2027 جىلدان باستاپ 77 مىڭنان استام دارىگەردىڭ جالاقىسى 40%-عا دەيىن ۇلعايادى. بۇل تۋرالى ۇكىمەت وتىرىسىندا دەنساۋلىق ساقتاۋ ءمينيسترى اقمارال ءالنازاروۆا باياندادى، دەپ حابارلايدى «ادىرنا» ءتىلشىسى.
«مەملەكەت باسشىسىنىڭ تاپسىرماسى شەڭبەرىندە كادرلىق الەۋەتتى نىعايتۋ جانە مەديتسينالىق-سانيتاريالىق العاشقى كومەك جۇيەسىندەگى جۇمىستىڭ تارتىمدىلىعىن ارتتىرۋ ماقساتىندا 2027 جىلعى 1 قاڭتاردان باستاپ ۋچاسكەلىك قىزمەت ماماندارىنا سارالانعان قوسىمشا اقى بەلگىلەۋ ۇسىنىلادى. ەمحانا جۇيەسىندە جۇمىس ىستەيتىن ۋچاسكەلىك قىزمەت ماماندارىنىڭ جالاقىسى ۇزدىكسىز ەڭبەك ءوتىلىن ەسكەرە وتىرىپ 40%-عا دەيىن ۇلعايادى»،— دەپ اتاپ ءوتتى مينيستر.
وڭىرلەردە اۋداندىق اۋرۋحانالار، جەدەل جاردەم ستانسالارى مەن قان ورتالىقتارىن قوسا العاندا، 70-كە جۋىق جاڭا مەديتسينالىق نىسان سالۋ جوسپارلانۋدا. ونىڭ ىشىندە 8 پەريناتالدىق ورتالىق، 7 كوپبەيىندى بالالار اۋرۋحاناسى، بالالار شۇعىل كومەك كورسەتۋ ورتالىعى جانە بالالار حيرۋرگياسى ورتالىعى بار. سونداي-اق بالالاردى وڭالتۋدىڭ ۇلتتىق ورتالىعىنىڭ 5 جاڭا ۇلگىلىك وڭىرارالىق فيليالىن جانە 25 امبۋلاتوريالىق-ەمحانالىق نىساندى سالۋ جوسپارلانعان.
«جوبالاردى جۇزەگە اسىرۋ 1,8 ملن شارشى مەتر مەديتسينالىق ينفراقۇرىلىمدى قۇرۋعا جانە جاڭارتۋعا، ستاتسيونارلارداعى توسەك سانىن 9,2 مىڭعا ۇلعايتۋعا جانە جاڭعىرتۋعا، سونداي-اق امبۋلاتوريالىق كومەك قۋاتىن اۋىسىمىنا 5 مىڭنان استام كەلۋشىگە كوبەيتۋگە مۇمكىندىك بەرەدى»،— دەدى اقمارال ءالنازاروۆا.
