Elordada Creative Aimaq respublikalyq jobasy aiasynda «Aqtobe Creative Days mädeni-kreativtı körme-järmeŋkesı jūmysyn bastady. Ekı künge josparlanǧan şarada Aqtöbe oblysynyŋ 100-den astam kreatory 30-ǧa juyq baǧyt boiynşa avtorlyq önımderın, şyǧarmaşylyq jobalary men jergılıktı brendterın tanystyrady.
Is-şara Kreativtı industriialardy damytu qorynyŋ alaŋynda, Qazaq Creative Hub keŋıstıgınde ötıp jatyr. Qatysuşylar qatarynda qolöner şeberlerı, dizainerler men suretşıler, mädeniet mekemelerınıŋ şyǧarmaşylyq ūjymdary, IT mamandary jäne T. Bigeldinov atyndaǧy Äue qorǧanysy küşterınıŋ äskeri instituty kursanttary bar.
Körmede zergerlık būiymdar, terı, aǧaş, süiek pen jünnen jasalǧan tuyndylar, kiız būiymdary, syrmaq, basqūr, ūlttyq aksessuarlar men kädesyilar ūsynylǧan. Keluşıler şeberlerdıŋ jūmys barysyn körıp, praktikalyq şeberlık sabaqtaryna qatysa alady.
Baǧdarlamada zerger Bolat Atyraubaev, kiız basu şeberı Rabiǧa İspulatova, qolöner şeberı Erqosai Äbılov jäne suretşı Qairat Noǧaevtyŋ sabaqtary qarastyrylǧan. Ekspozisiia dästürlı qolöner ülgılerımen qatar, zamanaui sūranysqa beiımdelgen avtorlyq önımderdı de qamtidy.
Körme-järmeŋkenıŋ sän keŋıstıgınde aqtöbelık jetı dizainerdıŋ toptamalary tanystyrylǧan. Sän körsetılımıne «SAULEMAI COUTURE», «Trumova Collection», «SYRMAK», «ULPAN SAN UI», «MARKA» sän üilerı men Azamat SAIN brendı qatysady.
Mäselen, «SYRMAK» dästürlı syrylyp tıgıletın syrt kiım ülgılerın zamanaui oversize pışınımen üilestırse, «Trumova Collection» ūlttyq naqyşty äielder kiımıne engızedı. «ULPAN» men «SAULEMAI» de dästürlı qūndylyqtardy zamanaui sän tılımen jetkızuge basymdyq beredı.
2015 jyly qūrylǧan Azamat SAIN brendı balalar kiımınıŋ toptamasyn paş etedı. Brend sapaly materialdarǧa, kiım bölşekterınıŋ mūqiiat oryndaluyna jäne zamanaui dizainǧa män beredı. Onyŋ önımderı būǧan deiın şeteldık sän alaŋdarynda da tanystyrylǧan.
Dimaş Qūdaibergennıŋ şyǧarmaşylyǧyna arnalǧan ekspozisiia da körme-järmeŋkeden oryn tapty. Älemge tanymal änşınıŋ halyqaralyq sahnadaǧy jetıstıkterı, şyǧarmaşylyq erekşelıgı jäne tuǧan öŋırımen bailanysyn körsetetın zattary şaranyŋ sänın keltırıp tūr.
Tehnologiialyq baǧytta T. Bigeldinov atyndaǧy Äue qorǧanysy küşterınıŋ äskeri instituty kursanttarynyŋ IT-jobalary tanystyryluda. Būl bölım jas mamandardyŋ tehnikalyq şyǧarmaşylyǧyn jäne sifrlyq şeşımderdı qoldanu mümkındıkterın körsetuge arnalǧan.
Sonymen qatar ädebiet pen zamanaui vizualdy önerdıŋ bailanysy da qamtylǧan. Körmede Aqtöbe öŋırınen şyqqan aqyn-jazuşylardyŋ kıtaptary jinaqtalǧan Book Market jūmys ısteidı. Kıtaphana salasyndaǧy jaŋa jobalar men oqu mädenietın damytuǧa baǧyttalǧan bastamalar da būl kreatorlar şarasynda paş etılgen.
Körme-järmeŋke keluşılerı «Daryn» memlekettık jastar syilyǧynyŋ iegerı, jas jazuşy Älihan Jaqsylyqtyŋ Aqtöbe öŋırıne arnalǧan animasiialyq filmı, Aqtöbe oblystyq «Alaqai» quyrşaq teatrynyŋ erekşe balalarǧa arnalǧan «Jyl mezgılderı» inkliuzivtı qoiylymyn tamaşalai alady.
Muzykalyq baǧdarlamada «SherTer» kreativtı jobasynyŋ oryndaulary, «Jerebe life» önerlı jastar jobasynyŋ konsertı jäne jas kompozitor ärı kreator Serık Zakariianyŋ şyǧarmaşylyq keşı bar.
Aqtöbe oblysynda bügınde 3 myŋnan astam mädeniet qyzmetkerı eŋbek etedı. «Aqtobe Creative Days» olardyŋ şyǧarmaşylyq äleuetın, öŋırlık brendterdı jäne avtorlyq önımderdı respublikalyq auditoriiaǧa tanystyruǧa mümkındık beredı. Qolöner, sän, ädebiet, teatr, muzyka jäne IT baǧyttaryn bırıktırgen joba dästürlı mädeni mūra men zamanaui kreativtı industriialardyŋ özara bailanysyn körsetedı.
