Bışkekte Qazaqstannyŋ qoldauymen Kemel Toqaev atyndaǧy №33 mektep-gimnaziiany auqymdy jaŋartu jūmystary jalǧasuda.
Būl bılım beru mekemesınıŋ ekı el üşın de airyqşa maŋyzy bar. Bügınde būl tarihi ǧimaratqa jaŋa tynys berılude: infraqūrylymy jaŋartylyp, bılım aluǧa zamanaui jaǧdailar jasalyp jatyr, sondai-aq ozyq tehnologiialarmen jabdyqtalǧan kabinetter aşyluda.
Qazaqstannan jetkızılgen jabdyqtarmen robototehnika jäne himiia kabinetterı aşyldy. №33 mektep kompiuterler, 3D-skanerler jäne täjıribelık sabaqtarǧa arnalǧan zerthanalyq jabdyqtar aldy.
Oqu bölmelerı Qazaqstan tarapy ūsynǧan zamanaui jabdyqtarmen jäne jihazdarmen qamtamasyz etıldı.
İnformatika jäne jasandy intellekt tehnologiialaryna arnalǧan kabinetke 25 kompiuter, prototipter jasauǧa arnalǧan üş printer, tört 3D-skaner jäne diagonalı 75 diuim bolatyn interaktivtı monitor berıldı. Sonymen qatar mektep pernetaqtalar, tıntuırler, qūlaqqaptar jäne qajettı oqu jihazdaryn aldy.
İnformatika pänınıŋ mūǧalımı Askat Borukulovtyŋ aituynşa, jaŋa kompiuterler quatty analyq taqşalarmen, zamanaui beinekartalarmen jäne kölemı ūlǧaitylǧan jedel jadpen jabdyqtalǧan. Mūndai tehnika oquşylarǧa 3D-grafikamen, modeldeumen jäne zamanaui baǧdarlamalarmen jūmys ısteuge mümkındık beredı.
Himiia kabinetınde täjıribelık jäne zertteu sabaqtaryn ötkızuge qajettı jaǧdai jasaldy. Qazaqstan tarapy kolbalar, synauyqtar, himiialyq reaktivter, olardy saqtauǧa arnalǧan jabdyqtar jäne täjıribeler jürgızuge arnalǧan arnaiy jihazdar ūsyndy.
Himiia pänınıŋ mūǧalımı Albina Usanova jaŋa jabdyqtar zertteu jobalaryn köbırek jürgızuge, baiqaular men olimpiadalarǧa qatysuǧa, sondai-aq himiialyq reaksiialardy körnekı türde zertteuge mümkındık beretının atap öttı.
Jabdyqtardyŋ bır bölıgı älı tolyq aşylyp, ornalastyrylmaǧanyna qaramastan, jaŋa kabinetterde sabaqtar bastalyp kettı. İnformatika sabaqtarynda oquşylar sifrlyq daǧdylardy meŋgerıp, robototehnikanyŋ qoldanylu joldaryn zertteidı. Al himiia sabaqtarynda zattardyŋ reaksiialaryn täjıribe jüzınde baqylaidy.
Mektep direktory Taalaikül Aşimova Qazaqstanǧa körsetken qoldauy üşın alǧys bıldırdı.
«Jaŋadan jabdyqtalǧan kabinetterdıŋ arqasynda bız balalarymyzǧa sapaly bılım beruge mümkındık aldyq. Dos memleketımız Qazaqstannyŋ qoldau körsetıp jatqanyna şeksız quanyştymyz. Bırlesken bılım beru jobalarymyzdyŋ jalǧasyn asyǧa kütemız», – dep atap öttı ol.
