قازاقستان رەسپۋبليكاسىنىڭ ۇلتتىق كىتاپحاناسىندا «اقيقات» ۇلتتىق قوعامدىق-ساياسي جۋرنالىنىڭ 105 جىلدىعىنا ارنالعان «زامان مەن زيالى مىنبەرى» اتتى عىلىمي-تاجىريبەلىك كونفەرەنتسيا ءوتتى، دەپ حابارلايدى "ادىرنا".
جيىن مەملەكەت باسشىسى قاسىم-جومارت توقاەۆتىڭ جۋرنال ۇجىمىنا جولداعان قۇتتىقتاۋ حاتىنان باستالدى. پرەزيدەنتتىڭ قۇتتىقتاۋىن مەملەكەت باسشىسىنىڭ كەڭەسشىسى مالىك وتارباەۆ وقىپ بەردى.
قاسىم-جومارت توقاەۆ قۇتتىقتاۋىندا «اقيقات» جۋرنالىنىڭ قازاق باسپاسوزىندەگى تاريحي ورنىنا توقتالدى. مەملەكەت باسشىسى باسىلىم بەتتەرىندە مۇحتار اۋەزوۆ، بەيىمبەت مايلين، ساكەن سەيفۋللين سىندى ۇلت زيالىلارىنىڭ ەڭبەكتەرى جاريالانعانىن اتاپ ءوتتى. سونداي-اق جۋرنالدىڭ ۇلتتىق سانا مەن قوعامدىق ويدىڭ دامۋىنا ۇلەس قوسقانىن ايتتى.
ءىس-شارادا مادەنيەت جانە اقپارات ءمينيسترى ارمان قىرىقباەۆتىڭ قۇتتىقتاۋ حاتى دا وقىلدى. مينيستر جۋرنالدىڭ عاسىردان استام ۋاقىت بويى ەلدىڭ قوعامدىق-ساياسي جانە رۋحاني ومىرىمەن ساباقتاسىپ كەلە جاتقانىن اتاپ وتكەن.
كونفەرەنتسياعا قازاقستان رەسپۋبليكاسى پرەزيدەنتى جانىنداعى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆ، جۋرنال ارداگەرلەرى سارباس اقتاەۆ، جانبولات اۋپباەۆ، تاريحشى حانگەلدى ءابجانوۆ جانە باسقا دا عالىمدار قاتىستى.
جيىندا «اقيقات» جۋرنالىنىڭ تاريحى مەن قازىرگى قىزمەتى تۋرالى باياندامالار جاسالدى. باسىلىمنىڭ باس رەداكتورىنىڭ ورىنباسارى، جۋرناليست دينا يمامباي جۋرنالدىڭ 1921 جىلدان بەرگى تاريحىنا توقتالدى.
«اقيقات» جۋرنالىنىڭ تاريحى 1921 جىلعى 15 قىركۇيەكتەن باستالادى. باسىلىم العاشقى كەزدە «قىزىل قازاقستان» دەگەن اتاۋمەن ورىنبور قالاسىندا جارىق كورگەن. ونىڭ العاشقى باس رەداكتورى مەملەكەت جانە قوعام قايراتكەرى، پۋبليتسيست ابدوللا اسىلبەكوۆ بولدى.
ءار جىلدارى جۋرنال «اۋىل كوممۋنيسى»، «كوممۋنيست»، «قازاقستان بولشەۆيگى»، «قازاقستان كوممۋنيسى» دەگەن اتاۋلارمەن جارىق كوردى. باسىلىمدا وراز جاندوسوۆ، سماعۇل سادۋاقاسوۆ، ءنازيپا قۇلجانوۆا، نىعمەت نۇرماقوۆ، ۇزاقباي قۇلىمبەتوۆ جانە باسقا دا قوعام قايراتكەرلەرى ەڭبەك ەتتى.
كونفەرەنتسيا بارىسىندا جۋرنالدا ەڭبەك ەتكەن قالامگەرلەر ەستەلىكتەرىمەن ءبولىستى. سونىمەن قاتار «الاشتىڭ «اقيقاتى» اتتى كىتاپتىڭ تۇساۋكەسەرى ءوتتى. كىتاپتا جۋرنالدىڭ تاريحى، باس رەداكتورلارى تۋرالى مالىمەتتەر، زەرتتەۋلەر مەن ەستەلىكتەر قامتىلعان.
ءىس-شارا سوڭىندا «قازاق گازەتتەرى» جشس ديرەكتورى ەرجان بايتىلەس جۋرنال ارداگەرى سارباس اقتاەۆتى «پارلامەنتكە 30 جىل» مەدالىمەن ماراپاتتادى.
