2027 jyldan bastap 77 myŋnan astam därıgerdıŋ jalaqysy 40%-ǧa deiın ūlǧaiady. Būl turaly Ükımet otyrysynda Densaulyq saqtau ministrı Aqmaral Älnazarova baiandady, dep habarlaidy «Adyrna» tılşısı.
«Memleket basşysynyŋ tapsyrmasy şeŋberınde kadrlyq äleuettı nyǧaitu jäne medisinalyq-sanitariialyq alǧaşqy kömek jüiesındegı jūmystyŋ tartymdylyǧyn arttyru maqsatynda 2027 jylǧy 1 qaŋtardan bastap uchaskelık qyzmet mamandaryna saralanǧan qosymşa aqy belgıleu ūsynylady. Emhana jüiesınde jūmys ısteitın uchaskelık qyzmet mamandarynyŋ jalaqysy üzdıksız eŋbek ötılın eskere otyryp 40%-ǧa deiın ūlǧaiady»,— dep atap öttı ministr.
Öŋırlerde audandyq auruhanalar, jedel järdem stansalary men qan ortalyqtaryn qosa alǧanda, 70-ke juyq jaŋa medisinalyq nysan salu josparlanuda. Onyŋ ışınde 8 perinataldyq ortalyq, 7 köpbeiındı balalar auruhanasy, Balalar şūǧyl kömek körsetu ortalyǧy jäne Balalar hirurgiiasy ortalyǧy bar. Sondai-aq Balalardy oŋaltudyŋ ūlttyq ortalyǧynyŋ 5 jaŋa ülgılık öŋıraralyq filialyn jäne 25 ambulatoriialyq-emhanalyq nysandy salu josparlanǧan.
«Jobalardy jüzege asyru 1,8 mln şarşy metr medisinalyq infraqūrylymdy qūruǧa jäne jaŋartuǧa, stasionarlardaǧy tösek sanyn 9,2 myŋǧa ūlǧaituǧa jäne jaŋǧyrtuǧa, sondai-aq ambulatoriialyq kömek quatyn auysymyna 5 myŋnan astam keluşıge köbeituge mümkındık beredı»,— dedı Aqmaral Älnazarova.
