Jýrnalıst, tanymal telejúrgizýshi Láılá Sultanqyzy oqyrmandaryn óz ana tilin qurmetteýge shaqyrdy. Kúndelikti tirlikte qazaqsha sóılep, qazaq tiliniń qoldanysyn barynsha jandandyrýǵa úgittedi, dep habarlaıdy "Adyrna" ulttyq portaly.
"Senbi ǵoı, bala-shaǵany trenırovkaǵa jiberip, japon restoranyna bardyq. Zalda adam toly. Ofııant qazaqtyń qyzy, orysshaǵa sýdaı, menıýdy túsindire bastady. Qazaqsha sóıleı bastap edim, apaı, mynaý sýshı kúshti, sashımıdiń dámi tilińizdi úıiredi, sorpalaryndaǵy kalorııa tómen, balyqty sondaı jerden arnaıy aldyramyz dep jarnamalaǵanda barlyǵyn jegim ketti" - dep jazdy jýrnalıst.
Qazaq tiliniń qoldanysyna qatysty alańdaýshylyq bildirip:
"Sińlimniń ishi tolyp qalǵan-aý, jıi kelip turyńyzshy, munda qazaqsha sóıleıtinder az keledi dep shyǵaryp saldy. Restoranǵa barsańdar qazaqsha sóıleńdershi ótinish, ofııanttyń bári negizi qazaqsha túsinedi jáne sóıleıdi", - dep jalǵady óz sózin avtor.
Esterińizge sala keteıik, osyǵan deıin de Láılá Sultanqyzy qazaqsha ótpeıtin aýqymdy sharaǵa barýdan bas tartyp, til mártebesin saqtaýǵa qatysty berik azamattyq ustanymymen el yqylasyna bólengen edi. Telejúrgizýshi kóp jyldardan beri ana tilimizde túrli baǵdarlamalardy júrgizip keledi, eńbek jolyn radıodaǵy dıdjeılikten bastaǵan. Sonymen qatar, ulttyq aqparat keńistiginiń qazaqylanýyna yqpal etken mamandardyń biri.
