Qazaqstan Respublikasynyŋ Ūlttyq kıtaphanasynda «Aqiqat» ūlttyq qoǧamdyq-saiasi jurnalynyŋ 105 jyldyǧyna arnalǧan «Zaman men ziialy mınberı» atty ǧylymi-täjıribelık konferensiia öttı, dep habarlaidy "Adyrna".
Jiyn Memleket basşysy Qasym-Jomart Toqaevtyŋ jurnal ūjymyna joldaǧan qūttyqtau hatynan bastaldy. Prezidenttıŋ qūttyqtauyn Memleket basşysynyŋ keŋesşısı Mälık Otarbaev oqyp berdı.
Qasym-Jomart Toqaev qūttyqtauynda «Aqiqat» jurnalynyŋ qazaq baspasözındegı tarihi ornyna toqtaldy. Memleket basşysy basylym betterınde Mūhtar Äuezov, Beiımbet Mailin, Säken Seifullin syndy ūlt ziialylarynyŋ eŋbekterı jariialanǧanyn atap öttı. Sondai-aq jurnaldyŋ ūlttyq sana men qoǧamdyq oidyŋ damuyna üles qosqanyn aitty.
Is-şarada Mädeniet jäne aqparat ministrı Arman Qyryqbaevtyŋ qūttyqtau haty da oqyldy. Ministr jurnaldyŋ ǧasyrdan astam uaqyt boiy eldıŋ qoǧamdyq-saiasi jäne ruhani ömırımen sabaqtasyp kele jatqanyn atap ötken.
Konferensiiaǧa Qazaqstan Respublikasy Prezidentı janyndaǧy Ūlttyq ǧylym akademiiasynyŋ prezidentı Aqylbek Kürışbaev, jurnal ardagerlerı Sarbas Aqtaev, Janbolat Aupbaev, tarihşy Hangeldı Äbjanov jäne basqa da ǧalymdar qatysty.
Jiynda «Aqiqat» jurnalynyŋ tarihy men qazırgı qyzmetı turaly baiandamalar jasaldy. Basylymnyŋ bas redaktorynyŋ orynbasary, jurnalist Dina İmambai jurnaldyŋ 1921 jyldan bergı tarihyna toqtaldy.
«Aqiqat» jurnalynyŋ tarihy 1921 jylǧy 15 qyrküiekten bastalady. Basylym alǧaşqy kezde «Qyzyl Qazaqstan» degen ataumen Orynbor qalasynda jaryq körgen. Onyŋ alǧaşqy bas redaktory memleket jäne qoǧam qairatkerı, publisist Abdolla Asylbekov boldy.
Är jyldary jurnal «Auyl kommunisı», «Kommunist», «Qazaqstan bolşevigı», «Qazaqstan kommunisı» degen ataularmen jaryq kördı. Basylymda Oraz Jandosov, Smaǧūl Säduaqasov, Näzipa Qūljanova, Nyǧmet Nūrmaqov, Ūzaqbai Qūlymbetov jäne basqa da qoǧam qairatkerlerı eŋbek ettı.
Konferensiia barysynda jurnalda eŋbek etken qalamgerler estelıkterımen bölıstı. Sonymen qatar «Alaştyŋ «Aqiqaty» atty kıtaptyŋ tūsaukeserı öttı. Kıtapta jurnaldyŋ tarihy, bas redaktorlary turaly mälımetter, zertteuler men estelıkter qamtylǧan.
Is-şara soŋynda «Qazaq gazetterı» JŞS direktory Erjan Baitıles jurnal ardagerı Sarbas Aqtaevty «Parlamentke 30 jyl» medalımen marapattady.
