15 qazanda Respublika saraiynda ötken BE WOMAN ASIA 2026 halyqaralyq forumynda äielderdıŋ şeşım qabyldauǧa qatysuy, bılım men käsıptegı mümkındıkterı, tehnologiialyq özgerıster jäne qoǧam aldyndaǧy jauapkerşılık mäselelerı talqylandy. Biylǧy «Etikalyq küş» taqyryby qatysuşylardy yqpaldyŋ auqymy ǧana emes, onyŋ adam men qoǧam ömırıne äserı turaly oi bölısuge şaqyrdy.
Forumnyŋ aşyluynda mädeniet salasyna jauapty vise-ministr Evgenii Kochetov Erlan Qarinnıŋ qūttyqtau hatyn oqydy. Onda Qazaqstandaǧy äielderdıŋ qoǧamdyq jäne memlekettık ömırge qatysuy, genderlık teŋdık, äielder käsıpkerlıgın qoldau jäne otbasylyq-tūrmystyq qatynastar salasyndaǧy zaŋnamalyq özgerıster atap ötıldı. Halyqaralyq forumnyŋ mänı de osy mäselelerdı är eldıŋ täjıribesı arqyly talqylauǧa mümkındık beruınde.
Baǧdarlama «Ūmai», «Tomiris», BE WOMAN Talks jäne Mentor Hub alaŋdarynda qatar jürdı. Negızgı sahnalardaǧy baiandamalar men pıkırtalastarǧa qosa, qatysuşylar sarapşylarmen tıkelei kezdesıp, käsıpkerlık, käsıbi damu jäne jaŋa bastamalar turaly keŋestı.
BŪŪ Äielder qūrylymynyŋ Qazaqstandaǧy eldık keŋsesınıŋ ökılı ärı Ortalyq Aziiadaǧy bailanys keŋsesınıŋ basşysy Djeren Giuven Giures teŋsızdık, äielderge qatysty zorlyq-zombylyq, aqy tölenbeitın eŋbek pen tehnologiia salasyndaǧy alşaqtyqty derekter arqyly sipattady. Onyŋ baiandamasynda qazırgı qarqyn saqtalsa, genderlık teŋdıkke jetuge 171 jyl qajet boluy mümkın ekenı jäne jasandy intellekt salasyndaǧy mamandardyŋ 22 paiyzy ǧana äielder ekenı aityldy. Būl sandar teŋ mümkındık mäselesınıŋ bılım berumen şektelmeitının, eŋbek naryǧy men şeşım qabyldau deŋgeiınde de özgerıs qajet ekenın körsettı.
Kambodjanyŋ äielder ısterı jönındegı ministrı İng Kanta Pavi sifrlyq tehnologiialar men jasandy intellekt damyǧan kezeŋde köşbasşynyŋ jauapkerşılıgı arta tüsetının atap öttı. Onyŋ paiymynşa, tehnologiianyŋ paidasy qoǧamǧa qanşalyqty ädıl bölınetını ony engızetın adamdardyŋ şeşımıne bailanysty.
Forumdaǧy jeke täjıribege qūrylǧan baiandamalardyŋ bırı — Tilu EdTech negızın qalauşy, Garvard tülegı Äsel Amangeldınıŋ «Arystan Garvardqa deiın» atty sözı. Arys qalasynda ösken käsıpker bılım jolyndaǧy jetıstıgın otbasynan alǧan senımmen bailanystyrdy. Ata-anasynan aiyrylǧannan keiın de sol tärbie onyŋ ömırlık tıregıne ainalǧan. Ol ana atanyp, öz kompaniiasyn qūrǧannan keiın, bır jasar balasyn tärbielep jürıp Garvardqa oquǧa tüsken.
Äsel Amangeldı Qazaqstanda joǧary bılım alatyn äielder köp bolǧanymen, eŋbekaqy aiyrmaşylyǧy saqtalyp otyrǧanyna nazar audardy. Onyŋ negızgı oiy — qyz balanyŋ bılım aluyna mümkındık jasau ǧana emes, otbasyn, ǧylymdy, käsıptı nemese mansapty öz erkımen taŋdau qūqyǧyn qamtamasyz etu. «Är qyzdyŋ öz bolaşaǧyn özı taŋdauy sirek būiyratyn mümkındık emes, qalypty jaǧdai boluy kerek», – dedı ol.
Ulysmedia.kz basylymynyŋ negızın qalauşy ärı bas redaktory Samal İbraeva qazaqtıldı täuelsız medianyŋ yqpaly men jauapkerşılıgıne toqtaldy. Ol söz bostandyǧy, jurnalistık etika, qoǧam men bilık arasyndaǧy aşyq dialog jäne äiel jurnalisterge jasalatyn qysym turaly aitty. Baiandamasynda Ortalyq Aziiadaǧy äiel jurnalisterdıŋ 75 paiyzy türlı qysymǧa tap bolatyny jönındegı derektı keltırdı. Būl körsetkış spikerdıŋ mälımdemesı retınde berılıp otyr.
«Oskar» syilyǧynyŋ ekı dürkın iegerı, rejisser Şarmin Obaid-Chinoidyŋ qatysuy da forumnyŋ qoǧamdyq taqyryptaryna öner tūrǧysynan qarauǧa jol aşty. Onyŋ derektı kino salasyndaǧy jūmysy nazardan tys qalǧan oqiǧalardy köpşılıkke jetkızudıŋ jäne qoǧamdyq pıkır qalyptastyrudyŋ maŋyzyn körsetedı.
Ortalyq Aziianyŋ mädeni yntymaqtastyǧyna arnalǧan talqylauda Özbekstannyŋ Mädeniet jäne önerdı damytu qorynyŋ töraiymy Gaiane Umerova aimaq elderınıŋ mädeni mūrasyn bırlese tanytu mäselesın köterdı. Käsıpker Danna Qaraǧūsova halyqaralyq mädeni jobalardy üilestıru jäne memleket pen biznestıŋ serıktestıgın damytu jönınde ūsynys aitty. Äŋgıme mädeniettı tanystyrumen qatar, ony turizm jäne kreativtı ekonomika mümkındıkterımen ūştastyruǧa arnaldy.
BE WOMAN ASIA 2026 baǧdarlamasyndaǧy ärtürlı taqyryp bır ortaq tūjyrymǧa toǧysty: äielderdıŋ äleuetın ıske asyru üşın jeke tabandylyqpen qatar, ädıl erejeler, qoljetımdı mümkındıkter jäne jauapty köşbasşylyq qajet. Forum halyqaralyq täjıribe men jergılıktı mäselelerdı qatar talqylap, qatysuşylarǧa käsıbi bailanys ornatuǧa mümkındık berdı.
