Syrtqy ıster ministrı Mūhtar Tıleuberdı AQŞ Memlekettık hatşysy Marko Rubiomen kezdestı. Būl turaly bügın, 19 qazanda ministrlıktıŋ baspasöz qyzmetı jazdy, dep habarlaidy «Adyrna» tılşısı.
Ekı eldıŋ syrtqy saiasi vedomstvolarynyŋ basşylary sauda-ekonomikalyq jäne investisiialyq yntymaqtastyqty nyǧaituǧa basa nazar audara otyryp, keŋeitılgen strategiialyq ärıptestıktı odan ärı damytu perspektivalaryn talqylaǧan.
Taraptar ekıjaqty qatynastardyŋ oŋ serpının atap ötıp, praktikalyq özara ıs-qimyldy keŋeituge, tauar ainalymyn ūlǧaituǧa jäne bırlesken investisiialyq jobalardy ıske asyruǧa özara müddelılıgın rastaǧan.
Prezident Qasym-Jomart Toqaevtyŋ AQŞ prezidentı Donald Tramppen 2025 jylǧy qaraşada ötken kezdesuınıŋ qorytyndylaryn qosa alǧanda, joǧary deŋgeide qol jetkızılgen uaǧdalastyqtardy ıske asyruǧa erekşe nazar audarylǧan.
Mūhtar Tıleuberdı ıskerlık bailanystardy nyǧaitudyŋ, amerikalyq investisiialar men ozyq tehnologiialardy tartudyŋ, sondai-aq energetika, asa maŋyzdy mineraldar, sifrlandyru, kölık jäne logistika salalaryndaǧy yntymaqtastyqty damytudyŋ maŋyzdylyǧyn atap ötken.
Sondai-aq taraptar Maiamide 14-15 jeltoqsanda ötetın G20 sammitıne daiyndyq mäselelerı jönınde pıkır almasqan.
Būdan bölek, Marko Rubio G20 sammitınen keiın Qazaqstanǧa tolyq formattaǧy saparmen keluge müddelı ekenın rastaǧan.
Kezdesu qorytyndysy boiynşa Qazaqstan-Amerika keŋeitılgen strategiialyq ärıptestıgın odan ärı nyǧaituǧa jäne naqty praktikalyq nätijelerge qol jetkızuge özara müddelılık rastaldy.
Būǧan deiın AQŞ memlekettık hatşysy Marko Rubio Samarqand qalasyna barǧanyn jazǧan edık.
