Üş balasynan aiyrylǧan äiel 51 jasynda qaitadan ana atandy

454
Adyrna.kz Telegram
https://adyrna.kz/storage/uploads/bJASePCrLU9wvQlsd7BS0IFaofNPIaPCmbrq5xvI.webp

Foto: lada.kz

Maŋǧystau oblysynda ötken jyly üş bırdei perzentınen aiyrylǧan 51 jastaǧy Kümısai Palekeeva qaitadan ana atandy. Ol 17 qaraşada qyz balany düniege äkeldı. Būl turaly Lada.kz basylymy jazdy, dep habarlaidy "Adyrna".

Qaiǧyly oqiǧa byltyr Mūnaily audanyna qarasty Qalamqas tūrǧyn alabynda bolǧan. Kümısai Palekeevanyŋ üş balasy uly gazdan ulanyp, köz jūmǧan. Marqūmdardyŋ ülkenı 1995 jyly, ūly 2009 jyly, al kenje qyzy 2012 jyly düniege kelgen.

Qaraly jaǧdaidan keiın erlı-zaiyptyǧa ekstrakorporaldy ūryqtandyru (EKŪ) räsımınen tegın ötuge mümkındık beretın sertifikat tabystalǧan. Osylaişa, olar taǧy bır säbi süiıp, otbasyn tolyqtyruǧa şeşım qabyldaǧan.

Kümısai 51 jasynda qaitadan ana atanatynyna bastapqyda senbegenın aitady. Onyŋ sözınşe, balalarynan aiyrylǧannan keiın üi ışı bosap, ömırlerınde ülken orny tolmas qaiǧy qalǧan.

«Balalarymnan aiyrylǧan soŋ, üiımız qaŋyrap bos qaldy. Sol kezde EKŪ arqyly bolsa da bala köterıp, düniege äkelsem dep şeştım. Qasymyzda süienış bolatyn, qamqorlyq tanytatyn jan bolsa, ömır süruge, alǧa ūmtyluǧa küş tabarmyz dep oiladym», – dedı ol.

Köpten kütken säbi kesar tılıgı arqyly düniege kelgen. Närestenıŋ salmaǧy 3400 gramm, boiy 52 santimetr. Därıgerlerdıŋ mälımetınşe, jüktılık kezınde eşqandai asqynu bolmaǧan. Qazır ana men balanyŋ jaǧdaiy jaqsy.

Närestege Ariia esımı berılgen. Būl esımdı säbidıŋ äkesı taŋdaǧan. Kümısai qyzynyŋ alǧaşqy dauysyn estıgen sättegı sezımın erekşe tolqynyspen eske alady. Qazır anasy bar uaqytyn säbiınıŋ kütımıne arnap, osy quanyşqa sebepker bolǧan jandarǧa alǧysyn bıldırıp otyr.

Aita keteiık, otbasy biyl taǧy bır maŋyzdy şeşım qabyldaǧan. Qyrküiek aiynda erlı-zaiypty 13 jastaǧy ūl balany asyrap alǧan. Osylaişa, otbasy jaŋa müşelermen tolyǧyp, ömırın qaita jalǧastyruǧa mümkındık alǧan.

Pıkırler