Qazaq televiziiasynda köp jyldar önımdı eŋbek etken ardager-jurnalist, qazaq ruhaniiatyna sübelı üles qosqan jazuşy Gülmäriia Barmanbekova şetelge köşıp ketıp, Qazaq elın, tūtas qauymdy qaralaityndarǧa syn aitty. Jazuşy tuǧan jer, ösken öŋırın, ūltyn süiuge, memleketın güldendıruge at salysuǧa şaqyrdy. Būl jaily "Adyrna" ūlttyq portaly jazdy.
- Qazaqstannan qaşqandar ǧana emes, elımızdı halyqaralyq qauymdastyqqa jamanatty etıp körsetuge janyn salyp tyrysyp jürgen, şetelde ömır sürıp, sol eldıŋ azamaty atanǧan qazaqtar da bar. Bärı emes, ärine, ışınara. Özı tūryp jatqan eldegı türlı BAQ-tarda, äleumettık jelılerde, Qazaqstan bilıgı turaly jaǧymsyz aqparattardy jahanǧa jariia etedı.Ūrymtal, qysyltaiaŋ şaqta eldegı joq-jıtıkterge itke süiek laqtyrǧandai azyn-aulaq kömek ūiymdastyryp, özınşe qamqorsi qalady. Osylaişa qarapaiym halyqtyŋ közıne özın keremet janaşyr etıp körsetu arqyly bilık pen ekı araǧa ot salady. Mūndaidy sabannyŋ astynan su jıberıp qoiyp, syrtynan qyzyqtap otyratyn zymiiandyq deidı, - dep tereŋnen tolǧady avtor.
Jazuşy öz jazbasynyŋ jalǧasynda şetelge ketkenderdıŋ Otanyna opasyzdyq ıstegen qareketın synǧa alyp, aiyptady. Qazaq elınıŋ kemel keleşegı men zor bolaşaǧynan ümıttı ekendıgın jetkızdı.
- İä, onyŋ [jamandaityndardyŋ] türı kädımgı qaradomalaq qazaq balasy. Bıraq jüregı äldeqaşan böten dep soǧatyn bolǧan. Nietı tüzu emes. Oiy aram. Jany aşyǧan bolyp, ötırık kölgırsidı. Qarapaiym halyqtyŋ bılmegenın bıldırgen bolyp, bılgırsidı. Ondailardy qazaq "şırıgen jūmyrtqa" dep qoiady. Damyǧan elde qarny toq, köilegı kök, qaiǧysy joq, tūryp jatyr eken, öz jönımen tūra berse qaitedı eken? Qazaqstannyŋ qamyn jep, tırlıgın küitteu solarǧa qalyp pa? Olarsyz da qazaq elınıŋ taŋy atyp, tauyǧy şaqyrǧan. Şaqyra beredı de!Ūlty üşın sonşa jany küiedı eken, nege kelmeidı Qazaqstanǧa? Nege eŋbek sıŋırmeidı elge? Nege ūrpaǧyn ūltjandy etıp tärbielemeidı? Nege elmen bırge u ışse u ışıp, su ışse su ışıp, ystyǧyna bırge küiıp, suyǧyna bırge toŋbaidy? Sondai demokrat, sondai parasatty eken, nege ädılettı Qazaqstandy bırge ornatpaidy? Joq, olarǧa özderı tūryp jatqan eldegıdei joǧary eŋbekaqy, keremet jaǧdai tuǧyzu kerek! Olai bolmasa, elmen bırge qabyrǧasyn qaiystyrǧysy kelmeidı. Öite almaidy eken, aidalada otyryp alyp, auzdaryna kelgendı ottap, el ışıne ırıtkı salǧandaryna jön bolsyn!Jaman ba, jaqsy ma, būl - bızdıŋ el. Özımız taŋdaǧan bilıgımızdıŋ kemşılıgı bolsa, özımız turalap alamyz. Özge el pysyqailarynyŋ kömegınsız-aq, öz qotyrymyzdy özımız qasyp alamyz! Eşkım bızdıŋ basymyzǧa jūmaq ornatpai-aq qoisyn! - dedı Gülmäriia Barmanbekova.
Esterıŋızge sala keteiık, avtordyŋ būlai oi tolǧap, syn aituyna iutub hostingındegı "Zubaida patriot" atty qoldanuşynyŋ Qazaqstanǧa qatysty közqarasy sebep bolǧan.
"Adyrna" ūlttyq portaly
Ūqsas jaŋalyqtar
