"Qaraqat Ábdenge saılaý naýqanynan bas tartyp, meniń shtabyma qosylýǵa shaqyramyn". Bul pikirdi prezıdentikke kandıdat Saltanat Tursynbekova aıtty, dep jazady "Adyrna" ulttyq portaly.
"Qaraqat Ábdenge saılaý naýqanynan bas tartyp, meniń shtabyma qosylýǵa shaqyramyn. Ábden Qaraqat Jaqsylyqqyzynyń baǵdarlamasyn taldap, kezdesýlerin saraptaı kele, keı tustarda oıymyz toǵysatynyn túsinemin. Ekeýmiz de áıeldiń qoǵamdaǵy ornyn, onyń mańyzdylyǵyn aıtyp júrmiz. Biraq aıta keteıin, Qaraqat Jaqsylyqqyzynyń saıası tájirıbesi az, saılaýshylarmen kezdesýlerde onyń baǵdarlamasynyń jón-josyǵyn túsindirip, mádenı-buqaralyq is-sharalary úshin túsinikteme berýime týra keledi. Qaraqatty óz komandama shaqyramyn. Áıelderdiń daýysy basym ári anyq shyǵýy úshin biz birigýimiz kerek", - deıdi Saltanat Tursynbekova.
Ol saılaýshylardyń daýysyn ekige bólmeýge shaqyrdy.
"Saılaýshylardyń daýysyn ekige bólmeı-aq qoıaıyq. Qaraqat Jaqsylyqqyzy, saılaý naýqanynan bas tartyp, meniń komandama, shtabyma qosylyńyz. Áıelder men otbasynyń múddesin alǵa jyljytýǵa birge kúsh salaıyq! Onyń ústine, meniń qarsylasym usynatyn bastamalardyń kóbi meniń saılaýaldy baǵdarlamamnyń bir blogynda ǵana – «Halyqty áleýmettik qorǵaýda» qamtylǵan. Degenmen, men sot-quqyqtyq reformany, memlekettik ınstıtýttardy demokratııalandyrýdy, azamattyq qoǵamdy damytý úshin eleýli ózgeristerdi de usynamyn. Sonymen qatar, men quqyq qorǵaýshymyn, kóp jyldar boıy áıelderdiń quqyǵyn qorǵaýmen aınalysyp kelemin. Qazaq áıeline, qazaq otbasyna ne kerek ekenin bes saýsaǵymdaı bilemin. Taǵy da qaıtalap aıtamyn, Qaraqat Jaqsylyqqyzy, meniń komandama qosylyńyz, birge jumys istep, usynystaryńyzdy saılaýshylarǵa jan-jaqty jetkizýge ýáde beremin", - deıdi prezıdentikke úmitker Saltanat Tursynbekova.
"Adyrna" ulttyq portaly
