Şymkentte Halyqaralyq qarttar künıne orai qalanyŋ bes audanynyŋ ardagerlerın bırıktırgen sporttyq turnir ūiymdastyryldy. 60 adam qatysqan dästürlı saiys biyl segızınşı ret ötkızıldı.
Turnirdıŋ aşylu saltanatynda Şymkent qalasy äkımınıŋ orynbasary Särsen Qūranbek söz söiledı. Ol qalalyq ardagerler keŋesınıŋ atqaryp jatqan jūmysyna joǧary baǧa berıp, aǧa buyn ökılderıne airyqşa qūrmet körsetu qajettıgın atap öttı.
Qala ardagerlerı qoǧamdyq ömırge belsene aralasyp, jastarǧa densaulyqty baǧalaudyŋ, bır-bırıne qoldau körsetudıŋ ülgısın körsetıp keledı. Aǧa buyn ökılderı elımız ben qalamyzdyŋ damuyna zor üles qosyp, salamatty ömır saltyn nasihattau ıs-şaralaryna da belesene qatysady.
Baǧdarlamaǧa sporttyŋ bes türı engızılgen. Olar – biliard, üstel tennisı, şahmat, doiby jäne voleibol. Är qatysuşy aldymen öz audanynda ırıkteuden ötıp, üzdıkterı qalalyq finaldyq kezeŋde bas qosty. Jarystardy ötkızu üşın arnaiy sport zaldary äzırlengen. Jarys barysynda jeŋımpazdar men jüldegerler anyqtalyp, olarǧa medaldar, kuboktar men gramotalar tabystalady. Degenmen ūiymdastyruşylardyŋ aituynşa, būl turnirdıŋ mänı jüldelı oryndar üşın kürespen ǧana şektelmeidı.
– Bızdıŋ maqsatymyz – ardagerler arasynda sportpen tūraqty şūǧyldanudy nasihattau, olardyŋ belsendılıgın arttyryp, densaulyǧyn nyǧaitu. Eŋ bastysy – jarystyŋ nätijesı emes, sportqa degen qyzyǧuşylyq. Bız aǧa buyn ökılderınıŋ köbırek qozǧalyp, jiı jüzdesıp, qala ömırıne belsendı aralasa bergenın qalaimyz, – deidı qalalyq ardagerler keŋesınıŋ töraǧasy Kenjehan Tölebaev.
Onyŋ aituynşa, mūndai turnir qalada tūraqty ötkızılude. Osy jyldar ışınde turnir ärtürlı audanda tūratyn, bıraq ruhani jaqyndyǧy men ortaq qyzyǧuşylyqtary bar adamdardy bırıktıretın jaqsy dästürge ainaldy.
Ardagerlerdıŋ jıgerı men qala ömırıne aralasuǧa degen qūlşynysy, öz qatarlastyrmen saiysqa tüsuı qūrmetke ǧana emes, qoldauǧa da laiyq. Būl ıs-şaranyŋ jastarǧa da berer taǧylymy mol.
