Qazaqstan Respublikasy Täuelsızdıgınıŋ 35 jyldyǧy qarsaŋynda respublikalyq patriottyq änder baiqauy jariialandy. Baiqau Otan, tuǧan jer jäne el bırlıgı taqyrybyndaǧy jaŋa tuyndylardy tanytuǧa, talantty avtorlardy anyqtauǧa jäne zamanaui patriottyq änder qoryn tolyqtyruǧa baǧyttalady.
Baiqauǧa elımızdıŋ barlyq öŋırınen aqyndar men kompozitorlar, sonyŋ ışınde şyǧarmaşylyq jolyn endı bastaǧan avtorlar qatysa alady. Būǧan deiın jariialanbaǧan jäne oryndalmaǧan änder qabyldanady.
Baiqau üş baǧyt boiynşa ötedı. Olar: saltanatty patriottyq änder, lirikalyq patriottyq änder jäne zamanaui patriottyq änder. Qatysuşylar bır nemese bırneşe baǧyt boiynşa şyǧarma ūsyna alady.
Tuyndylardy kompozitorlar, aqyndar men muzyka mamandarynan qūralǧan sarapşylar keŋesı baǧalaidy. Sarapşylar baǧa berude ännıŋ äuenı, mätınınıŋ sapasy, avtorlyq ideiasynyŋ tyŋ boluy jäne tyŋdarmanǧa äserın negızge alady.
Sarapşylar keŋesınıŋ müşesı, aqyn Qalqaman Sarinnıŋ aituynşa, baiqau Otan men ūlttyq bolmys taqyrybyn arqau etetın ärı tyŋdarman köŋılınen şyǧatyn änderdıŋ jazyluyn közdeidı.
Baiqaudyŋ jalpy jülde qory – 30 million teŋge. Qarajatty demeuşıler bölgen. Jüldeler tömendegıdei belgılengen:
Bas jülde – 6 million teŋge;
I oryn – ärqaisysy 4 million teŋgeden üş jülde;
II oryn – ärqaisysy 3 million teŋgeden üş jülde;
III oryn – ärqaisysy 1 million teŋgeden üş jülde.
Ötınımder 2026 jylǧy 5 jeltoqsanǧa deiın khabar.kz/konkurs saitynda qabyldanady. Jeŋımpazdar Qazaqstan Respublikasynyŋ Täuelsızdık künı qarsaŋynda jariialanady.
Jobanyŋ bas aqparattyq serıktesı – "Habar" agenttıgı" AQ.
