سىرتقى ىستەر ءمينيسترى مۇحتار تىلەۋبەردى اقش مەملەكەتتىك حاتشىسى ماركو رۋبيومەن كەزدەستى. بۇل تۋرالى بۇگىن، 19 قازاندا مينيسترلىكتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
ەكى ەلدىڭ سىرتقى ساياسي ۆەدومستۆولارىنىڭ باسشىلارى ساۋدا-ەكونوميكالىق جانە ينۆەستيتسيالىق ىنتىماقتاستىقتى نىعايتۋعا باسا نازار اۋدارا وتىرىپ، كەڭەيتىلگەن ستراتەگيالىق ارىپتەستىكتى ودان ءارى دامىتۋ پەرسپەكتيۆالارىن تالقىلاعان.
تاراپتار ەكىجاقتى قاتىناستاردىڭ وڭ سەرپىنىن اتاپ ءوتىپ، پراكتيكالىق ءوزارا ءىس-قيمىلدى كەڭەيتۋگە، تاۋار اينالىمىن ۇلعايتۋعا جانە بىرلەسكەن ينۆەستيتسيالىق جوبالاردى ىسكە اسىرۋعا ءوزارا مۇددەلىلىگىن راستاعان.
پرەزيدەنت قاسىم-جومارت توقاەۆتىڭ اقش پرەزيدەنتى دونالد ترامپپەن 2025 جىلعى قاراشادا وتكەن كەزدەسۋىنىڭ قورىتىندىلارىن قوسا العاندا، جوعارى دەڭگەيدە قول جەتكىزىلگەن ۋاعدالاستىقتاردى ىسكە اسىرۋعا ەرەكشە نازار اۋدارىلعان.
مۇحتار تىلەۋبەردى ىسكەرلىك بايلانىستاردى نىعايتۋدىڭ، امەريكالىق ينۆەستيتسيالار مەن وزىق تەحنولوگيالاردى تارتۋدىڭ، سونداي-اق ەنەرگەتيكا، اسا ماڭىزدى مينەرالدار، تسيفرلاندىرۋ، كولىك جانە لوگيستيكا سالالارىنداعى ىنتىماقتاستىقتى دامىتۋدىڭ ماڭىزدىلىعىن اتاپ وتكەن.
سونداي-اق تاراپتار ماياميدە 14-15 جەلتوقساندا وتەتىن G20 سامميتىنە دايىندىق ماسەلەلەرى جونىندە پىكىر الماسقان.
بۇدان بولەك، ماركو رۋبيو G20 سامميتىنەن كەيىن قازاقستانعا تولىق فورماتتاعى ساپارمەن كەلۋگە مۇددەلى ەكەنىن راستاعان.
كەزدەسۋ قورىتىندىسى بويىنشا قازاقستان-امەريكا كەڭەيتىلگەن ستراتەگيالىق ارىپتەستىگىن ودان ءارى نىعايتۋعا جانە ناقتى پراكتيكالىق ناتيجەلەرگە قول جەتكىزۋگە ءوزارا مۇددەلىلىك راستالدى.
بۇعان دەيىن اقش مەملەكەتتىك حاتشىسى ماركو رۋبيو سامارقاند قالاسىنا بارعانىن جازعان ەدىك.
