5 mausym – Düniejüzılık qorşaǧan ortany qorǧau künı jäne Ekolog künıne orai saltanatty marapattau räsımı ötkızıldı.
Is-şaraǧa ekologiia salasynyŋ ardagerlerı, ekologtar, qorşaǧan ortany qorǧau salasynyŋ mamandary, käsıporyn ökılderı men belsendı erıktıler qatysty.
Saltanatty şarada Aqtöbe oblysy äkımınıŋ orynbasary Ǧalymjan Eleuov qūttyqtau söz söilep, ekologiia salasy qyzmetkerlerınıŋ öŋırdıŋ tūraqty damuy men qorşaǧan ortany qorǧaudaǧy maŋyzdy rölın atap öttı.
«Tabiǧat – adamzattyŋ eŋ qymbat bailyǧy, ortaq üiımız. Ony qorǧau, tabiǧi tepe-teŋdıktı saqtau jäne keler ūrpaqqa taza qorşaǧan orta qaldyru – barşamyzdyŋ ortaq mındetımız. Memleket basşysy Qasym-Jomart Toqaevtyŋ bastamasymen jüzege asyrylyp jatqan «Taza Qazaqstan» jalpyūlttyq baǧdarlamasy qorşaǧan ortaǧa degen jauapkerşılıktı arttyryp, ekologiialyq mädeniettı qalyptastyruǧa baǧyttalǧan maŋyzdy jobaǧa ainaldy», – dedı Ǧalymjan Eleuov.
Oblys äkımınıŋ orynbasary öŋırdegı ekologiialyq ahualdy jaqsartu baǧytynda jüielı jūmystar jürgızılıp jatqanyn atap öttı. Onyŋ aituynşa, «Aqtöbe oblysynyŋ ekologiialyq mäselelerın keşendı şeşu jönındegı 2024–2026 jyldarǧa arnalǧan jol kartasy» aiasynda bırqatar maŋyzdy jobalar ıske asyryluda.
Atap aitqanda, Aqtöbe qalasynda täulıgıne 100 myŋ tekşe metr önımdılıgı bar jaŋa kärız-tazartu qūrylystary keşenın salu josparlanǧan. Qazırgı uaqytta jobanyŋ tehnikalyq-ekonomikalyq negızdemesı äzırlenıp, smetalyq qūny 53,5 mlrd teŋge kölemınde aiqyndalǧan. Nysandy paidalanuǧa beru 2028 jylǧa josparlanyp otyr.
Sonymen qatar öŋırdıŋ ırı önerkäsıptık käsıporyndary atmosferalyq şyǧaryndylardy azaitu baǧytynda naqty şaralar qabyldauda. «Qazhrom» TŪK» AQ Aqtöbe ferroqorytpa zauytynda halyqaralyq standarttarǧa säikes tazalau tiımdılıgı kemınde 99 paiyz bolatyn №1 jäne №2 sehtardyŋ gaz tazartu qūrylystaryn jaŋǧyrtu jūmystary aiaqtaldy. Al Aqtöbe hrom qosyndylary zauytynda elektrofiltrler men süzgılerdı ornatu nätijesınde ziiandy şyǧaryndylar kölemın 63 paiyzǧa deiın tömendetuge mümkındık berıldı.
Merekelık şara barysynda tabiǧatty qorǧau ısıne qosqan eleulı ülesterı men qorşaǧan ortany saqtauǧa baǧyttalǧan nätijelı eŋbekterı üşın sala mamandary marapattaldy.
