Şymkentte Memleket basşysy Qasym-Jomart Toqaevtyŋ jaŋǧyrtu kün tärtıbıne arnalǧan «Reformalar mänı: Qazaqstannyŋ bolaşaq tarihynyŋ jetı tarauy» atty kıtaptyŋ tanystyrylymy öttı.
Is-şara barysynda kıtap avtory, memleket jäne qoǧam qairatkerı Mäulen Äşımbaev öŋırdıŋ ǧylymi jäne şyǧarmaşylyq ziialy qauym ökılderımen, sarapşylarmen jäne qoǧam belsendılerımen bırge Memleket basşysynyŋ bastamasymen elımızde jüzege asyrylyp jatqan saiasi, ekonomikalyq jäne äleumettık özgerısterdıŋ negızgı baǧyttaryn talqylady. Sondai-aq sapar aiasynda Mäulen Äşımbaev jergılıktı bochcha federasiiasynyŋ ökılderımen jäne öŋır jastarymen kezdestı.
Kıtaptyŋ tanystyrylymy M.Äuezov atyndaǧy Oŋtüstık Qazaqstan zertteu universitetınde öttı. Kezdesu barysynda avtor Memleket basşysy Qasym-Jomart Toqaevtyŋ bastamasymen jüzege asyrylyp jatqan reformalardyŋ tarihi maŋyzy men el bolaşaǧyna yqpaly turaly öz paiymyn ortaǧa saldy.
Kıtapta memlekettık basqarudy jaŋǧyrtu, saiasi jäne ekonomikalyq özgerıster, öŋırlık damu, ūlttyq bıregeilık, sondai-aq Qazaqstannyŋ halyqaralyq arenadaǧy orny men bedelın aiqyndau mäselelerı qarastyrylady.
Mäulen Äşımbaev öz sözınde Prezident reformalarynyŋ mänı men mazmūnyn aşatyn bırqatar negızgı mäselege toqtaldy.
«Ädılettı Qazaqstan» ideiasynyŋ tüpkı mänı – «memleket memleket üşın» degen tüsınıkten «memleket adam üşın» qaǧidatyna tübegeilı bet būru. El damuynyŋ jaŋa paradigmasynyŋ negızınde adam jäne onyŋ müddelerı tūr. Būl ūstanym jaŋa Konstitusiiada naqty köretılgen», – dedı Mäulen Äşımbaev.
Avtor Konstitusiiada bekıtılgen qūndylyqtar elımızdıŋ ūzaq merzımdı damu maqsattaryn aiqyndaitynyn da atap öttı.
Sonymen qatar kezdesuge qatysuşylar eldıŋ tehnologiialyq äleuetın nyǧaitu jäne sifrlyq damudyŋ jaŋa mümkındıkterın tiımdı paidalanu mäselelerın talqylady. Mäulen Äşımbaevtyŋ aituynşa, jahandyq özgerıster Qazaqstan üşın jaŋa mümkındıkterge jol aşady. Mūndai jaǧdaida älemde bolyp jatqan üderısterden şet qalmai, olardyŋ belsendı qatysuşysyna ainalu maŋyzdy.
Şymkentke sapary aiasynda Mäulen Äşımbaev «Metallurg» sport keşenıne baryp, öŋırlık bochcha qūramasynyŋ sportşylarymen kezdestı. Ol jattyǧu barysymen tanysyp, parasportşylarmen, mügedektıgı bar balalardyŋ ata-analarymen jäne jattyqtyruşylar qūramymen inkliuziia mädenietın ılgerıletu mäselelerın talqylady.
Kezdesude Mäulen Äşımbaev şymkenttık sportşylardyŋ jetıstıkterıne toqtalyp, soŋǧy ekı jylda qalada bochcha sportymen ainalysuşylar sany edäuır artqanyna nazar audardy. Öŋırlık komandanyŋ ökılderı respublikalyq jarystarǧa belsendı qatysyp, jüldelı oryndarǧa ie bolyp jür. Sondai-aq, Şymkentte İnkliuzivtı sport ortalyǧynyŋ salynuy sportşylardyŋ tūraqty jattyǧuyna jäne jarystarǧa daiyndaluyna qosymşa mümkındıkter aşatyny aityldy.
«Aralaryŋyzdan ūlttyq qūramanyŋ bolaşaq müşelerı men halyqaralyq jarystardyŋ jeŋımpazdary şyǧatynyna senımdımın. Bız aldaǧy uaqytta da sızderge qoldau körsete beremız. Jattyqtyruşylaryŋyzben bırlesıp, el namysyn halyqaralyq arenada laiyqty qorǧaularyŋyz üşın qajettı jaǧdailar jasau baǧytynda jūmys ısteimız», – dedı Mäulen Äşımbaev.
Şymkentke sapar Dostyq üiınde Mäulen Äşımbaevtyŋ qala jastarymen kezdesuımen tüiındeldı. Aşyq dialog formatynda qatysuşylar Memleket basşysynyŋ bastamasymen jüzege asyrylyp jatqan reformalardyŋ öskeleŋ ūrpaqqa beretın mümkındıkterın, jastardyŋ eldegı özgerısterge qatysuyn jäne qoǧam aldyndaǧy jauapkerşılıgın talqylady.
