqparat joq. Qujatymyzdyń durys ne burys ekendigin de habarlamaıdy. Qysqasy, ashyqtyq joq, kúdik keledi. Bul saıt bazasymen el bolyp kúresý kerek! Eger kóp qoldanýshyǵa bir ýaqytta qyzmet kórsete almasa, onda bazany qoldanystan alyp tastaý kerek ne bolmasa kedergilerdi sheshý kerek. Menińshe, saıttyń álsizdigi «bir kisilerge» tıimdi. Óıtkeni ár páterge qol jetkizýge kómek berý quny 500 myń teńge desek, bul istiń aınalasynda bir vagon aqsha aınalýda. Iaǵnı ótken 3 qarashadan 4 qarashaǵa qaraǵan túnde bolǵan 160 úı úshin 80 mln. qarjy aınalyp tur degen sóz»…
Al,
SHYNDYQ.KZ aqparattyq portalynyń bas redaktory Aıka AITAHANOV:
«SAITAN ALǴYR SAIT. “7-20-25” baǵdarlamasynyń da shapaǵaty tımedi-aý! O, basta “úısiz-kúısiz kún keshkenderge arnalǵan” dep jarnamalap edi… Dál osy baǵdarlamada úsh ret baq synap kórdik. Baspanaly bolmaq túgili, tizimge iline almadyq. Tanystarym “óz kúshińmen óte almaısyń” dep edi. Ras eken! 500 myń teńgege IT mamanyn jaldap qana baspanaly bolýǵa bolady eken. Muny “estimedim” demeńizder. Ekiniń biri osy áńgimeni aıtyp júr. Ansar Ýserbaev myrza, siz qalaı bul baǵdarlamamen baspanaly boldyńyz? Bólise otyryńyz!» dese, Túrkistan turǵyny Naýryzbaı Asqarov: «Segiz-aq ret qatysyp, úı ala almadym» dep ókinishin bildirdi.
Túrkistan telearnasynyń tilshisi Rysgúl Dosjanova da óz feısbýk paraqshasynda 00:00-de birinshi tirkelgenge úı beretin bolsa, konkýrs nege 3 kúnge sozylatynyn túsinbeı álek.
«Osy ýaqytqa deıin qansha daýly post oqydym, talqylaý tyńdadym. Sonda da, túsinbeıtinim: aqyry, túngi 12 de kim birinshi tirkelse, sol úı alatyn bolsa, nemenege oǵan ótinish berýge 3 kún ýaqyt beresizder?! Kim kimdi aldap júr?! Túngi 00:00 bolmaq túgili, 23:55 ten bastap saıt ashylmaıdy ǵoı. Internet baılanysy dep neshe oryndy aýystyryp ta kórdik. Jaı ǵana sózim joq. Kelesi konkýrs bolǵanda bar ǵoı, kamerany qosyp qoımasam», — deıdi telearna tilshisi.
Qysqasyn aıtqanda, jaýyrdy jaba toqysań da, arzan úı qaltalylardyń qaltasynda ketýde. Osy oraıda eger, SYBAILAS JEMQORLYǴY AGENTTIGINIŃ ÓZI JEMQOR BOLMASA, bul máseleni nazarǵa alyp, sheshimin tabar degen talap-tilegimiz bar.
