Elordada Memleket basşysy Qasym-Jomart Toqaevtyŋ qatysuymen Astana halyqaralyq forumy bastaldy, dep habarlaidy “Adyrna” ūlttyq portaly.
Būl turaly Aqordanyŋ baspasöz qyzmetı habarlady.
Forumnyŋ plenarlyq otyrysynda söilegen sözınde Prezident jahandyq qauıpsızdık, beibıtşılık pen yntymaqtastyq mäselelerın qozǧady.
«Barşaŋyzben Astana halyqaralyq forumynda jüzdeskenıme quanyştymyn! Bügıngı basqosuǧa şetel ükımetterınıŋ basşylary, diplomatiia, biznes jäne akademiialyq ortadaǧy dostarymyz ben ärıptesterımız qatysyp otyr. Märtebelı meimandarymyzǧa, atap aitqanda, Ruanda Prezidentı Pol Kagamege jäne Soltüstık Makedoniia Prezidentı Gordana Silianovska-Davkovaǧa, Europa Keŋesınıŋ Bas hatşysy Alen Bersege, BŪŪ-nyŋ būrynǧy Bas hatşysy Pan Gi Munǧa, Bırıkken Ūlttar Ūiymy jüiesınıŋ jetekşılerıne, forumnyŋ özge de qatysuşylaryna şynaiy rizaşylyǧymdy bıldıremın», – dedı Qasym-Jomart Toqaev.
Memleket basşysy qazırgı uaqytta älemde soǧys pen qaqtyǧystardyŋ örşıp bara jatqanyn atap öttı.
«Dünie jüzın qaqtyǧystar men soǧys örtı jailap barady. Byltyrǧy mälımetke säikes, 52 memleket qaruly qaqtyǧys jaǧdaiynda tūrǧan. Al osyndai qatygez äreketterden kelgen ekonomikalyq şyǧyn 19 trillion dollarǧa jettı. Būl, şamamen, älemdık IJÖ-nıŋ 13,5 paiyzy», – dedı Prezident.
Onyŋ aituynşa, būl sandardyŋ ar jaǧynda odan da qorqynyşty ahual jatyr.
«Qazırgı qaqtyǧystar anaǧūrlym ūzaq ärı kürdelı sipatqa ie. Oǧan köptegen «oiynşylar», tıptı, eşqandai memleketke qatysy joq toptar aralasady. Mūndai qaqtyǧystardyŋ tamyrynda türlı qaişylyqtar jatyr», – dedı ol.
Prezident älemdegı şielenısterdıŋ jasandy intellekttıŋ damuymen müldem üilespeitının aityp, tarihi arazdyqtarǧa süiengen soǧystardyŋ aqylǧa qonbaitynyn jetkızdı.
«Soǧysudyŋ ornyna bız halqymyzdy, äsırese, jastarymyzdy sanaly ärı örkeniettı qoǧam qūruǧa ündeuımız kerek», – dedı Memleket basşysy.
Sonymen qatar, Qasym-Jomart Toqaev iadrolyq qaruy bar memleketter arasyndaǧy şielenısterge erekşe nazar audaru qajettıgın atap öttı.
Ūqsas jaŋalyqtar
