Jyl basynan beri dúnıede ne túrli oqıǵalar bolyp jatyr. Sonyń ishinde geosaıası qaqtyǵystardyń kesiri qarapaıym jurtqa kóp tııýde. Reseıdegi halyqtyń hálinen habardarmyz. Árıne, mundaı kezeńde olar ózgeden qoldaý kútedi. Saıasattyń isi úshin qarapaıym halqynyń kinási joq ekeni aıan. Elimizge kelip jatqan reseılikterge qoldan kelgenshe qamqorlyq jasaǵan jón dep bilemin.
Qazaq áýelden qonaqjaı, ózgege bolysyp turatyn, az ǵana azyǵyn tartyp emes, bólisip jeıtin el. Onyń dáleli jeterlik. Bir 20-ǵasyrdyń ózinde qanshama bosyp kelgen qanshama ultty baýyrymyzǵa basyp, ósirdik, túlettik. Ótken ǵasyrdyń qıly kezeńi eshkimdi aıamady. Qazir memleketimizde 100-den astam ult bar. Sonyń bári tatý bolyp, aýyzbirshiliginen jańylmaı ǵumyr keshýde. Eldiń amandyǵyn, tynyshtyǵyn qadirleı bilgenimiz durys. Prezıdent Qasym-Jomart Toqaev ta bul nárseni jıi aıtyp júr. Rasymen de, turaqtylyq – bizdiń basty baılyǵymyz.
Árkimmen arazdasqannan paıda tappaımyz. Reseılikter qamqorlyq jasaǵan jón, biraq qadaǵalaýdy da umytpaý qajet. Kómek kórsetý degen sóz bárin erkine jiberip, ózgege qaraǵanda artyqshylyq berý degen emes. Ýaqytsha kelgenin, ári ketse 3 aı júre alatynyn bilemiz. Zańdarymyzǵa baǵynyp, tártipke qulaq asýy tıis. Saqtyqty umytpaǵan abzal, áıtpese ortada nebir arandatýshylar bar. Jalǵan aqparatty jurtqa jaıyp, japa shektirýi múmkin. Sondyqtan bul baǵytta azamattardyń qaýipsizdigine basa nazar aýdaryp, eldi sabyr men aqylǵa shaqyrǵan durys. Elimiz alda mańyzdy kezeńderden ótkeli tur. Halyqtyń aýyzbirshiligi, tutastyǵyn joǵaltpaýy tutas múddemizge aınalýy kerek. Halyq pen bılik úndestik tabýy tıis. Osy turǵydan qaraǵanda, ulttyq memleket qurý jolynda basynan san-sapalaq qıyndyqtardy ótkizip, osy kúnge jetkenQazaqstan sııaqty kóp ult ókilderi turatyn qazirgi táýelsiz jurtymyzdyń bolashaǵyn baǵdarlap, baǵytymyzdy anyqtaýda beıbitshiliktiń orny erekshe.
Faýzııa Orazbaeva, professor
