Kere qarys qara qaişy... Özaǧaŋnyŋ däu SK-daǧy däu üstelınıŋ üstınde jatatyn körınedı. Nemese sol üsteldıŋ tartpasynda tūrady. Özaǧaŋ ony qolyna aldy degenşe,.. bıttı bar qaǧazdyŋ şaruasy. Qiiady, qyrqady, küzeidı. Qiǧaş ketıp bara jatqan qiiampūrystau qūjatty qiia bastyrmaidy. Aŋyzǧa ainalǧan abyzdyŋ bır tälımı osy...
Būl qaişy Özekeŋmen bırge talai estelıktıŋ keiıpkerı boldy. Ädebiettanudyŋ bılgırı, äidık ǧalym, akademik Seiıt Qasqabasov ta qara qaişyny eske alǧanda erıksız ezu tartady...
Ömır boiy ǧylymmen ainalysqan Seiıt aǧamyz künderdıŋ künınde Ortalyq Komitetke jūmysqa kelem dep oilamapty. Sekeŋ men Sekaŋ bır-bırıne üilespeitın ekı türlı närse siiaqty edı. Memlekettık qyzmetke Özbekälı Jänıbekov şaqyrdy. Qaramaǧyndaǧy qyzmetkerlerıne talaby öte qatal boldy. Özın de, özgenı de aiaǧan joq. Jazǧan-syzǧanyŋdy mındettı türde küzep-tüzep, öz bailamyn aitatyn. Qolynan ūzyn qaişysy tüspeitın. Qiiatyn, öŋdeitın, jöndeitın. Aldyna qūjat aparyp otyrǧanda Özekeŋ üstelınıŋ tartpasynan jalaŋdatyp qaişysyn şyǧarǧanda qyzmetkerlerdıŋ jürekterı su ete qalatyn. Osynyŋ özınen jetkılıktı tälım aldy. Sol qaişy köp närsege üirettı.
Özaǧaŋnan önege, qaişydan qairau körgen Seiıt aǧa keiın Täuelsız Qazaqstannyŋ tūŋǧyş Joǧary attestasiialyq komissiiasynyŋ töraǧasy bolyp bekıtıldı. Komissiia qiyn kezeŋde qūryldy. Jasyratyny joq, «Mūndai ūiymnyŋ endı keregı az. Būl – kompartiianyŋ oilap tapqany» degen pıkırler köp aitylyp jatqan kez edı. Bırqatar şeneunıkter «Halyqaralyq standart degen bar. Eşqandai qorǧaudyŋ qajetı joq», - degendı köldeneŋ tartty. Sodan 13 europalyq eldıŋ täjıribesı zertteldı. Halyqaralyq standart degen joq bolyp şyqty. 11 eldıŋ mekemesı bırlesıp, qauymdastyq qūrdy. Ştab-päterı Almatyǧa ornalasty.
Töraǧasy Sekeŋ boldy. Kandidattyq pen doktorlyq däreje, dosenttık pen professorlyq ataq sol küiınde qaldyryldy.
Seiıt aǧa öz tūsynda qorǧau tärtıbın bıraz jeŋıldetuge küş saldy. Qoldan jasalǧan türlı kedergıler köp edı. Sonyŋ bärın alyp tastauǧa tyrysty. Akademiialyq instituttar ǧalymdarynyŋ qūqy joǧary oqu oryndary ǧalymdarynyŋ qūqymen teŋestırıldı. Akademiiada qyzmet ısteitın ǧylym doktorlarynyŋ professor ataǧyna tezdetıp qol jetkızuıne mümkındık jasaldy. Būryn būl qiynnyŋ qiyny edı. Akademiiadaǧylarǧa eskı ülgıdegı aǧa ǧylymi qyzmetker deitın ataq berıletın. Sony joidy. Būl üşın tek qana eldıŋ alǧysyn aldy.
Söitıp, ony Özaǧaŋnyŋ qos qarys qaişysy tek qaǧaz-paǧazdyŋ artyq-auys tūsyn ǧana emes, ömır täjıribesınde baiqalǧan qajetsızdeu närselerdı de qyrqyp-qyrnai tüsuge baulydy. Sondyqtan Sekeŋ osy aǧasyn oiǧa alsa, esıne onyŋ ūzyn qaişysy qosa tüsedı...
Mıne, kördıŋız be, qaişylau men qamşylau adamnyŋ bolmys-bıtımıne qalai äser etken?! Al Özaǧaŋ qaişysynyŋ qaiyryn körgender qanşama?!
* * *
Bügın memleket jäne qoǧam qairatkerı Özbekälı Jänıbekovtıŋ tuǧan künı. Ruhy şat bolsyn ardaqty aǧamyzdyŋ! Qairatkerdıŋ qaişysy qazır qai mūrajaida tūr eken?!
